Kriê dlăng anak dôk đih mdrao klei ruă tưp ngă kơ dlô ti Sang êa drao prŏng krĭng Lăn Dăp Kngư, amai H’Phen Ƀuôn Yă, ti kdriêk Krông Pač, čar Dak Lak brei thâo, mơ̆ng hruê mă hră bi klă anak mâo klei ruă tưp ngă kơ dlô, amai rŭng răng êdi kyua pô amâo mâo thâo klă kơ klei ruă anei. Ăt hluê si amai H’Phen, êjai anak mâo klei ruă, ĕ êngoh hlơr dŭm hruê, mnăm êa drao kăn lưh êngao lei, leh ba nao mdrao ti sang êa drao Prŏng kơh thâo ĕ mâo klei ruă tưp ngă kơ dlô. Dlăng anak grăp hruê bi êwa hŏng masin, amai ƀuh hƀlŏk êdi kyua ngă ngơi mang hlăm bruă tlŏ mgang vaccine kơ anak:

   “Grăp čô anak pô nao tlŏ mgang mă krah dưh, kyua pô nao mă bruă mtŭl mtul amâo mâo lŏ mĭn. Pô amâo thâo ôh klei ruă anei si ñu kjham, ară anei kơh thâo. Ară anei amâo thâo bĭt mjing ôh, knŏng dôk dlăng ñu đih msĕ sơnăn leh anăn hea đuč.”

Hluê si Aê mdrao thơ̆ng kơ mta mdrao II Hoàng Ngọc Anh Tuấn – Pô kiă anôk mdrao krŭ wĭt ai ktang, dŏng mdrao hđeh – anak ĭ, sang êa drao prŏng krĭng Lăn Dăp Kngư, mbĭt hŏng hđeh êkei dôk đih mdrao klei ruă ngă kơ dlô ti anôk mdrao, êlâo kơnăn hlăm brô 10 hruê, anôk mdrao ăt tŭ mdrao kơ sa čô hđeh mâo klei bi knăl klei ruă tưp ngă kơ dlô, hđeh anăn ăt dưi bi klă leh anăn nao ba mdrao ti ƀuôn prŏng Hồ Chí Minh, leh anăn ăt mâo boh tŭ bi klă mâo klei ruă tưp ngă kơ dlô.,

Ăt hluê si Aê mdrao Hoàng Ngọc Anh Tuấn, grăp thŭn, ti čar Dak lak mâo 1;2 čô ruă, ƀiădah hlăm sa mlan mâo 2 čô ruă kjham msĕ sơnăn hlăm 6 mlan êgao jing klei amâo jăk tuôm mâo ôh. Aê mdrao Hoàng Ngọc Anh Tuấn lač, êjai djŏ klei ruă ngă kơ dlô, hđeh kreh mâo klei bi knăl msĕ si êngoh hlơr, ruă kŏ, čiăng blĕ ô̆, leh anăn bi hrŭt, êwiên leh anăn mâo klei amâo mâo jăk êmăn, kmlư, klei mĭn amâo mâo mngač, hwăt. Tơdah ƀuh leh anăn mdrao mgŭn hnưm, bruă mdrao mgŭn srăng ênưih hĭn.

 “Bi hŏng klei ruă tưp ngă kơ dlô mâo 4 gưl, sa jing gưl kjham hĭn, mnuih ruă gưl anei djiê hmar êdi, tal 2 jing gưl dleh mdrao, hnơ̆ng dưi mdrao mgŭn ăt mâo, ƀiădah ăt mâo klei hmăi amâo mâo jăk mơ̆ng 50% kơ dlông, hnơ̆ng truh klei djiê mơ̆ng gưl anei ăt lu êdi. Bi sa gưl mkăn jing gưl hdjul, gưl anei dưi hlao hmar. Yăng đar phung hriê mdrao tinei jing hđeh ruă gưl dleh mdrao, kyuanăn gĭr mdrao mgŭn tŭ jing ƀiădah hnơ̆ng klei amâo mâo jăk ăt 50 – 50. Klei amâo mâo jing phung hđeh luč klei mĭn, klei hmăi hlăm aruăt êrah dlô, hđeh kreh bi hrŭt asei mlei leh anăn srăng mdrao mgŭn jih klei hdĭp.”

Hluê si Aê mdrao Lê Phúc – k’iăng khua kiă kriê anôk bruă ksiêm dlăng klei ruă tưp čar Dak Lak, klei ruă tưp ngă kơ dlông jing sa mta klei ruă tưp lar mơ̆ng klei kêč kĕ. Klei ruă mâo hlăm kluôm thŭn leh anăn tưp lar hĭn hlăm yan hjan, kreh tuôm hŏng phung hđeh ti gŭ 15 thŭn. Ŭn leh anăn čĭm čap jing phŭn mâo kman lu hĭn mơ̆ng klei ruă anei.

 “Hlăm bruă gang mkhư̆ klei ruă tưp ngă kơ dlô, tal sa srăng srăng bi rai jih anôk kêč mboh, kêč bi tưp kman anei srăng mâo hlăm giăm sang, hlăm dŭm anôk bhĭt srăng jah waih hĕ jih, êlan mnuôr êa ăt bi hluh brei doh, amâo brei mâo anôk kơ kêč mbloh. Tal 2 jing brei lui hĕ klei mưng rông mnơ̆ng giăm sang, kêč ƀloh dôk giăm sang nao kĕ ŭn leh anăn bi tưp klei ruă kơ mnuih. Bi kơ kêč srăng dưi krih êa drao, pĭt kă mŭng čiăng bi hrŏ klei kêč kĕ. Boh klei mkăn jing srăng tlŏ mgang vaccine, ară anei klei ruă tưp ngă kơ dlô ka mâo êa drao mdrao tŭ dưn hĭn, ƀiădah mâo leh tŭ dưn”.

Hluê si phung thơ̆ng kơ bruă, klei ruă tưp ngă kơ dlông srăng bi mâo lu klei amâo mâo jăk êjai hđeh mâo klei ruă, kyuanăn, mtă kơ mnuih ƀuôn sang srăng ba anak pô tlŏ mgang vaccine gang mkhư̆ klei ruă hluê si ênuk thŭn. Tơdah hđeh mâo klei êngoh hlơr, ruă kŏ, blĕ ô̆, bi hrut asei mlei…ba mtam hđeh anăn kơ sang êa drao čiăng mkă dlăng, hmao ƀuh leh anăn mdrao mgŭn.