Găn êbeh 40km nao ti sang mnia mblei prŏng ti ƀuôn prŏng Ƀuôn Ama Thuôt čiăng blei mnơ̆ng yua tết, amai Võ Thị Diệu Hương ti kdriêk Krông Pač brei thâo, amai gĭr hriê blei mnơ̆ng yua tết kbưi msĕ sơnăn kyua ka mâo ôh klei hơĭt hŏng mnơ̆ng dhơ̆ng duah bi čhĭ lu hlăm anôk mnia mblei:

 “Mnơ̆ng dhơ̆ng hlăm sang mnia mblei prŏng ñu lu jơr, lu mta leh anăn ñu sa anôk, pô dưi duah blei mnơ̆ng jăk hĭn. Leh anăn ti sang mnia prŏng ăt ƀuh mâo klei hơĭt hĭn kơ hnơ̆ng tŭ jăk mnơ̆ng dhơ̆ng kyua hlăm tač êngao ăt hŭi kơ mnơ̆ng amâo mâo jăk, mnơ̆ng mgưt, kyuanăn hriê blei mnơ̆ng tinei.”

Ăt nao mơ̆ng ưm čiăng blei dŭm mta mnơ̆ng Tết, Amai Nguyễn Thị Mai Hương ti ƀuôn hgŭm Ea Tam, ƀuôn prŏng Ƀuôn Ama Thuôt lač, hlăm wưng anei mâo lu mmông čiăng kơ pô ruah, dlăng klă mnơ̆ng dhơ̆ng, ñĕ kơ klei blei djŏ mnơ̆ng mgưt:

 “Bi hŏng anôk čhi mnia mnơ̆ng dhơ̆ng tết, kâo ƀuh jing lu jơr leh anăn lu mta, ênoh ênil ăt lu mta mơ̆ng êlưih truh kơ yuôm. Klei čuăn blei mnơ̆ng dhơ̆ng mơ̆ng gŏ sang kâo grăp thŭn jing blei mnơ̆ng siam leh anăn mnơ̆ng tŭ jăk. Kâo hmăng hmưi dŭm anôk bruă djŏ tuôm bi klă kơ klei doh êƀăt mnơ̆ng ƀơ̆ng huă lu hĭn čiăng hmei hơĭt hĭn”.

Mkăp brei mnơ̆ng dhơ̆ng hlăm wưng Tết Nguyên Đán Giáp Thìn thŭn anei, dŭm knơ̆ng bruă, phung mkăp mnơ̆ng dhơ̆ng ti čar Dak Lak čŏng mkăp brei mnơ̆ng dhơ̆ng, bi klă klei kuôl kă ƀuăn hŏng phung mkăp brei mâo klei đăo knang čiăng rơ̆ng kơ hnơ̆ng tŭ jăk. Amai Nguyễn Thị Em, dôk čhĭ mnia ti êlan dơ̆ng Nguyễn Tất Thành, ƀuôn hgŭm Tân Lợi, ƀuôn prŏng Ƀuôn Ama Thuôt brei thâo:

 “Lač sĭt sang mnia pô ăt mâo kơhưm hlăm anôk mnia mblei leh, kyuanăn mnơ̆ng dhơ̆ng mă ba čhĭ jing klă êdi, grăp mnơ̆ng dhơ̆ng mâo hnơ̆ng tŭ jăk, mâo tem, hră mơak klă, mmông anei bi ktưn hŏng dŭm sang mnia mblei prŏng lu, kyuanăn pô čiăng mâo kơhưm kơ hnơ̆ng tŭ jăk kơh dưi iêo jak phung tuê blei mnơ̆ng pô.”

Kñăm rơ̆ng kơ klei doh êbăt mnơ̆ng ƀơ̆ng hlăm wưng êlâo, hlăm leh anăn êdei Tết Nguyên Đán, čar Dak Lak mtă kơ dŭm anôk bruă djŏ tuôm mđĭ hĭn bruă rơ̆ng kơ klei doh êbăt mnơ̆ng ƀơ̆ng, leh anăn gĭt gai dŭm anôk bruă, alŭ wăl ngă klei ksiêm duah, ksiêm dlăng, ƀuah mkra klei mkra mjing, čhĭ mnia mnơ̆ng mgưt, mnơ̆ng amâo mâo jăk. Dŭm bruă hâo hưn hlăm čar dưi mtrŭt mđĭ čiăng đru kơ phung mkra mjing, mnia mblei mnơ̆ng ƀơ̆ng huă thâo klă bruă klam hlăm bruă rơ̆ng kơ klei doh êƀăt mnơ̆ng dhơ̆ng, mbĭt anăn đru kơ phung blei ba yua thâo săng čiăng blei dŭm mta mnơ̆ng dhơ̆ng jăk kơ klei suaih pral. Hoàng Văn Nghĩa, k’iăng khua bruă ksiêm duah knơ̆ng bruă lŏ hma leh anăn mđĭ kyar krĭng ƀuôn sang čar Dak Lak brei thâo:

 “Hmei kñăm ksiêm dŭm mta mnơ̆ng dhơ̆ng phŭn kơ Tết nguyên đán anăp anei msĕ si ƀear, kpiê, bêñ kẹo, kđeh čĭm leh anăn dŭm mta mnơ̆ng mơ̆ng kđeh čĭm, djam mtam. Hŏng klei ksiêm dlăng srăng hmao ƀuh dŭm klei ngă soh hŏng klei čuăn doh êbăt mnơ̆ng dhơ̆ng leh anăn hmei ktang phĭt mgaih msir phung ngă soh. Hŏng bruă ksiêm dlăng srăng hâo hưn kơ dŭm anôk mkra mjing, mnia mblei dŭm mta mnơ̆ng dhơ̆ng mơ̆ng mnơ̆ng mkra mjing truh kơ mnơ̆ng dhơ̆ng ba čhĭ srăng djŏ hŏng hdră bhiăn 1 êlan hluê si klei čuăn klei doh êbăt mnơ̆ng ƀơ̆ng.”

Klei nao hgŭm hur har mơ̆ng dhar bruă djŏ tuôm jing tur knơ̆ng čiăng rơ̆ng kơ klei doh êbăt mnơ̆ng dhơ̆ng hlăm wưng tết dơ̆ng truh. Khădah sơnăn, mnuih ƀuôn sang ăt čiăng ngă msĕ hŏng klei mtă mơ̆ng dŭm anôk bruă djŏ tuôm, knŏng blei leh anăn yua dŭm mnơ̆ng ƀơ̆ng thâo klă phŭn agha, dlăng kơ hruê yua, klei hưn hlăm mnơ̆ng dhơ̆ng./.