Mâo klei đru êbeh 20 êklăk prăk mơ̆ng klei bi mguôp Êpul bruă yang ƀuôn Sang êa drao krĭng Lăn Dap kngư hŏng phung thâo bi đru, mâo đru leh kơ amuôn Phan Đình Cương êka kjham kyua hlăp phao mơar, Hồ Thị Hồng Phương jing amĭ amuôn Cương, ti alŭ mrô 1 să Ea Păl, kdriêk Ea Kar mâo klei mơak lehanăn mgei ai tiê. Phương brei thâo, gŏ sang ñu mâo 3 čô anak, hlăm anăn Cương jing anak tal êlâo. Mlan 2 leh êgao, kyua hlăp mnêñ, amuôn hŏng ayŏng adei ñu hlăp phao mơar diñu blei hlăm hla pŏk lehanăn mtuh hĕ. Cương êka kjham hlăm ƀô̆ mta, lehanăn khăt hĕ dua ƀĕ kngan. Khădah mâo hiu duah hlăm djăp anôk, ƀiădah ung mô̆ ñu ăt kƀah prăk mdrao. Kyua mâo êpul yang ƀuôn mơ̆ng sang êa drao bi mguôp hŏng phung thâo bi đru, đru leh kơ gŏ sang ñu klam klei ktrŏ dôk găn. Amâo mâo djŏ knŏng dŭm anăn ôh. Êpul bruă yang ƀuôn lŏ duah phung thâo bi đru lŏ đru jih ênoh bi liê kơ bruă mkŏ kngan kơ amuôn Cương.

 “Mơ̆ng leh ba kơ sang êa drao, mâo phung nai aê mdrao dlăng kriê mdrao mgŭn hŏng jih ai tiê. Lehanăn mâo sang êa drao lŏ iêo mthưr klei bi đru, đru kơ amuôn lehanăn gŏ sang hmkei mâo klei lač jăk prŏng êdi. Kâo bi ala kơ gŏ sang lač jăk kơ phung thâo bi đru lu snăk”.

 Y-Hoan ÊBan (20 tuổi) ti ƀuôn Ju, să Ea Tu, ƀuôn prŏng Ƀuôn Ama Thuôt mâo klei truh hlăm êlan klông êjai wĭt mă bruă, ba mdrao kơ sang êa drao jhat klang rŏng, joh k’iêng, tloh aruăt dlô klang, lehanăn êwiên dua ƀĕ jơ̆ng. Khădah klei mdrao mgŭn đru leh kơ Y- Hoan amâo truh kơ djiê ôh, ƀiădah kyua klei truh kjham đei snăn gơ̆ nao bliah mdrao lu blư̆. Gơ̆ êrĭt amĭ ama mơ̆ng hlăk mrâo 13 thŭn dôk hdĭp hŏng amiêt, jih jang ênoh bi liê jing ktrŏ đei êgao kơ hnơ̆ng dưi mâo. Kyua pral êpul yang ƀuôn mơ̆ng sang êa drao iêo mthưr klei bi đru, snăn mâo phung thâo bi đru kơ gơ̆ truh 50 êklăk prăk, djăp pioh bi liê kơ bruă mdrao mgŭn. Y-Băn Êban, amiêt Y-Hoan:

 “Klei hdĭp mda amuôn bŏ hŏng klei knap mñai, êrĭt amĭ ama. Đĭ hriê kơ prŏng knŏng hŏng klei hiu ngă bruă mưn, ară anei tuôm hĕ hŏng klei truh, ară anei hriê mdrao mâo phung nai aê mdrao mgŭn hŏng jih ai tiê, lehanăn mâo phung thâo bi đru, dưi đru leh kơ amuôn mâo djăp prăk mdrao mgŭn, kâo amâo lŏ mâo klei blŭ mkăn ôh, knŏng lač jăk lu”. 

          Hồ Sĩ Phú – Khua adŭ bruă nai êa drao klam ngă bruă yang ƀuôn mơ̆ng sang êa drao krĭng lăn dap kngư brei thâo, mơ̆ng thŭn 2022 truh kơ ară anei êpul bruă yang ƀuôn mơ̆ng sang êa drao iêo mkrum leh êbeh 1,5 êklai prăk lehanăn giăm 1.000 hnư mnơ̆ng kơ mnuih ruă dôk hlăm klei dleh dlan. Mbĭt hŏng anăn, êpul bruă yang ƀuôn lŏ đru bi dlăng kriê ktrâo atăt mnuih ruă, găp djuê mnuih ruă hlăm jih jang hdră êlan mdrao mgŭn ti sang êa drao. Ktrâo atăt mnuih ruă kơ klei bhiăn mdrao. Đru kơ ya mta klei jing dleh dlan hŏng găp djuê mnuih ruă, yăl dliê kơ jih êlan phung aê mdrao srăng mdrao mgŭn, lehanăn hưn mthâo mơh klei tŭ dưn kơ mnuih ruă, lehanăn găp djuê mnuih ruă. Hồ Sĩ Phú brei thâo:

 “Êpul ngă bruă yang ƀuôn đua klam kăp đru dŭm mnuih ruă dôk hlăm klei dleh dlan hlăm klei mdrao mgŭn, ênoh bi liê kơ klei mdrao mgŭn, lehanăn nao bi mklă klei anăn kñăm čiăng mâo hdră êlan iêo jak klei bi đru. Mơ̆ng anăn duah mtam êlan iêo mthưr phung thâo bi đru, đru kơ mnuih ruă sa kdrêč klei bi liê hlăm bruă mdrao mgŭn. Adŭ bruă anei lŏ mâo bruă kăp mđĭ ai mnuih ruă, lehanăn găp djuê mnuih ruă, đăm rung răng ôh hlăm klei mdrao mgŭn, gĭr mdrao djăl hlao, dah kƀah iêo jak jih jang mâo klei iêo jak.”

 Tui si Aê mdrao anôk bruă truăn kơ bruă mdrao mgŭn 2 Nguyễn Đại Phong – Khua kiă kriê sang êa drao krĭng lăn dap kngư, Êpul bruă yang ƀuôn sang êa drao mâo mkŏ mjing mơ̆ng hlăk thŭn 2016. Truh 2021 dưi hlŏng bi mŭt hlăm adŭ bruă nai êa drao. Ksiêm wĭt kơ klei tŭ dưn bruă knuă mơ̆ng êpul yang ƀuôn sang êa drao, Aê mdrao Nguyễn Đại Phong brei thâo:

 “Êpul bruă yang ƀuôn mơ̆ng sang êa drao mâo leh bruă klam hlăm jing jang klei bi mguôp hŏng phung bi đru kăp đru mnuih ruă mâo klei dleh dlan. Êlâo hĭn, mđĭ ai mnuih ngă bruă, lehanăn iêo jak phung thâo bi đru, lehanăn iêo jak wăt phung ngă bruă klei mrâo tui duah phung thâo bi đru mơ̆ng phung duh mkra, kñăm đru mdul kơ mnuih ruă hlăm klei mdrao mgŭn. Lehanăn lŏ ngă lu bruă kăp ktrâo atăt đru kơ mnuih ruă, găp djuê mnuih ruă hlăm jih jang bruă mdrao mgŭn”.

        Klei ngă jih jang bruă bi đru ti sang êa drao kñăm đru kơ mnuih ruă dôk hlăm klei dleh dlan mâo klei găl dưi mdrao mgŭn, anei jing leh sa knhuang mă bruă mrâo hlăm klei dlăng kriê wiê ênăk mnuih ruă, đru bi hrŏ klei dleh dlan, klei kƀah wư hlăm klei mdrao mgŭn, kñăm lŏ mđĭ klei mơak, klei jăk lŏ mbŏ klei tŭ dưn jăk hĭn hlăm klei hdĭp mda./.