Mơ̆ng akŏ thŭn truh kơ ară anei, kluôm ala mâo leh giăm 40.000 êbâo čô mnuih mâo klei ruă sruê ti 63 boh čar ƀuôn prŏng, hlăm anăn giăm 3.500 čô mnuih thâo klă mâo kman klei ruă anei ti 61 boh čar, ƀuôn prŏng, ênoh mnuih đing mâo klei ruă sruê mâo čih yap lu hĭn jing hlăm nah dhŭng (truh 57% ênoh mnuih ruă mkă hŏng kluôm ala), kwar krah truh 19,2%, kwar dưr truh 15,1%, lăn dap kngư truh 8,7%. Nai prĭn Hoàng Minh Đức, Khua anôk bruă răng mgang klei ruă brei thâo, mâo leh 5 čô mnuih djiê mơ̆ng klei ruă sruê ti čar Quảng Nam:

“Mnuih djiê giăm anei hĭn jing ti kdriêk Nam Trà My (Quảng Nam). Anei jing sa čô hđeh mâo klei ruă sruê, ƀiădah amâo mâo ba mdrao kơ sang êa drao ôh, čiăng mkă dlăng mdrao mgŭn, diñu knŏng nao mbăng kơ mjâo kbuič ti sang. Tơl leh hđeh đuĕ nao kơ kjham ba kơ sang êa drao, snăn truh kơ djiê”.

Dŭm boh čar, ƀuôn prŏng mâo ênoh mnuih ruă sruê đĭ hĭn jing čar Cao Bằng, Nghệ An, Quảng Nam, Đà Nẵng, Khánh Hòa, Daklak, Gia Lai, Kon Tum, Đồng Tháp, An Giang, Lâm Đồng. Mâo đa đa alŭ wăl mâo mnuih ruă dơ̆ng mdei, lehanăn dơ̆ng dưi mkhư̆ klei ruă anăn jing; Lào Cai, Hà Giang, Hà Tĩnh, Bình Thuận, Bạc Liêu, ƀuôn prŏng Hồ Chí Minh, Bình Dương, Đồng Nai, Tây Ninh, Cà Mau.

Tui si anôk bruă răng mgang klei ruă, hlăm thŭn 2024, ênoh mâo tlŏ mgang  vaccine klei ruă sruê dôk hlăm thŭn hđeh jing êbeh 97%. Siămdah, bruă tlŏ mgang ti 31 boh čar, ƀuôn prŏng anôk ênưih mâo klei ruă tưp đĭ hĭn adôk 7 boh čar, ƀuôn prŏng mâo tlŏ mgang leh vaccine sruê ka djăp ôh hŏng ênoh čuăn mơ̆ng phŭn bruă mdrao mgŭn. Kiă kriê klei bi kƀĭn online hlăm kluôm ala, Khua phŭn bruă mdrao mgŭn Đào Hồng Lan mtă kơ dŭm anôk bruă răng mgang klei ruă brei mđing hĭn kơ klei ruă sruê ti alŭ wăl mâo klei tlŏ mgang ƀiă, dŭm boh čar čư̆ čhiăng, anôk mâo lu mnuih djuê ƀiă hdĭp mda, kyua klei găl tlŏ mgang adôk awăt.

“Phŭn bruă mdrao mgŭn hlăk mdah hŏng knŭk kna mâo asăp mtrŭn kiă kriê ngă bi pral klei tlŏ mgang vaccine sruê ti dŭm alŭ wăl. Phŭn bruă ăt mtrŭn leh dŭm hdră tlŏ mgang vaccine srue thŭn 2025, boh nik jing wưng anei, yan adiê bi mlih hŏng lu klei amâo mâo jăk, mjing klei găl kơ djăp mta klei ruă, boh nik klei ruă sruê bluh đĭ ktang”.

Phŭn bruă mdrao mgŭn mtă kơ dŭm boh čar, ƀuôn prŏng bi ksiêm wĭt boh klei ruă tưp sruê, rơ̆ng bi mâo djăp mnuih, kdrăp mă bruă, prăk bi liê, čiăng kơ bruă tlŏ mgang bi mâo ênŭm vaccine sruê čiăng bi leh bruă lŏ tlŏ bi hnô, tlŏ bi ênŭm hlăm mlan 3  anei./.