Dôk kar êrah đru kơ boh ƀleh ti sang êa drao prŏng Thiện Hạnh, sa čô ruă ti čar Dak Lak jing ayŏng Y Mêk Siu, ti ƀuôn Tung Cŭ, să Ea Ral, kdriêk Ea H’Leo, čar Dak Lak brei thâo, ñu dôk mdrao tinei mâo leh 6 mlan, kah knar grăp mlan bi liê mơ̆ng 5 – 8 êklăk prăk hluê si dŭm blư̆ pô kar êrah. Klei hdĭp gŏ sang dleh dlan ƀiădah ayŏng Y Mêk amâo mâo thâo nao mdrao ti sang êa drao prŏng Lăn Dap Kngư, kyua tinăn amâo mâo djăp kdrăp masin. Asei mlei awăt, gŏ sang dleh dlan ngă kơ gŏ sang ayŏng lĕ hlăm klei dleh dlan hĭn:

“Klei hdĭp gŏ sang dleh dlan, anak čô dôk đơ điêt, nao sang hră. Amĭ ama mô̆ brei 3 4 sao lăn, ƀiădah amâo mâo êa krih, kyuanăn knŏng thâo pla hbei ƀlang đuč. Kâo mĭn êla mâo prăk lŏ nao kar êrah, amâo mâo lui yơh. Klei ruă anei arăng mâo lu prăk đa đa kăn dưi tŭ leh, bi pô ƀai hĭn êjai.”

Sa hruê kăm 2 – 3 blư̆ mdiăng mô̆ êbeh 80km nao ti sang êa drao Prŏng Lăn Dap Kngư čiăng kar êrah, Y Nhanh, ti ƀuôn Jari, să Dak Mol, kdriêk Dak Song, čar Dak Nông brei thâo, dŭm sang êa drao knŭk kna ti Dak Nông leh anăn Dak Lak amâo mâo mdrao kyua kƀah masin, kyuanăn ñu knŏng thâo ba mô̆ nao ti sang êa drao êngao knŭk kna čiăng kar êrah. Êngao kơ dŭm hruê ba mô̆ nao sang êa drao, ñu lŏ kreh hnêč nao mă bruă mưn čiăng mâo prăk mdrao kơ mô̆:

“Nao mdrao ti sang êa drŏng krĭng hlăk mlan 4 thŭn 2023, kar êrah tinăn 3 blư̆ phung êa mdrao lač êgao hnơ̆ng đei, amâo mâo masin kar êrah kyuanăn phung aê mdrao mơ̆ng sang êa drao krĭng ba hră mơar kơnei mơ̆ng mlan 11/2-23. Gŏ sang dleh dlan, grăp mlan tla 6 êklăk prăk ƀiădah tal 3 – 4 blư̆, sa blư̆ tla 500 êbâo prăk, 1 êklăk prăk. Sơnăn yơh.”

Aê mdrao Vũ Đức Thịnh, k’iăng khua anôk dŏng mdrao, khua anôk mdrao boh ƀleh, Sang êa drao prŏng Thiện Hạnh brei thâo, anôk bruă mơ̆ng sang êa drao ară anei mâo 19 boh masin, êran hruê mlam čiăng mdrao kơ hlăm brô 115 čô ruă. Čiăng bi kna boh tŭ mơ̆ng mnuih ruă leh anăn sang êa drao, anôk bruă đru tla prăk hŏng ênua bruă mdrao mgŭn leh anăn mkŏ mjing ênoh prăk čiăng kơ pô ruă tla hŏng ai pô. Ƀiădah, klă sĭt amâodưi djăp ênŭm klei čiăng mơ̆ng pô ruă. Aê mdrao Thịnh brei thâo:

“Klă sĭt lač hŏng ai tiê đru kơ yang ƀuôn, ênoh ênil anăn jing ƀiă hĭn leh. Hmei ăt gĭr čiăng mdrao mgŭn jăk hĭn kơ mnuih ruă leh anăn bi hrŏ gưl kar êrah kơ mnuih ruă, bi kdung mmông hdĭp kơ mnuih ruă. Sitôhmô phung ruă suaih ƀiă srăng bi hrŏ adôk 2 blư̆ hlăm sa hruê kăm, dưi bi hrŏ klei ktrŏ kơ mnuih ruă.”

Dak Lak ară anei mâo 3 sang êa drao knŭk kna kar êra đru kơ boh ƀleh jing Sang êa drao prŏng Lăn Dap Kngư, Sang êa drao prŏng Ƀuôn Ama Thuôt leh anăn Sang êa drao prŏng wăl krah Ƀuôn Hồ, jih jang dŭm anôk anăn dôk hlăm klei êgao hnơ̆ng nanao. Aê mdrao Huỳnh Thị Đoan Dung, ti anôk mdrao kơ mta ruă, sang êa drao prŏng Lăn Dap Kngư brei thâo, hŏng 24 boh masin kar êrah, mbah 4 mmông mă bruă hlăm sa hruê, anôk bruă ăt knŏng dưi kar êrah jih hnơ̆ng kơ 200 čô. Ară anei hră anăn guôn kar êrah hlăm anôk bruă adôk hlăm brô 600 čô.

“Mâo lu phung ruă amâo mâo masin kar êrah, kyuanăn lu mnuih ruă knŏng kar êrah dŏng mdrao đuč. Mâo lu mnuih amâo mâo lŏ čiăng guôn ôh kyua amâo mâo ƀuh êlan. Ênoh mnuih ruă toh hroh ƀoh ƀleh ƀrư̆ hruê ƀrư̆ lu. Kyuanăn pô srăng mâo lu masin hĭn kơh dưi djăp. Klei anei jing boh klei ruă kŏ asei hlăm sang êa drao. Amâo thâo bĭt mjing kyua amâo mâo djăp masin”.

Dak Lak ară anei mâo giăm 1000 čô toh hroh boh ƀleh čiăng kar êrah, ƀiădah knŏng mâo mă hlăm brô 600 dưi mâo kar êrah ti dŭm anôk mdrao mgŭn hlăm čar. Bi ênoh adôk, digơ̆ nao ti čar tač čiăng kar êrah. Čiăng mgaih msir boh klei anei, mrâo anei, knơ̆ng bruă mdrao mgŭn čar Dak Lak akâo leh klei blŭ mguôp mơ̆ng Knơ̆ng bruă hdră êlan leh anăn duh bi li, knơ̆ng bruă ngăn prăk čar mơĭt bruă sang čư̆ êa čar kơ bruă akâo ênoh prăk duh bi liê kơ kdrăp yua mdrao hlăm êrah leh anăn boh ƀleh ti alŭ wăl. Nay Phi La, khua knơ̆ng bruă mdrao mgŭn čar Dak Lak brei thâo:

“Leh hdră mtrŭn mrô 114 dưi dưn mơ̆ng hruê 3/10, knơ̆ng bruă mdrao mgŭn kčĕ leh hŏng bruă sang čư̆ êa čar mđĭ duh bi liê thiăm masin kar êrah leh anăn mbha jing 4 anôk  ngă bruă čiăng bi hrŏ klei êgao hnơ̆ng kơ sang êa drao krĭng. Nah Dưr kƀĭn ti Sang êa drao Ƀuôn Hồ, nah Dhŭng ti kdriêk Krông Ƀŭk, leh anăn sa anôk mkăn ti Êlan dơ̆ng mrô 27m kriêk Čư̆ Kuiñ, bi adôk kơ sang êa drao prŏng Ƀuôn Ama Thuôt, hŏng ênoh masin srăng blei thiăm hlăm brô 100 boh. Sơnăn kơh dưi bi hrŏ klei êgao hnơ̆ng mnuih nao kar êrah, bi mdul ƀiă kơ mnuih ƀuôn sang nao mdrao ti ƀuôn prŏng Hồ Chí Minh leh anăn dŭm čar mkăn.

Bruă duh bi liê thiăm dŭm masin kar êrah kơ dŭm sang êa drao knŭk kna jing klei čiăng êdi, bi mâo djăp klei čiăng mdrao mgŭn mơ̆ng mnuih ƀuôn sang, đru kơ digơ̆ mâo klei găl mdrao giăm sang leh anăn bi hrŏ klei ktrŏ kơ ênoh mdrao mgŭn kơ mnuih ruă.