Dôk mdrao klei ruă prôč lehanăn mâo lu mta mmih hlăm asei mlei ti Adŭ mdrao klei ruă hlăm asei mlei mơ̆ng Anôk bruă mdrao mgŭn kdriêk Krông Ƀŭk,  amai H’Pôč M’Jâo, ƀuôn Adrơ̆ng Prŏng, să Čư̆ Pơ̆ng, brei thâo, anei jing gưl tal 2 hlăm thŭn anei ñu nao đih mdrao. Jih 2 blư̆ amai ƀuh h’ĭt ai tiê kyua phung nai aê mdrao tinei jih ai tiê dŏng mdrao.

 “Phung nai aê mdrao mđing dlăng êdi kơ mnuih ruă. Đih mdrao tinei amâo mđing uêñ lu ôh, kyua ară anei kâo dưi leh”.

Ti djiêu jhưng đih amai H’Pôč, ayŏng Y-Thế Niê, ƀuôn Êa Brơ, să Čư̆ Pơ̆ng, kdriêk Krông Ƀŭk, dôk mdrao klei ruă ksŏ. Ayŏng ruă giăm 1 mlan hŏng anei, tal êlâo ñu mdrao ti wăl krah Ƀuôn Hô, êdei kơnăn akâo wĭt mdrao ti Anôk bruă mdrao mgŭn kdriêk Krông ƀŭk. Leh 4 hruê mdrao, klei ruă ayŏng dul leh.

 “Tinei doh êdi, aê mdrao jih ai tiê dŏng mdrao, êa drao tinei djăp ênŭm mơh mkă hŏng sang êa drao Ƀuôn Hô. Ară anei suaih leh, mgi dưi wĭt yơh”.

Hluê aê mdrao Y-Păm Ayŭn, Khua adŭ mdrao klei ruă hlăm asei mlei, Anôk bruă mdrao mgŭn kdriêk Krông Ƀŭk, 2 mlan hŏng anei, hlăk Anôk bruă bi leh klei kuôl kă blei êa drao, ênoh mnuih ruă hriê mdrao ƀrư̆ hruê ƀrư̆ đĭ, mâo hruê lu êdi mnuih:

 “Mơ̆ng mlan 4 truh kơ mlan 7 kƀah êa drao, lu mnuih ruă hriê mdrao amâo mâo êa drao diñu lŏ nao mdrao ti anôk mkăn. Ƀiădah mơ̆ng mlan 9 truh kơ mlan 10 êa drao lu. Mkă hŏng ênoh čuăn akŏ thŭn hŏng hnơ̆ng Knơ̆ng bruă mdrao mgŭn jao snăn mâo djŏ hruê mnuih ruă hriê mdrao đĭ lu êdi. Yang đar arăng blei 25 jhưng, ƀiădah mâo hruê truh 27 - 28 čô ruă.

Ti krĭng nah Dưr čar Dak Lak, kah knar grăp thŭn, Anôk bruă mdrao mgŭn Krông Ƀŭk tŭ mă lehanăn mdrao hlăm brô 5.700 čô ruă. Klei ruă Covid 19 dôk bluh mâo, Anôk bruă dưi ba yua čiăng dŏng mdrao kơ 3.500 čô ruă Covid 19 ti dŭm kdriêk Krông Ƀŭk, Ƀuôn Hô, Krông H’Nang lehanăn Êa Hleo. Leh bluh mâo klei ruă, msĕ hŏng lu anôk bruă mdrao mgŭn alŭ wăl mkăn, Anôk bruă mă bruă dleh dlan kyua kƀah êa drao lehanăn mnơ̆ng yua kơ hdră mdrao mgŭn. Khă snăn, hŏng dŭm klei gĭr amâo mdei, mlan 9 leh êgao, Krông Ƀŭk hluê ngă leh klei kuôl kă blei êa drao, jing sa hlăm ƀiă êpul bruă ti Dak Lak dưi msir mghaih klei dleh dlan hlăm bruă kƀah êa drao lehanăn mnơ̆ng yua kơ bruă ksiêm mkă dlăng klei ruă. Trần Thuận, Khua anôk bruă mdrao mgŭn kdriêk Krông Ƀŭk brei thâo:

 “Anôk bruă čih mkra leh sa hdră kčah, tal sa jing mđĭ klei thâo êpul mă bruă, tal 2 jing si srăng ngă čiăng mâo djăp êa drao, mnơ̆ng yua mdrao mgŭn kơ mnuih ƀuôn sang, tal 3 jing mâo dŭm êpul nao mă bruă hŏng dŭm să, alŭ, ƀuôn snăn hluê hŏng anăn pô bi mguôp hưn mthâo kơ anôk bruă pô mâo ênŭm leh êa drao, mnơ̆ng yua dlăng kriê dlăng klei suaih pral hlăm alŭ wăl snăn srăng mâo lu mnuih hriê mdrao kơ anôk bruă pô”.

Hŏng klei gĭr msir mghaih klei dleh dlan mơ̆ng êpul knuă druh, phung nai aê mdrao, dŭm thŭn giăm anei, hnơ̆ng tŭ jăk hdră ksiêm mkă dlăng, mdrao klei ruă mơ̆ng Anôk bruă mdrao mgŭn kdriêk Krông Ƀŭk ƀrư̆ hruê dưi mkra mđĭ klă sĭt, ênoh mnuih hriê mdrao đĭ lu. Anôk bruă năng jing anôk jưh knang kjăp hlăm hdră dlăng kriê klei suaih pral kơ mnuih ƀuôn sang djuê ƀiă ti alŭ wăl./.