Anei jing mmông bi mjĕ mjuk grăp wưng mơ̆ng Êpul hgŭm “Rông anak jăk” mơ̆ng Êpul bruă mniê alŭ 1, să Đư̆ng K’Nớ, kdriêk Lạc Dương, čar Lâm Đồng. Dưi mkŏ mjing hlăm mlan 8 thŭn 2012 hŏng 10 čô hgŭm, truh kơ ară anei, Êpul mâo leh 61 čô.

Amai Bon Niêng K’Pớt, Khua Êpul hgŭm brei thâo, êlâo adih, amai adei mniê alŭ 1 dôk kƀah klei thâo săng ngă kơ bruă dlăng kriê, rông ba anak čô, mkŏ mkra gŏ sang ka mâo klei đĭ kyar, kreh dhar ôh, mơ̆ng leh mâo Êpul hgŭm bruă, truh kơ ară anei, phung amai adei mniê ƀrư̆ mđĭ klei thâo săng, mâo hdră rông ba, kriê dlăng čô anak djăp ênŭm hĭn:

 “Mơ̆ng leh mkŏ mjing Êpul hgŭm bruă truh kơ ară anei, amai adei dưi thâo leh bruă klam mơ̆ng phung mniê hlăm klei hdĭp duh mkra ala ƀuôn lehanăn gŏ sang. Ênoh kkiêng anak tal 3 hrŏ. Êlâo adih, hlăm brô 50% ară anei dôk 10% đuič. Ênoh hđeh kdjuôt kdjĭng hrŏ lu mơh, êlâo adih ka mâo êpul hgŭm anei, ênoh hđeh kdjuôt kdjĭng êbeh 45%. Mnuih hgŭm hlăm êpul mâo anak aneh jăk ênang, hriăm hră thâo, ênoh hđeh kbiă sang hră krah dưh ăt hrŏ lu mơh”.

Hŏng lu hdră msĕ si: Bi kƀĭn trông, êmuh – wĭt lač, mbha hră điêt, hiu mtô mblang, klei hlăp pĕ mnga… lehanăn bi mguôp hŏng lu hdră mtô mblang mkăn, Êpul hgŭm mprăp leh kơ grăp čô dŭm klei thâo săng phŭn kơ Hdră bhiăn bi dôk ung mô̆, ƀă kkiêng anak ƀiă, hdră thiăm mbŏ mnơ̆ng ƀơ̆ng tŭ jăk kơ phung mniê ba tian, hdră dlăng kriê, rông ba anak čô, tŭk knă êsei djam mâo djăp mta tŭ jăk lehanăn dŭm hdră gang mkhư̆ klei ruă tưp čiăng kơ anak đĭ prŏng suaih pral…

Amai  Rơ ông K'Yồng, mnuih hgŭm hlăm êpul brei thâo: “Êlâo adih, ka nao hgŭm hlăm Êpul anei, pô knŏng huă asei hŏng djam đuič, bi ară anei thâo tŭk knă čĭm kan, đeh boh mnŭ kơ anak aneh huă čiăng kơ phung anak dưi ƀơ̆ng huă mnơ̆ng tŭ jăk hĭn.

Mơ̆ng dŭm hdră bi mjĕ mjuk, phung amai adei jhŏng hĭn, čŏng nao tui ksiêm hdră rông ba anak, dlăng kriê gŏ sang, mơ̆ng anăn ba yua hlăm klei hdĭp. Mơ̆ng anăn, gŏ sang trei mđao, yâo mơak mơh. Amai Bon Niêng Kđơng, mâo êbeh 1 thŭn hgŭm hlăm Êpul bruă anei brei thâo:

 “Mâo phung amai adei kah mbha klei thâo hlăm hdră rông ba čô anak hlăm gŏ sang, mơ̆ng anăn dưi thâo lehanăn mđĭ anao čô anak pô gĭr hgao klei dleh dlan.

Bon Niêng Ha Krai, Kơiăng khua Anôk bruă sang čư̆ êa să Đưng K’Nớ brei thâo, alŭ 1 ară anei mâo 207 gŏ sang, 859 čô mnuih, êbeh 90% jing mnuih djuê ƀiă. Mơ̆ng leh Êpul hgŭm ngă bruă, đru bi mlih leh klei thâo săng mơ̆ng mnuih ƀuôn sang. Mơ̆ng anăn, êbeh 10 thŭn êgao, ti alŭ 1 amâo dôk ôh phung hđeh kdjuôt kdjĭng, amâo dôk phung hđeh lui sang hră; 5 thŭn giăm anei amâo mâo klei bi dôk ung mô̆ mơ̆ng mda, klei bi dôk giăm sa êrah, jih jang phung hđeh djŏ gưl thŭn dưi nao sang hră; 100% gŏ sang djăp hnơ̆ng čuăn sang dhar kreh.

“Hlăm wưng êgao, Êpul hgŭm mâo leh lu boh tŭ, boh nik hlăm hdră rông ba anak jăk, amâo mâo klei bi čăm biêng hlăm gŏ sang, klei truh jhat hlăm yang ƀuôn. Gưl dlông ăt mâo lu hră pah mni čiăng mđĭ ai Êpul hgŭm anei. Hlăm wưng ti anăp, hluê hdră mđĭ kyar mơ̆ng Êpul srăng mđĭ lar hĭn ti lu alŭ, ƀuôn, dlăng anei jing anôk jưh knang kjăp hlăm krĭng ƀuôn sang.

Êpul hgŭm “Rông ba anak jăk” ti alŭ 1, să Đưng K’Nớ mđĭ lar leh boh tŭ dưn hŏng lu hdră ngă klă sĭt lehanăn jing kdrông mkŏ đru kơ phung amai adei bi trông, tui ksiêm dŭm klei thâo săng jăk kơ hdră dlăng kriê, rông ba anak, bruă ngă blŭ tlao hlăm gŏ sang lehanăn yang ƀuôn, đru mkŏ mkra ƀuôn sang jăk siam, gŏ sang trei mđao, yâo mơak./.