Amai Nguyễn Thị Khánh Phương, ti ƀuôn hgŭm Tuy Hoà brei thâo, wưng thŭn 2023, mnuih hlăm sang klei kjham lĕ tian, čiăng mbŏ êrah lu kơh dưi hdĭp. Năng mđing hĭn, pô ruah mâo mta êrah hin AB kyuanăn klei duah êrah mmông anăn dleh dlan êdi. Hlăm klei anăn, dŭm hnơ̆ng êrah mơ̆ng sang êa drao prŏng Phú Yên tŭ mă mơ̆ng sa čô myơr êrah dưi mâo đru dŏng mnuih hlăm gŏ sang amai.

Myơr êrah êlâo kơ wưng tết Bính Ngọ anei jing gưl tal 4 hlăm tlâo thŭn êgao amai nao hgŭm ti ƀuôn hgŭm Tuy An. Amai Nguyễn Thị Khánh Phương bi êdah.

 “Yap mơ̆ng wưng amai kâo mâo klei ruă leh anăn mâo êrah myơr dưi dŏng mdrao, 3 thŭn êgao mâo klei suaih pô nao hgŭm myơr êrah. Kâo hmăng hmưi, dŭm aruăt êrah pô srăng dưi dŏng hdĭp phung ruă kjham mkăn msĕ hŏng mnuih hlăm sang pô tuôm.”

Ăt nao myơr êrah ti ƀuôn hgŭm Tuy Hoà hlăm wưng anei, leh sa ai hŏng klei mtrŭt mjhar mơ̆ng Sang êa drao prŏng Phú Yên, amai Đinh Thị Ngọc Ngàn, ƀuôn hgŭm Tuy Hoà brei thâo:

 “Anei jing gưl tal 4 kâo nao myơr êrah, hŏng klei hmăng hmưi dưi kah mbha, đru kơ phung ruă dôk tuôm hŏng klei dleh dlan kơ êrah. Hŏng hdră bruă anei, kâo hmăng hmưi srăng mâo thiăm lu phung mda asei, phung ayŏng amai adei myơr êrah đru kơ lu mnuih hĭn, đru bi lar ai tiê kah mbha hlăm êpul êya.”

Mơ̆ng akŏ mlan 1 truh kơ ară anei, sang êa drao prŏng Phú yên tŭ mă leh hlăm brô 330 hnơ̆ng êrah mơ̆ng dŭm anôk myơr êrah ti ƀuôn hgŭm Tuy An, mđĭ hnơ̆ng êrah mkăm pioh giăm 760. Hluê si aê mdrao Nguyễn Định Huy, khua anôk mdrao kơ Êrah - mbŏ êrah, sang êa drao prŏng Phú yên, grăp mlan dŭm anôk mdrao mgŭn alŭ wăl Ngŏ čar Dak Lak čiăng kơ giăm 600 hnơ̆ng êrah. Hlăm wưng tết, êjai ênoh klei dŏng mdrao, klei truh hlăm êlan klông đi lu, bruă čŏng hrui mă êrah mơ̆ng hnưm jing hdră êlan yuôm bhăn čiăng rơ̆ng mâo djăp êrah mdrao mgŭn kơ phung ruă hlăm wưng tết Bính Ngo.

 “ Ară anei grăp hruê kăm hmei tŭ mă êbeh 150 hnơ̆ng êrah mơ̆ng dŭm hdră myơr êrah mơ̆ng êpul mtrŭt mjhar myơr êrah iêo mthưr. Leh tŭ mă, ênoh êrah anei dưi mkă dlăng klă leh anăn ksiêk mbha hluê 5 mta klei ruă mơ̆ng Phŭn bruă mdrao mgŭn msĕ si: HIV, Ruă tiê B,C, giang mai, êngoh ktư̆ đru kơ klei dŏng mdrao kơ phung hlăm wưng Tết.

Ăt ti alŭ wăl nah Ngŏ, hdră myơr êrah wưng êlâo kơ Tết Bính Ngọ ăt mkŏ mjing ti nah yŭ čar Dak Lak. Aê mdrao chuyên khoa II Trịnh Hồng Nhựt, khua kiă kriê sang êa drao prŏng Lăn Dap Kngư hưn, hŏng hnơ̆ng 1.200 jhưng đih, grăp wưng tết sang êa drao tŭ jum ênoh lu phung ruă. Čiăng rơ̆ng kơ klei mkă dlăng, mdrao klei ruă, sang êa drao čŏng mprăp djăp êa drao, kdrăp yua, dăp 100% nai aê mdrao leh anăn mnuih mă bruă mmông Tết.

Hluê si aê mdrao Trịnh Hồng Nhựt, khădah hnơ̆ng êrah hlăm wưng mdei tết sui hruê jing nanao klei lông dlăng, ƀiădah kyua čŏng mkăp mơ̆ng hnưm, truh kơ ară anei, sang êa drao lŏ dơ̆ng tŭ mă leh anăn pioh lu hnơ̆ng êrah, mprăp đru kơ klei dŏng mdrao, mdrao mgŭn:

 “Bi kơ êa drao, sang êa drao mnă kơ Anôk bruă êa drao mkŏ mjing hdră êlan, mprăp djăp êa drao, kdrăp yua mdrao mgŭn đru kơ klei mkă dlăng, mdrao klei ruă. Hŏng êrah, sang êa drao bi mguôp hŏng dŭm êpul ngă bruă jăk iêo jak hlăm brô 1000 hnơ̆ng êrah pioh kơ phung ruă. Ênoh anei lu hĭn grăp thŭn knơ̆ng ti hnơ̆ng 700 - 800 hnơ̆ng êrah, mprăp đru kơ klei dŏng mdrao. Bi hŏng dŭm mta êrah hin, sang êa drao blŭ hrăm leh hŏng phung myơr êrah êjai phung ruă čiăng.”

Hŏng klei čŏng pô mprăp mơ̆ng bruă mdrao mgŭn mbĭt hŏng ai tiê kah mbha mơ̆ng phung myơr êrah, dŭm sang êa drao ti Dak Lak dôk mprăp bi mâo djăp klei čiăng dŏng mdrao wưng Tết Bính Ngọ. Dŭm hnơ̆ng êrah dưi hmao pioh jing anôk knang yuôm bhăn čiăng sua wĭt klei hdĭp kơ mnuih ruă. Hluê anăn, đru rơ̆ng klei suaih pral kơ mnuih ƀuôn sang, čiăng kơ grăp čô drông tết kluôm ênŭm, êđăp ênang.