Y Tong Bkrông, 47 thŭn, djuê ana Êđê, ti să Êa Na, nao ti Anôk bruă mdrao mgŭn Krông Ana čiăng ksiêm mkă dlăng, ktuê dlăng klei suaih pral. Ti Kiosk thâo mĭn, ñu dưi ktrâo lač hưn mthâo klei čih anăn ksiêm mkă dlăng, ksiêm dlăng klei hâo hưn leh anăn mă mrô bi mklă knŏng hlăm dŭm mnĭt. Mơ̆ng mmông čih anăn truh kơ mmông dưi ksiêm mkă dlăng amâo êgao ôh 20 mnĭt. Y Tong brei thâo:

 "Nao ksiêm mkă ti anei ară anei kâo ƀuh jing găl ênưih êdi. Êlâo dih, nao ksiêm mkă brei mprăp lu mta mnơ̆ng, ƀiădah ară anei knŏng mâo hră kak asei, kar mă mrô leh anăn mŭt hlăm klei hâo hưn jing leh. Jăk găl êdi. Anei jing boh tŭ mơ̆ng klei mlih mrô hlăm bruă mdrao mgŭn leh anăn dŭm mta bruă hlăm klei hdĭp mnuih ƀuôn sang kluôm ala."

Amâo djŏ knŏng pŏk ngă gơ̆ng Kiosk thâo mĭn, Anôk bruă mdrao mgŭn Krông Ana ba yua leh hră ênua mdrao mgŭn điện tử mơ̆ng mlan 9/2025, ƀrư̆ bi mlih hră mơar hŏng klei čih. Kdrăp kriê dlăng jih jang klei hâo hưn mơ̆ng bruă knŭk kna, h ƀuê ênuk ksiêm mkă mdrao mgŭn, klei mkă dlăng, ksiêm mkă, rup truh kơ hră ênua mdrao mgŭn leh anăn hdră mdrao mgŭn. Mnuih ruă dưi čih anăn ksiêm mkă hŏng hră kak asei, VNeID amâodah VssID, đru bi hrŏ klei ngă hră mơar, bi hrŏ mmông dôk guôn leh anăn mđĭ boh tŭ kriê dlăng. Aê mdrao Hồ Văn Lập, Kiăng khua kiă kriê Anôk bruă mdrao mgŭn Krông Ana brei thâo, anôk bruă dôk bi mlih mrô hluê si hdră êlan mơ̆ng Phŭn bruă mdrao mgŭn leh anăn mĭn tĭng bi leh hlăm mlan 11/2026.

Hlăm klei dleh dlan, anôk bruă dưn yua leh klei bi mguôp yang ƀuôn leh anăn dưi đru sa gơ̆ng Kiosk thâo mĭn, mơ̆ng anăn dưi ba yua hră ênua mdrao mgŭn điện tử čiăng bi mlih mrô. Hluê si hdră êlan truh mlan 11/2026 mơ̆ng Phŭn bruă mdrao mgŭn, Anôk bruă srăng mprăp êmiêt lui jih hră ênua mdrao mgŭn hđăp êlâo dih."

Ăt msĕ hŏng anôk bruă mdrao mgŭn knŭk kna, klei bi mlih mrô hlăk dôk mtrŭt mđĭ ti anôk bruă mdrao mgŭn êngao knŭk kna čar Dak Lak. Msĕ si Sang êa drao Đại học Y dược Ƀuôn Ama Thuôt, pŏk ngă leh 100% kdrăp Kiosk čih anăn mkă dlăng, kdrăp maĭ tĭng kơ bruă mdrao mgŭn, mkŏ hŏng dŭm adŭ mdrao, adŭ bruă, đru kriê pioh, ba mĭt leh anăn kah mbha rup mkă dlăng. Mbĭt anăn, kdrăp nội soi dưi bi mguôp AI leh anăn adŭ ksiêm mkă dưi ngă bruă hŏng kdrăp mrâo mrang, đru mđĭ hnơ̆ng tŭ jăk leh anăn boh tŭ bruă mdrao mgŭn. Aê mdrao Võ Minh Thành, Khua Sang êa drao brei thâo, hŏng bruă bi mlih mrô êlam, amâo djŏ knŏng bruă tŭ mă leh anăn mdrao mgŭn mâo klei ênưih, ƀiădah mnuih ruă ăt ênưih ksiêm dlăng klei suaih pral pô.

"Mjưh ruê̆ gưl ksiêm mkă dlăng, mdrao mgŭn, mnuih ruă dưi mkăp sa mrô QR mâo bi mguôp hŏng êlan link, lehanăn tơdah dlăng, mŭt hlăm anăn srăng dưi mâo hla pŏk bi mguôp jih jang klei hâo hưn boh tŭ dưn klei ksiêm mkă dlăng, mkă dlăng rup mơ̆ng CT, MRI lehanăn dưi mă ba wĭt kơ masin amâodah đĭng blŭ pô. Jăk găl êdi kyua mnuih ruă amâo guôn djă ba ya mta mnơ̆ng msĕ si êlâo ôh."

Hluê si klei ksiêm yap mơ̆ng Knơ̆ng bruă mdrao mgŭn čar Dak Lak, 100% anôk ksiêm mkă, mdrao mgŭn ti alŭ wăl ba yua leh Hră kak asei mnuih ƀuôn sang, Hră kak asei điện tử (VneID) leh anăn hră ênua yang ƀuôn điện tử (VssID) čiăng ksiêm dlăng klei ksiêm mkă, mdrao mgŭn, hrô kơ hră bảo hiểm mdrao mgŭn hđăp; mbĭt anăn pŏk ngă bruă tla prăk mdrao mgŭn amâo yua prăk êlâo. Êbeh 771.000 čô mnuih ƀuôn sang mâo hră klei suaih pral điện tử. Lu anôk bruă pŏk ngă leh hră ênua điện tử, hlăm anăn 8 anôk bruă bi hrô jih hră ênua hđăp. Phạm Minh Hữu, kiăng khua knơ̆ng bruă mdrao mgŭn čar Dak Lak, brei thâo hluê si hdră êlan mơ̆ng phŭn bruă mdrao mgŭn, truh jih mlan 11/2026, jih jang anôk bruă mdrao mgŭn ti Dak Lak brei pŏk ngă klei čih anăn ksiêm mkă hŏng Kiosk, ba yua hră ênua mdrao mgŭn điện tử hrô kơ hră mơar hđăp leh anăn bi mguôp klei čih pioh mnuih ƀuôn sang mdrao mgŭn.

“Hmei dôk mkŏ mjing ksiêm dlăng wĭt jih jang dŭm anôk bruă mdrao mgŭn kơ kdrăp hâo hưn, êlan klei pui čiăng thâo klă hră mơar klei suaih pral điện tử mơ̆ng mnuih ƀuôn sang. Ară anei 12 kdrăp mrô mnuih ƀuôn sang djŏ tuôm hŏng bruă mdrao mgŭn dôk mâo klei gĭr pŏk ngă hlăm hdră bruă 90 hruê hluê si klei gĭt gai mơ̆ng Phŭn bruă mdrao mgŭn leh anăn srăng bi leh hlăm wưng kơ anăp. Mơ̆ng anăn, mâo djăp ênŭm phŭn mrô mnuih ƀuôn sang mdrao mgŭn mơ̆ng čar Dak Lak.”

Bi mlih mrô hluê si Hdră mtrŭn 57 mơ̆ng Phŭn bruă kđi čar dôk ƀrư̆ ƀrư̆ bi mlih hdră ngă bruă mơ̆ng Anôk bruă mdrao mgŭn Dak Lak, mơ̆ng čih anăn ksiêm mkă, kriê dlăng hră mơar, ksiêm mkă truh kơ tla prăk mdrao mgŭn. Bruă bi sa hnơ̆ng klei čih pioh leh anăn mtrŭt mđĭ bruă ba yua kdrăp mrâo amâo djŏ knŏng mđĭ hnơ̆ng tŭ kriê dlăng, ƀiădah yuôm bhăn hĭn jing bi hrŏ mmông, bi hrŏ klei ngă hră mơar leh anăn mjing klei găl kơ mnuih ruă. Anei ăt jing tur knơ̆ng čiăng kơ Anôk bruă mdrao mgŭn Dak Lak lŏ dơ̆ng mkŏ mjing anôk bruă mdrao mgŭn mrâo mrang, mă mnuih ƀuôn sang jing phŭn.