Hluê hdră hưn mơ̆ng êlâo, amai Nguyễn Thị Diễm Thương, alŭ Dak Kual 2, să Dak Ndrung atăt anak giăm 6 mlan truh kơ Anôk mdrao mgŭn să tlŏ aruăt tal 3 vaccine 5 hlăm 1 gang mkhư̆ klei ruă buôr čuh kô̆ kŏng đŏk, mtŭk ƀhiêt, hrut aruăt ariêng, êwiên lehanăn ruă ksŏ, ruă dlô kyua kman Hib ngă. Amai brei thâo, anak amei tlŏ djăp ênŭm kyua anăn ĕ đĭ prŏng suaih pral.

“Knuă druh mdrao mgŭn hưn hruê tlŏ kơ pô lehanăn 1 hruê êlâo kơ tlŏ digơ̆ lŏ hưn mơh kơ pô. Dlăng phung hđeh ară anei mdê hŏng êlâo, klei ruă amâo thâo êlâo ôh kyua anăn drei tlŏ mgang yơh čiăng mkhư̆ klei ruă kơ phung anak čô.

        Ăt msĕ hŏng amai Nguyễn Thị Diễm Thương, kyua dưi mtô mblang kơ klei tŭ dưn mơ̆ng bruă tlŏ mgang, khădah sang kbưi hŏng anôk mdrao mgŭn, găn êrô dleh dlan ƀiădah amai Thị Bân ti alŭ Bu N’drung, să Dak Ndrung, kdriêk Dak Song ăt nao tlŏ ênŭm kơ 3 čô anak:

“Tlŏ djăp ênŭm yơh kơ phung anak čiăng h’ĭt ai tiê pô. 3 čô anak sang kâo, amâo mâo êdeh kâo êbat jơ̆ng nao tlŏ diñu. Hlăk dôk ba tian kâo tlŏ ênŭm mơh.

        Dak Song jing sa hlăm dŭm alŭ wăl ba akŏ hlăm hdră tlŏ mgang ti Dak Nông. Hluê si Nguyễn Văn Sơn, Anôk bruă mdrao mgŭn kdriêk Dak Song, čiăng mjing klei đăo knang kơ mnuih ƀuôn sang, Anôk bruă mđĭ leh hdră gĭt gai dŭm êpul êya bruă mtô mblang mđĭ klei thâo săng mbĭt anăn ksiêm dlăng, bi kjăp dŭm klei găl kơ anôk bruă nah gŭ, kdrăp mnơ̆ng, vaccine, rơ̆ng klei êđăp ênang êjai tlŏ mgang…  Hlăm dŭm hruê tlŏ mgang, Anôk bruă ăt kah mbha phung knuă druh ksiêm dlăng čiăng kơ anôk bruă mdrao mgŭn hluê ngă djŏ hdră tlŏ mgang:

“Mơ̆ng knhal jih thŭn, hmei bi hgŭm hŏng alŭ ksiêm dlăng grăp čô hđeh, tal 2 ksiêm dlăng ti phần mềm hmei kriê dlăng leh jăk hdră anei. Hlăm phần mềm mâo leh klei hâo hưn klă klơ̆ng, mâo dŭm čô dưi hriê gơ̆ jăk găl mơh, bi hlei pô amâo dưi hriê tinei hmei srăng jao kơ knuă druh alŭ lŏ ksiêm dlăng pô anăn mâo ti alŭ wăl mơ̆ amâo dah h’aĭ čiăng pral thâo hlei pô ka tlŏ, tlŏ ka ênŭm aruăt kñăm lŏ pŏk hdră tlŏ mgang rơ̆ng jih jang phung hđeh dưi mâo djăp ai bi kdơ̆ng hŏng klei ruă”.

        Huỳnh Thanh Huynh, K’iăng khua knơ̆ng bruă mdrao mgŭn čar Dak Nông brei thâo, khădah bruă tlŏ mgang kpăk gun kyua hmăi mơ̆ng klei ruă Covid 19 hlăm 2 thŭn êgao, ƀiădah mơ̆ng klei bi hgŭm kjăp, klei đua klam mơ̆ng jih anôk bruă kđi čar, klei sa ai mơ̆ng mnuih ƀuôn sang kyua anăn hnơ̆ng luôm vaccine hlăm hdră pŏk mlar mơ̆ng čar dưi mâo leh klei tŭ dưn. Jih 3 mlan gưl 3 thŭn 2022, hnơ̆ng tlŏ vaccine pŏk mlar mơ̆ng kluôm čar mâo 70% hdră kčah. Hlăm 3 mlan knhal jih thŭn, čar gĭr mâo 90% hnơ̆ng luôm dŭm mta vaccine. Hluê si Huỳnh Thanh Huynh, ară anei Dak Nông dôk krơ̆ng kjăp 150 anôk bruă tlŏ mgang h’ĭt kjăp lehanăn srăng pŏk thiăm anôk tlŏ mgang mbĕ hiu tơdah čiăng. Anôk bruă mdrao mgŭn ăt mprăp djăp mnuih mă bruă, kdrăp mnơ̆ng, êa drao gŭn čiăng rơ̆ng hdră tlŏ mgang tŭ dưn, êđăp ênang.

“Knơ̆ng bruă mdrao mgŭn gĭt gai lehanăn nao kơ dŭm alŭ wăl lŏ ksiêm dlăng čiăng bi mklă hdră tlŏ mgang. Tal dua, leh ksiêm dlăng hmei srăng bi hgŭm hŏng anôk bruă mdrao mgŭn lehanăn bruă sang čư̆ êa alŭ wăl čiăng mkŏ dăp anôk tlŏ mgang djŏ guôp hŏng mnuih ƀuôn sang čiăng digơ̆ nao tlŏ mgang găl ênưih, wăt kơ hruê lehanăn mmông, si tô hmô, tơdah digơ̆ nao hma knhal jih hruê kăm wĭt, hmei srăng bi hgŭm hŏng mnuih mâo k’hưm hlăm êpul êya, mđĭ ai ayŏng adei dưi tlŏ mgang ti sang mtam”.

        Dŭm klei gĭr hlăm hdră tlŏ mgang pŏk mlar ti Dak Nông ƀrư̆ ƀrư̆ mđĭ leh hdră dlăng kriê klei suaih pral, gang mkhư̆ klei ruă huĭ hyưt hlăm êpul êya mnuih ƀuôn sang dôk, đru bi hrŏ klei kpĭ nao ksiêm mkă dlăng, mdrao klei ruă kơ anôk bruă mdrao mgŭn./.