Kban găn hnoh krông Vầu mkŏ 2 să Ba -Tư hlăm kdriêk Đông Giang, čar Quảng Nam anăp dơ̆ng klưh rai leh, kyuanăn mâo klei gang ghă amâo mâo lŏ brei găn êrô ôh, bi êlan êrô êjai kreh tuôm nanao hŏng klei êa đĭ, êa lêč. Mâo mâo êlan găn, êbeh sa mlan hŏng anei leh, phung nai aê mdrao sang êa drao Ba bi găn rô êa hnoh nao mă bruă. Klei dleh dlan hĭn êdi jing dŭ ba mnuih ruă nao dŏng mdrao. Nai mdrao Nguyễn Thị Thu Hà, sang êa drao să Ba:

“Kban čiăng joh, snăn hmei găn êa nao mă bruă, tơdah tuôm hŏng mmông êa prŏng, êa đoh êtăng, ênưih srăng lĕ hlăm klei êa mđuĕ, snăn amâo lŏ mâo êlan mkăn ôh, knŏng găn êa yơh. Êlan klông dleh dlan, boh nik hlăm klei čiăng ba mnuih ruă dŏng mdrao jing dleh dlan êdi, ngă amâo mâo jăk kơ klei suaih pral mnuih ruă”.

Aê mdrao Phạm Thị Kim Bằng, khua kiă kriê sang êa drao să Ba brei thâo, sang êa drao jing anôk mkă dlăng mdrao mgŭn kơ êbeh 600 gŏ êsei dôk hlăm 2 să Ba lehanăn Tư hlăm kdriêk Đông Giang, čar Quảng Nam ƀiădah knŏng mâo mă 6 čô đuič nai aê mdrao, snăn dơ̆ng mơ̆ng bruă mkă dlăng, mdrao mgŭn, truh kơ bruă atăt ba dŏng mdrao, jhĭt briah anôk êka, thâo dah kkiêng anak... Aê mdrao Phạm Thị Kim Bằng brei thâo, phung nai aê mdrao kơnei ngă bruă gak nanao amâo mâo mdei ôh:

“Phung nai êa drao mâo 4 čô snăn mă bruă bŏ hŏng klei suăi, mlam gak mơh kăn mâo mdei rei. Hưn mthâo leh klei anei hŏng phung khua kiă kriê, ƀidah diñu lač, thŭn leh êgao phung nai aê mdrao bi mlih anôk ngă bruă jing lu mơh. Ară anei anôk bruă hlăk kƀah mnuih mă bruă, boh nik hlăm krĭng čư̆ čhiăng klei hdĭp dleh dlan, mơ̆ng anăn mơh phung ayŏng adei êdu ai. Mă bruă suăi ƀiădah prăk mlan amâo mâo lu ôh. Diñu mă bruă đa êbeh 10 thŭn leh prăk mlan knŏng mơ̆ng 5 – 5 êklăk mkrah đuič snăn amâo mâo djăp huă ƀơ̆ng ôh”.

Jih jang mnuih mă bruă ti dŭm boh sang êa drao krĭng čư̆ čhiăng lu jing mnuih mơ̆ng krĭng dap mnai sơăi. Lu mnuih msĕ snăn. Msĕ hŏng nai êa Nguyễn Thị Hương Thảo, ti sang êa drao kdriêk Đông Giang jing msĕ snăn mơh. găp djuê ñu ti kdriêk Đại Lộc, kyua dleh dlan hlăm klei êrô êbat, lehanăn bruă mă jing ktrŏ nanao hlăm grăp hrue êbeh 10 thŭn hŏng anei nanao snăn yơh knŏng knhal jih hrue kăm ñu wĭt nao čuă ung lehanăn anak sa blư̆. Tăp năng tơdah klei ruă lu, snăn jih mlan, tăp năng dua mlan kơh mâo wĭt kơ sang:

“Bruă knuă ti sang êa drao kdriêk Đông Giang jing lu snăk, ƀiădah prăk mlan ƀiă dhiă. Čang hmăng kơ gưl dlông mâo sa hdră lŏ đru mbŏ prăk kơ phung nai aê mdrao mgŭn hlăm krĭng taih kbưi, msĕ hŏng hmei anei kñăm čiăng krơ̆ng jơ̆ng phung nai aê mdrao lŏ dôk mă bruă”.

Bruă knuă mơ̆ng phung nai êa drao jing suăi êmăn leh, hŏng bruă dôk mdrao mgŭn ti čư̆ čhiăng, krĭng mnuih djuê ƀiă ƀai hĭn lŏ dleh dlan. Boh nik, leh 2 thŭn găn klei ruă tưp prŏng Covid 19, knư̆ hrue knư̆ mâo lu hĭn êjai phung nai aê mdrao akâo nao mă bruă kơ krĭng dah mnai, mâo đa đa hlŏng kbiă bruă mtam, anei yơh jing sa mta klei tĭng dleh dlan êdi hŏng krĭng čư̆ čhiăng. Aê mdrao Lê Thị Quyết, Khua kiă kriê sang êa drao kdriêk Đông Giang brei thâo, anôk bruă anei mâo leh hdră êlan lŏ iêo mbŏ nai aê mdrao, ƀiădah boh sĭt ăt ka thâo djăp ôh nai aê mdrao:

“Mkă hŏng ênoh čoh čuăn kơ anôk ngă bruă jing djăp leh, ƀiădah hŏng ênoh anăn ƀuh jing amâo mâo djăp ôh hŏng bruă knuă. Čang hmăng bi mâo sa hdră êlan đru lu hĭn kơ bruă mdrao mgŭn čiăng kơ phung knuă druh nai êa drao hơĭt ai tiê dôk ngă bruă, boh nik hlăm dŭm boh sang êa drao ti krĭng čư̆ čhiăng’.

          Klei ktrŏ mơ̆ng bruă knuă jing prŏng, ƀiădah prăk mlan lĕ ƀiă amâo mâo năng ôh hŏng ai tiê phung nai êa drao tuh êyuh, anei yơh jing mta phŭn ngă lu phung nai aê mdrao kbiă bruă leh ti lu alŭ wăl mkăn. Knŏng hjăn čar Quảng Nam, knŏng hlăm 6 mlan akŏ thŭn anei đuič mâo leh giăm 50 čô phung nai êa drao akâo mdei bruă. Bi ti krĭng čư̆ čhiăng, krĭn mnuih djuê ƀiă, ênoh phung nai aê mdrao mgŭn akâo đuĕ nao mă bruă hlăm krĭng dap mnai ăt lu mơh, mơ̆ng anăn yơh bruă mdrao mgŭn kơ mnuih djuê ƀiă ti čư̆ čhiăng hlăk lĕ hlăm klei dleh dlan. Mai Văn Mười, Khua knơ̆ng bruă sang êa drao gŭn čar Quảng Nam brei thâo, anôk bruă anei hlăk lŏ mkŏ mjing hrŏng ruah mnuih ngă bruă hlăm dŭm boh sang êa drao, mghaih msir klei dôk kƀah nai aê mdrao mgŭn ară anei:

“Hlăm wưng leh êgao, dhar bruă mdrao mgŭn mkŏ mjing leh klei bi lông iêo ruah mâo giăm 100 čô aê mdrao, lehanăn dŭm êtuh čô nai êa drao. Čar Quảng Nam ăt bi tuôm lehanăn mđĭai phung ayŏng adei, lehanăn tui hlue hŏng klei jing ti alŭ wăl srăng dăp bruă bi djŏ. Phung khua kiă kriê dŭm kdriêk čư̆ čhiăng ăt mđing hĭn mơh kơ anôk dôk, kơ phung nai êa drao mơ̆ng kbưi hriê mă bruă. Dhar bruă mdrao mgŭn hlăk mâo leh klei akâo kơ Êpul Gơ̆ng bruă ƀuôn sang čar kơ klei kƀah nai aê mdrao ti dŭm boh sang êa drao kdriêk. boh nik hlăm krĭng čư̆ čhiăng čiăng kơ knŭk kna mâo hdră êlan djŏ hĭn tĭng tla prăk mlan kơ phung nai êa drao”.

Bruă sang čư̆ êa lehanăn dŭm dhar bruă djŏ tuôm čar Quảng Nam čang hmăng êdi kơ knŭk kna pral mâo klei bhiăn, hră êlan hrŏng ruah, đru mdul kơ phung nai êa drao, čiăng dưi mđĭ ai lehanăn đru krơ̆ng digơ̆ lŏ dôk ngă bruă, boh nik hŏng phung nai aê mdrao ti dŭm krĭng dleh dlan taih kbưi, čư̆ čhiăng./.