Hdră mkŏ mjing mphŭn kčưm hŏng sa klei mmuiñ mơ̆ng phung mmuiñ Sang mđung asăp blŭ Việt Nam bi mni kơ ƀuôn sang, kơ lăn čar lehanăn dŭm klei đru mguôp mơ̆ng phung lĭng kahan hơô ao kô̆ hrue mlam dlăng kriê klei suaih pral mnuih ƀuôn sang.  

Bi ala kơ phung khua kiă kriê 4 anôk bruă klei mrâo Lê Quốc Minh, Knơ̆ng khua kiă kriê hră klei mrâo Nhân Dân, jing khua Êpul hgŭm bruă klei mrâo Việt Nam mơĭt leh klei hơêč hmưi jăk siam truh hŏng phung khua kiă kriê phŭn bruă mdrao mgŭn, phung khua kiă kriê dŭm anôk bruă ƀri bi hdơr 68 thŭn hrue phung nai aê mdrao Việt Nam, hơêč hmưi kơ phung nai aê mdrao lŏ dơ̆ng jih ai tiê hur har ngă bruă ba wĭt lu klei tŭ jing, jing anôk jưh knang jăk mơ̆ng mnuih ruă lehanăn mnuih ƀuôn sang kluôm ala.

Lŏ bi hdơr hlăm wưng dôk găn klei ruă tưp Covid-19 bŏ hŏng klei dleh dlan lehanăn klei lông dlăng prŏng hlăm 3 thŭn êgao, Lê Quốc Minh lač klă: Hlăm wưng anăn mâo leh lu bruă ngă bŏ hŏng klei jăk siam, klei hur har jih ai tiê mơ̆ng phung nai aê mdrao, kyua amâo mâo huĭ kơ klei dleh dlan knap mñai, amâo mâo uêñ kơ klei hdĭp pô, ăt duh myơr jih kơ bruă knuă, ba êlan êlâo ksŭng nao truh hlăm krĭng mâo klei ruă tưp, truh hlăm anôk huĭ hyưt êdi, amâo mâo thâo ôh hbĭl klei ruă tưp truh hĕ hŏng pô, ƀiădah ăt mă bruă knuă, dlăng kriê mnuih ruă hlăm anôk dôk bi ktlah, hlăm sang êa drao jing jai... lehanăn phung knuă druh nai êa drao amâo mâo wĭt kơ pưk sang pô ôh. Mnuih ƀuôn sang hlăm kluôm ala, djă pioh nanao lehanăn hdơr knga êdi hŏng klei đru mguôp leh prŏng prĭn mơ̆ng phung nai aê mdrao. Leh jih wưng găn klei ruă tưp Covid-19, dhar bruă mdrao mgŭn lŏ tuôm hŏng klei dleh dlan mơh, anăn jing klei kƀah êa drao mdrao, kƀah kdrăp mdrao mgŭn, kyua dôk ka thâo djŏ hlăm klei bhiăn ngăn prăk kơ anôk bruă mdrao mgŭn knŭk kna, kơ hdră êlan tĭng tla ƀơ̆k prăk mlan hŏng phung nai aê mdrao, jing adôk ka năng ôh hŏng ai tiê bruă knuă digơ̆ duh myơr leh, mơ̆ng klei anăn ngă kơ lu phung nai aê mdrao kbiă bruă knuă:

“Hŏng bruă klam jing anôk bruă klei mrâo, hră klei mrâo Nhân Dân, Thông tấn xã Việt Nam, Sang mđung rup Việt Nam, Sang mđung asăp blŭ Việt Nam srăng lŏ dơ̆ng hâo hưn kơ bruă dlăng kriê klei suaih pral mnuih ƀuôn sang, kơ jih jang bruă mdrao mgŭn, lehanăn bruă knuă mơ̆ng phung nai aê mdrao”.

Hdră mkŏ mjing dưi lŏ dơ̆ng bi trông hŏng akŏ “Gĭr jih ai tiê kyua klei suaih pral mnuih ƀuôn sang – Bruă mdrao mgŭn hgao klei dleh dlan”. Anăn yơh jing klei blŭ mơ̆ng Nai prŏng, Nai prĭn Aê mdrao Yang ƀuôn Nguyễn Viết Nhưng, Khua kiă kriê sang êa drao Ksŏ gưl dlông êlâo dih, mbĭt hŏng phung nai aê mdrao mâo mă klei pah mni Hồ Chí Minh hŏng bruă ngă jing: “Ksiêm duah lehanăn ba yua kdrăp mrâo hlăm bruă mkă dlăng, mdrao mgŭn klei ruă hlăm êlan bi êwa” lehanăn tui duah hdră mdrao mgŭn kñăm čiăng bi jih klei ruă hnak. Anăn jing, klei hriăm mâo mkŏ mjing čiăng rŭ mdơ̆ng êpul phung nai aê mdrao mă bruă mâo klei kjăp hĭn, anăp truh djŏ ai tiê hŏng mnuih ruă, msĕ si aê mdrao trăn kơ anôk mdrao mgŭn mrô 1 Trần Phước Đoàn, K’iăng khua anôk bruă kiă kriê klei ruă čar Tây Ninh, aê mdrao truăn kơ bruă mdrao mgŭn mrô 1 Phạm Thị Hồng Lam, K’iăng khua knơ̆ng bruă kiă kriê sang êa drao kdriêk Nghi Xuân, čar Hà Tĩnh, Aê mdrao Phạm Ngọc Dung, Khua sang êa drao să Quảng Sơn, Anôk bruă mdrao mgŭn kdriêk Hải Hà, čar Quảng Ninh.

 Nao ti anôk bi trông, phung khua kiă kriê dŭm boh sang êa drao Gưl dlông   Huế, Sang êa drao hđeh gưl dlông, Sang êa drao mrô 199- Phŭn bruă kahan ksiêm, sang êa drao Vinmec, Anôk bruă ksiêm duah klei kơ êrah gưl dlông ăt mâo klei blŭ bi trông, lač kơ jih jang klei gĭr mơ̆ng bruă hgao jih jang klei dleh dlan kyua klei ruă tưp Covid-19, bi kơ klei phung nai aê mdrao kbiă mă bruă, kơ klei kƀah êao, kƀah kdrăp mdrao mgŭn. Snăn k’iăng nai prŏng, nai prĭn Trần Minh Điển, Khua kiă kriê sang êa drao hđeh Gưl dlông lač:

- “Hrue mbrue, phŭn bruă mdrao mgŭn lehanăn phung khua kiă kriê dŭm boh sang êa drao prŏng mâo leh klei bi kƀĭn truh 21 mmông mtam, hmei bruă ruh mgaih jih jang klei dleh dlan gun kpăk jing bruă ngă ƀrư̆ ƀrư̆. Siămdah, čiăng kơ jih jang sang êa drao dưi mă bruă jăk hĭn, djŏ hĭn snăn brei mâo klei êngiê kơ klei duah lehanăn yua ngăn prăk”.

   Bi nao prŏng, nai prĭng Phạm Như Hiệp, Khua kiă kriê sang êa drao gưl dlông Huế lač:

 “Sĭt nik jih jang klei dleh dlan anei srăng mghaih msir mơh, sitôhmô klei bhiăn bruă mdrao mgŭn srăng dưi ba yua truh ti thŭn 2024 kyuadah hlăm klei bhiăn anei, mâo leh mơh lu mta drei dưi mgaih msir leh msĕ si klei kơ ênoh ênil, klei kơ hdră mdrao mgŭn sitôhmô hdrăm mbĭt hŏng êngao knŭk kna bi mdrao mgŭn, mbha anôk mbha gưl, lehanăn kơ jih klei anăn đru bi mghaih msir dŭm klei gun kpăk hlăm bruă mdrao mgŭn ară anei”.

Blŭ hrăm ti anôk bi trông anei, čiăng hdơr knga, lač jăk kơ phung nai aê mdrao, k’iăng khua phŭn bruă mdrao mgŭn Đỗ Xuân Tuyên lač: Hlăm wưng kơ anăp, phŭn bruă mdrao mgŭn srăng bi leh jih jang hdră êlan mă bruă, wăt klei bhiăn, dŭm bruă dôk čih mkra klei bhiăn, mlih mrâo bruă mdrao mgŭn lehanăn mđĭ hĭn bruă răng kriê klei suaih pral mnuih ƀuôn sang. Ƀuh klei thâo kiă kriê mơ̆ng bruă mdrao mgŭn, klei kjăo hlăm bruă mdrao mgŭn, jih ai tiê kyua mnuih ruă. Lŏ ksiêm dlăng jih jang bruă mdrao mgŭn ƀư̆ nao bi djŏ êlan, tĭng bi djăp ênŭm, mlih mrâo bi sĭt êmĭt, mkă tĭng bi kjăp klei bhiăn prăk kăk hlăm bruă mdrao mgŭn... Phŭn bruă mdrao mgŭn srăng mđĭ hĭn hdră êlan mă bruă, bi kjăp bruă knuă, mâo hdră bi hâo hưn kăp kčĕ đru ngă bruă hrăm mbĭt hŏng yang ƀuôn bi leh jih jang klei dleh dlan, đru mghaih msir bi jăk hĭn kơ bruă mdrao mgŭn./.