Ti anôk myơr êrah mơ̆ng Anôk mkă dlăng, sang êa drao prŏng Lăn Dap Kngư, Nguyễn Trọng Tân (ƀuôn hgŭm Trường Xuân, čar Lâm Đồng) dôk guôn phung mâo êrah msĕ nao myơr êrah čiăng dŏng mdrao kơ mô̆ ñu. Ñu yăl dliê, mô̆ ñu ruă sang anak, lu blư̆ nao mkă dlăng ƀiădah aê mdrao lač brei mbŏ kơ asei mlei kyua kƀah êrah amâo  mâo dưi mbriah, ƀiădah mô̆ ñu mâo êrah hin dleh sơnăk mâo êrah mbŏ.

 “Aê mdrao lač brei mnuih hlăm sang hriêm yơr êrah, tơdah amâo mâo êran anăn srăng mlih, myơr êrah aê mdrao lač hlăm djiê amâo mâo êrah anăn ară anei bi mlih srăng dôk guôn. Dôk guôn êpul hgŭm bruă iêo mthưr hruê mbruê mâo sa čô, hruê anei lŏ mâo thiăm čô.”

Hlăm anôk mdrao mgŭn mơ̆ng anôk mdrao kơ hđeh, Đào Thị Mai ti ƀuôn hgŭm Ea Knôp, čar Dak Lak ba anak ñu mâo klei ruă mčah êrah mơ̆ng tian amĭ (Thalassemia) čiăng mbŏ êrah. Dăl hlăm 3 thŭn hŏng anei, grăp mlan 2 blư̆ ñu hŏng čô lŏ nao ti sang êa drao čiăng mbŏ 2 hnư êrah. Gưl anei, êrah kƀah hin, ñu knŏng čang guôn phung nao myơr êrah.

 “Mmông êmưt amâo mâo êrah ñu krăn jơ̆ng kngan, buk tian, wir kŏ. Kâo ba čô sa mlan sa blư̆ hriê ti Sang êa drao prŏng Lăn Dap Kngư. Wưng anei anei, sang êa drao kƀah hĭn êrah, kâo nao akâo êrah mơ̆ng phung neh ti Sang êdrao Y Dược hriê myơr êrah.”

Hluê si aê mdrao Đặng Việt Nam – Anôk mdrao kơ hđeh, Sang êa drao prŏng Lăn Dap Kngư, ară anei anôk bruă dôk mdrao kơ hrăm brô 100 čô hđeh mčah êrah mơ̆ng tian amĭ. Kah knar sa čô hđeh čiăng mbŏ êrah 1 – 1 mlan mkrah sa blư̆, mâo pô ruă kjham mbŏ mơ̆ng 2 – 3 blư̆ hlăm sa hruê kăm. Grăp gưl, hlăm brô 40 – 50 čô hđeh čiăng mbŏ êrah, lu phung hđeh mbŏ mơ̆ng 2 – 3 hnơ̆ng êrah, knar hŏng giăm 1 lit êrah.

“Klei čiăng kơ êrah lu ƀiădah amâo mâo êrah. Amâo djŏ sa čô hđeh mbŏ sa hruh ƀiădah mâo hđeh mbŏ 2 – 3 hruh. Kyuadah ênoh phung hđeh mơ̆ng 10 thŭn kơ dlăng lu kg, hnơ̆ng êrah mbŏ ăt lu msĕ mơh. Klă sĭt klei čiăng kơ êrah ară anei jing lu êdi.”

Kah knar grăp mlan, dŭm sang êa drao ti alŭ wăl čar Dak Lak čiăng giăm 2.000 hnư êrah čiăng dŏng mdrao leh anăn mdrao mgŭn, hlăm anăn Sang êa drao prŏng Lăn Dap Kngư mâo lu hĭn. Anôk bruă ksiêm kơ êrah leh anăn mbŏ êrah čiăng ƀiă êdi 500 hnơ̆ng êrah mkăp čoăng mdrơ̆ng hŏng boh klei mjêč. Ƀiădah mơ̆ng akŏ mlan 7 truh kơ ară anei, hnơ̆ng êrah amâo mâo djăp, ngă kơ klei kƀah êrah jing kjham hĭn.

Ti anăp boh klei êrah mkăp kơ klei dŏng mdrao leh anăn mdrao mgŭn ti dŭm anôk mdrao mgŭn kƀah kjham, bruă sang čư̆ êa čar Dak Lak mâo leh hră mtrŭt brei mđĭ hĭn bruă mtrŭt mjhar klei myơr êrah. Mbĭt hŏng anăn, Sang êa drao prŏng Lăn Dap Kngư ăt mâo hră hưn iêo mthưr mnuih ƀuôn sang nao hgŭm myơr êrah. Aê mdrao H’Nương Niê – khua anôk mkă dlăng, Sang êa drao prŏng Lăn Dap Kngư brei thâo:

“Anôk bruă ăt hưn mdah hŏng Êpul khua kiă kriê čiăng mâo dŭm hdră êlan, tal êlâo hĭn anôk bruă srăng mă êrah ti anôk bruă mơ̆ng knăm 1 truh knăm 5 leh anăn mă wăt yang hruê dơ̆ng, tal dua jing bi mguôp hŏng anôk bruă ksiêm duah êrah, mbŏ êrah čiăng mtrŭt mjhar klei myơr êrah, tal tlâo jing iêo mthưr jih jang phung đoàn viên công đoàn hlăm sang êa drao myơr êrah. Ară anei ăt mâo leh mơh hnơ̆ng êrah dŏng mdrao ti sang êa drao”.

Klei hmao nao hgŭm mơ̆ng bruă sang čư̆ êa, bruă mdrao mgŭn leh anăn yang ƀuôn jing mta phŭn bi klă čiăng rơ̆ng klei hdĭp kơ dŭm êtuh čô ruă. Grăp hnư êrah myơr amâo djŏ knŏng đru kơ klei kjham ti anăp ƀiădah lŏ jing bruă ngă siam bi lar ai tiê thâo kah mbha hlăm yang ƀuôn.