Leh 2 mlan hriăm luê, ară anei, adei H’Trần Kbuôr, ti Ƀuôn Triêt, să Ea Kuêh, kdriêk Čư̆ Mgar, čar Dak Lak thâo luê leh mbĭt anăn thâo msir mghaih klei truh amâo jăk huĭ tăm mâo. H’Trần brei thâo, kyua mâo adŭ hriăm luê amâo liê prăk anei dưi mkŏ mjing hlăm sang hră snăn kâo mbĭt hŏng găp hơ̆k mơak nao hgŭm, hriăm luê hlăm grăp lam knăm tlâo lehanăn hruê êma grăp hruê kăm.

  “Adŭ hriăm jăk êdi, kâo čang hmăng hdră anei dưi mâo lu hĭn čiăng kơ ƀĭng găp dleh dlan mkăn ăt dưi hriăm luê msĕ kâo”.

Adŭ hriăm luê amâo liê prăk mơ̆ng Sang hră gưl sa Lý Tự Trọng bi hgŭm hŏng nai mtô Nguyễn Đình Ngư pŏk ngă, hŏng giăm 30 čô hđeh mâo klei hdĭp dleh dlan, mơ̆ng adŭ 2 truh kơ adŭ 5 nao hgŭm. Hriăm luê êjai, phung hđeh lŏ dưi ktrâo lač kơ hdră rơ̆ng klei êđăp ênang hlăm êa, hdră đru dŏng mjêč tơdah tăm mâo klei mngăt êa.

Atăt anak nao hriăm luê, Y - Lem Byă, ti ƀuôn Wing, să Ea Kuêh, kdriêk Čư̆ Mgar, brei thâo: Hlăm alŭ wăl să mâo lu ênao êa kyua anăn gŏ sang mđing uêñ mơh huĭ anak pô srăng nao hlăp tinăn, boh nik hlăm yan mdei prŏng. Hŏng klei hgŭm kngan mơ̆ng sang hră lehanăn nai mtô, phung hđeh mâo leh mmông hriăm jăk, mprăp lu klei thâo kơ pô.

 “Kâo hriăm luê tinei jăk êdi. Lač jăk kơ nai mtô, sang hră brei leh kơ kâo dưi hriăm luê. Thâo luê leh, tơdah nao kơ pưk hma mâo ênao êa snăn kâo thâo luê, thâo msir mghaih mơh klei amâo jăk huĭ tăm mâo”.

 Ti ƀuôn prŏng Ƀuôn Ama Thuôt lehanăn dŭm krĭng djiêu gah, hlăm wưng yan mdei prŏng mâo lu adŭ hriăm luê lehanăn ktrâo lač kơ hdră rơ̆ng klei êđăp ênang hlăm êa dưi mkŏ mjing. Nguyễn Thị Thúy Hiền, K’iăng khua ksiêm dlăng Sang dhar kreh êdam êra hđeh êlăk čar Dak Lak brei thâo, jih jang phung hđeh nao hriăm luê ti êpul êya hlăm yan mdei prŏng dưi dăp mmông hriăm luê lehanăn tui ksiêm dŭm klei hlăp lêñ hlăm êa.

 “Hmei srăng mkŏ mjing dŭm hdră čiăng kơ phung hđeh mưng lehanăn thâo kơ dŭm klei hlăp lêñ hlăm êa. Brei msir mghaih boh klei tal êlâo jing phung hđeh amâo lŏ huĭ kơ êa leh kơnăn mkŏ mjing dŭm hdră hlăp kơ phung hđeh lehanăn ngă msĕ snăn yơh hlăm wưng yan mdei prŏng.

 Bi ti dŭm krĭng taih kbưi mkăn hlăm čar, dŭm hdră “Hriăm luê amâo liê prăk”, “Brŏng êa mbĕ hiu”, dưi mkŏ mjing nanao, mâo leh klei mđing dlăng, sa ai mơ̆ng dŭm êpul, phung mâo ai tiê kmah.

Võ Tiến Tuấn Niê, Kơiăng khua Êpul bruă Đội čar Dak Lak brei thâo, mơ̆ng êlâo kơ yan mdei prŏng, bruă Đoàn čar, bruă Đội čar mâo leh hră mơar gĭt gai dŭm hdră bi mjĕ mjuk yan mdei prŏng truh kơ dŭm anôk bruă nah gŭ lehanăn êpul bruă đội dŭm kdriêk, wăl krah, ƀuôn prŏng. Hlăm anăn, mđing kơ dŭm hdră gang mkhư̆ klei êka êkeh, klei mngăt hlăm êa ti phung hđeh, bruă Đoàn čar ăt mkŏ mjing adŭ mtô bi hriăm klei thâo kơ mnuih mă bruă phung hđeh ti gưl nah gŭ, mtrŭt mjhar djăp klei găl mâo mkŏ mjing anôk hriăm luê mbĕ hiu, krơ̆ng kjăp adŭ mtô bi hriăm luê amâo liê prăk ti dŭm krĭng mnuih ƀuôn sang dôk.

 Ăt hluê si Tuấn, gang mkhư̆ klei êka êkeh lehanăn klei mngăt hlăm êa dưi mdưm leh hlăm hdră bruă yan mdei prŏng, mâo dŭm gưl mđing dlăng, bi mklă djăp ai dưi, klei mâo hlăm bruă anei.

 “Mơ̆ng akŏ mtam, leh mtrŭn hră mơar gĭt gai bruă anei, hmei gĭt gai kơ 100% ênoh kdriêk, wăl krah, bruă đoàn buôn prŏng srăng mkŏ mjing ƀiă êdi 1 boh adŭ mtô luê amâo liê prăk hlăm yan mdei prŏng anei. Klei ksiêm dlăng kluôm hlăm yan bhang anei snăn kluôm čar, kdriêk, wăl krah, ƀuôn prŏng srăng dưi mkŏ mjing hlăm brô 20 adŭ hriăm luê amâo liê prăk hŏng klei hgŭm mơ̆ng êbeh 1.000 čô hđeh”.

Ti čar Dak Lak ară anei mâo êbeh 500 êbâo čô hđeh, truh giăm 27% ênoh mnuih kluôm čar. Mơ̆ng akŏ thŭn 2024 truh kơ ară anei, ti čar mâo 25 čô hđeh djiê kyua mngăt êa, hlăm anăn lu jing klei mngăt êa hluê êpul 2,3 čô kơ dlông. Kyua anăn, bruă mtrŭt mđĭ hdră hriăm luê kơ phung hđeh brei mâo klei mđing dlăng lu hĭn, čiăng kơ phung hđeh dưi thâo luê, rơ̆ng klei êđăp ênang, thâo răng mgang pô lehanăn mnuih riêng gah tơdah tăm lĕ hlăm êa. Mơ̆ng anăn, đru bi hrŏ klei mngăt êa, čiăng kơ phung hđeh dưi mâo sa yan mdei prŏng jăk jĭn lehanăn êđăp ênang./.