Hluê anăn, čar Gia Lai mđing tal êlâo duh bi liê rŭ mdơ̆ng, mkra mđĭ lehanăn blei mprăp kdrăp mnơ̆ng kơ 24 anôk bruă mdrao mgŭn să hlăm krĭng knông lăn, krĭng dleh dlan. Dŭm mta bruă mâo pŏk mlar anôk bruă nah gŭ, rŭ mdơ̆ng mrâo anôk mkă dlăng rup, ksiêm mkă, dŏng mdrao tal êlâo, kdrăp msir mghaih êa djah bruă mdrao mgŭn lehanăn dŭm hdră đru mkăn. Ênoh prăk tĭng mkă kơ hdră anei hlăm brô 288 êklai prăk.

Mbĭt hŏng duh bi liê kơ anôk bruă nah gŭ, čar Gia Lai ăt ba mdah hdră mtrŭn ksiêm mkă dlăng klei suaih pral grăp gưl amâo mă prăk kơ mnuih ƀuôn sang ti 12 să knông lăn, plao ksĭ leh anăn dleh dlan êdi. Phung dưi ksiêm mkă dlăng jing mnuih djuê ƀiă, mnuih khua thŭn, mnuih mâo bruă tŭ dưn, mnuih dôk hlăm ênoh đru yang ƀuôn, gŏ sang ƀun, giăm ƀun, phung mniê hlăm gưl thŭn ƀă kkiêng anak leh anăn hđeh kgŭ 6 thŭn. Bruă ksiêm mkă dlăng klei suaih pral srăng mguôp hŏng mkŏ mjing hră mơar klei suaih pral điện tử, đru kčĕ, hmao ƀuh hnưm klei ruă leh anăn ba nao mdrao tơdah čiăng.

Mbĭt anăn, bruă kƀĭn ala čar Gia Lai ăt dôk mkŏ mjing hdră mtrŭn mrâo kơ hdră êlan jak iêu leh anăn mđĭ ai hŏng phung aê mdrao, nai mdrao ti alŭ wăl. Hdră anei mđing truh kơ êpul êya bruă mdrao mgŭn ngă bruă ti dŭm sang êa drao, anôk bruă mdrao mgŭn, anôk bruă mdrao mgŭn krĭng mnuih djuê ƀiă, krĭng čư̆ čhiăng, să knông lăn, să plao ksĭ leh anăn dŭm anôk bruă mdrao mgŭn knŭk kna mkăn mơ̆ng čar.

Êlâo kơ mâo hdră mtrŭn mrâo, čar hluê ngă hdră êlan mđĭ hĭn phung aê mdrao wĭt ti să.  Nguyễn Thị Thanh Lịch, Kiăng Khua Knơ̆ng bruă sang čư̆ êa čar Gia Lai brei thâo:

"Čar ba mdah lu snăk hdră mtrŭn kơ klei iêo jak ƀiădah ƀiă snăk aê mdrao wĭt. Ară anei, hnơ̆ng iêo jak mnuih mă bruă lu hĭn mơ̆ng hmei jing 600 êklăk prăk kơ sa čô aê mdrao leh anăn đru prăk mưn sang. Hmei mkŏ mjing leh hdră kčah čiăng tiŏ nao, bi ktlah aê mdrao trŭn kơ să."

Ară anei kluôm čar Gia Lai mâo 135 anôk bruă mdrao mgŭn hŏng 369 anôk bruă, mkăp kơ hnơ̆ng ênoh mnuih ƀuôn sang  êbeh 26.800 čô/ anôk bruă. Ƀiădah, mnuih mă bruă aê mdrao mbha ka bi knar. Čar adôk 76 anôk bruă mdrao mgŭn ka mâo aê mdrao mă bruă. Hluê si Hdră kčah, hlăm thŭn anei čar Gia Lai bi mlih 38 čô aê mdrao mơ̆ng dŭm sang êa drao, anôk bruă mdrao mgŭn leh anăn anôk bruă mdrao mgŭn knŭk kna wĭt đru kơ 30 să, ƀuôn hgŭm mâo klei čiăng tal êlâo.

Hdră mđĭ hĭn phung aê mdrao kơ nah gŭ mơ̆ng čar Gia Lai hluê ngă mơ̆ng thŭn 2026 truh kơ thŭn 2030. Wưng grăp čô aê mdrao wĭt mă bruă ti să ƀiă êdi 6 mlan leh anăn lu hĭn 12 mlan, dưi hluê ngă hluê lu gưl ƀiădah brei rơ̆ng kluôm wưng hluê si klei kčah mtrŭn. Hluê si boh tŭ pŏk ngă leh anăn boh sĭt hrŏng ruah mnuih mă bruă mdrao mgŭn, Knơ̆ng bruă mdrao mgŭn srăng đru kčĕ kơ Knơ̆ng bruă sang čư̆ êa čar Gia Lai bi mklă ênoh aê mdrao leh anăn alŭ wăl lŏ dơ̆ng dưi đru hlăm dŭm thŭn kơ anăp./.