Hlăm wưng giăm anei, Adŭ mdrao klei ruă kluôm ti phung hđeh Sang êa drao prŏng krĭng lăn dap kngư kreh tŭ mdrao dŭm pluh čô ruă jing hđeh ruă jơ̆ng kngan ƀăng êgei. Hoàng Thị Chuyên ti să Dak Liêng, čar Dak Lak mâo čô êkei 4 thŭn dôk mdrao tinei brei thâo, êlâo adih gŏ sang hưn ĕ êngoh hlơr, jơ̆ng kngan bŭk êa, blei êa drao dul êngoh ƀiădah mnăm amâo lưh. Snăn gŏ sang ba ĕ ti sang êa drao mdrao mgŭn.

 “Ĕ êngoh hlơr, tăp năng bi kñhăk. Amâo mâo huă ƀơ̆ng, mnăm êa ôh, ruă anăn ĕ hia nanao, jơ̆ng kngan bŭk êa gơ̆ ruă, bi mnăm êa drao ƀlĕ ô̆ mơh, pĭt nanao yơh. Kâo ăt huĭ mơh.

Amai H’Duyên Byă, să Čư Pui, čar Dak Lak mâo anak êkei ruă jơ̆ng kngan ƀăng êgei dôk mdrao ti Adŭ mdrao klei ruă kluôm ti phung hđeh Sang êa drao prŏng krĭng lăn dap kngư êbeh 1 hruê kăm anei, brei thâo:

 “Hriê đih mdrao ti sang êa drao 8 hruê leh lehanăn ĕ dưi ƀiă mơh. Dŭm hruê êlâo ĕ êngoh hlơr nanao, amâo dưi huă ƀơ̆ng ôh, kyua hlăm ƀăng êgei kplač jih.

Aê mdrao Lê Thị Bích Phượng, Adŭ mdrao klei ruă kluôm ti phung hđeh Sang êa drao prŏng krĭng lăn dap kngư brei thâo, mơ̆ng akŏ mlan 3, ênoh phung hđeh ruă jơ̆ng kngan ƀăng êgei hriê đih mdrao lu, mâo hruê truh d ŭm pluh čô. Boh tŭ ksiêm mkă dlăng brei ƀuh mâo hđeh djŏ mta Enterovirus 71 — jing kman virus ktang, kreh ba lu klei truh kjham, boh nik hŏng hđeh gŭ 5 thŭn.

 “Thŭn anei hluê si hdră ksiêm dlăng mơ̆ng Sang êa drao, kâo ƀuh mâo lu hđeh djŏ kman EV 71. Kman anei ngă êngoh hlơr, huĭ srăng ba lu klei truh amâo jăk hlăm kŏ dlô, êlan bi êwa. Phung hđeh mâo klei bi êdah êngoh hlơr nanao, kdjăt. Mâo phung hđeh kjham hĭn hĭn bi kñhăk, bi êwa pral.

Amâo djŏ knŏng klei ruă jơ̆ng kngan ƀăng êgei đĭ, klei ruă êngoh bi ƀlĕ êrah lehanăn čut ti phung hđeh ăt mâo klei bi êdah đĭ lu. Ti să Êa Riêng mâo leh sa anôk bluh mâo klei ruă čut hlăm sang hră hŏng 26 čô hđeh ruă. Ti anăp klei mâo anei, anôk bruă mdrao mgŭn Dak Lak mjêč čuăl krĭng, msir mghaih anôk mâo klei ruă mbĭt anăn pŏk hdră msir kñăm ksiêm dlăng klei đĭ lar. Trương Thị Ngân, knuă druh anôk bruă mdrao mgŭn să Êa Riêng, čar Dak Lak, brei thâo:

 “Anôk bruă mdrao mgŭn tiŏ nao leh knuă druh truh ti krĭng mâo klei ruă čiăng mdjiê kman, bi mdoh wăl hdĭp mda, mbĭt anăn ktrâo lač kơ mnuih ruă bi ktlah ti sang, hluê ngă hdră ksiêm dlăng, mdrao mgŭn.

Mơ̆ng akŏ thŭn truh kơ ară anei, Dak Lak mâo leh 5 anôk mâo klei ruă jơ̆ng kngan ƀăng êgei hŏng hlăm brô 700 čô ruă ti lu alŭ wăl; 26 anôk mâo klei ruă čut lehanăn giăm 600 čô mâo klei ruă êngoh bi ƀlĕ êrah, đĭ mkă hŏng wưng anei thŭn êlâo. Čiăng ksiêm dlăng boh klei, Aê mdrao Hoàng Hải Phúc, Khua anôk bruă ksiêm dlăng klei ruă tưp čar Dak Lak, brei thâo:

 “Hmei čih mkra hdră kčah đru kčĕ kơ Knơ̆ng bruă mdrao mgŭn čar Dak Lak čiăng pŏk hdră msir bi knar kñăm ksiêm dlăng, mkhư̆ klei ruă đĭ lar ti lu anôk. Boh nik, hmei mkŏ mjing leh êpul ksiêm dlăng, ktrâo lač, mtô mblang kơ mnuih ƀuôn sang mđĭ klei thâo săng gang mkhư̆ klei ruă. Mbĭt anăn, mkăp êa drao mdjiê kman hlăm wăl hdĭp mda, gang mkhư̆ klei ruă mơ̆ng ưm, mơ̆ng kbưi mtam.

Ti anăp klei mâo dleh dưi ksiêm dlăng mơ̆ng klei ruă ti phung hđeh, bruă pral gang mkhư̆, hnưm hmao ƀuh lehanăn mdrao djŏ guôp mâo bruă klam yuôm bhăn kñăm bi hrŏ klei truh jhat lehanăn gang mkhư̆ klei đĭ lar. Mbĭt hŏng klei gĭr mơ̆ng anôk bruă mdrao mgŭn, grăp gŏ sang brei mđĭ klei thâo săng bi mdoh, răng mgang klei suaih pral hđeh, mơ̆ng anăn hrăm mbĭt ksiêm dlăng tŭ dưn klei ruă, răng mgang klei suaih pral kơ êpul êya./.