Amai Phan Thị Bích Thảo, ti wăl krah Ia Kha, kdriêk Ia Grai, čar Gia Lai mâo anak 3 thŭn mâo klei bi knăl êngoh hlơr anăn gŏ sang brei anak nao đih mdrao ti Sang êa drao mdrao hđeh Gia Lai čiăng mdrao mgŭn. Khădah snăn, leh anăn hđeh truh kjham anăn nao dŏng mdrao ti Sang êa drao prŏng krĭng Lăn Dap Kngư, čar Dak Lak. Leh 8 hruê mdrao mgŭn jăk, truh ară anei hđeh đĭ kyar jăk, klei suaih pral ƀrư̆ jăk. Lŏ hdơr boh klei tal êlâo ba anak nao dŏng mdrao, amai Thảo ăt dôk bi kngăr:

        “Ĕ hriê tinei mâo klei ruă jơ̆ng kngan ƀăng êgei hnơ̆ng tlâo, leh anăn ruă kboh, asei mlei ơ̆ng jih, khăng leh. Mơ̆ng anei aê mdrao jih ai tiê dŏng mdrao leh. Anak kâo ară anei hgao leh klei huĭ hyưt. Kâo ƀuh huĭ hyưt đei, anak kâo kjham pral leh anăn amâo mâo klei bi knăl kơ klei ruă jơ̆ng kngan ƀăng êgei ôh, ĕ knŏng êngoh leh anăn kđuč hlăm ƀăng êgei.”

Ăt mâo anak mâo klei ruă jơ̆ng kngan ƀăng êgei dôk mdrao ti Anôk mdrao kơ  hđeh điêt - hđeh điêt mrâo kkiêng ti Sang êa drao prŏng krĭng Lăn Dap Kngư, amai Hồ Thị Phượng ti ƀuôn hgŭm Thống Nhất, wăl krah Ƀuôn Hô, čar Dak Lak ăt ka jih huĭ hyưt leh anak truh kjham. Amai Phượng brei thâo, êlâo dih anak prŏng mâo klei ruă jơ̆ng kngan ƀăng êgei ƀiădah hdjul, knŏng bi kđuč ƀiă ti jơ̆ng, kngan, dôk ti sang mmia êa drao anăn anak tal 2 hlao, gŏ sang ăt kăn rŭng răng mơh.

        “Anak tal êlâo ăt nao blei êa drao ti êngao mnăm 2 hruê jih, hlăk êlâo hdjul ƀiă, ară anei kjham hĭn. Ƀuh huĭ hyưt đei, huĭ hmăi kơ dlô, tơdah amâo hmao mdrao snăn truh kjham”.

          Dôk kriê dlăng anak mniê 16 mlan ti anôk mdrao kơ hđeh ti Sang êa drao prŏng krĭng Lăn Dap Kngư, amai Huỳnh Thị An ti să Čư̆ Mlêñ, kdriêk Ea Sup, čar Dak Lak brei thâo, sui hŏng anei hlăm brô 1 hruê kăm, ñu ƀuh anak mtŭk lu, êmăn êmik, enegoh hlơr leh anăn hlăm plat kngan, jơ̆ng mâo bi kđuč đung êa anăn ba nao ksiêm mkă. Aê mdrao lač anak mâo klei ruă jơ̆ng kngan ƀăng êgei. Leh 3 hrue mdrao ti sang amâo hlao, gŏ sang ba anak nao đih mdrao ti Sang êa drao prŏng krĭng Lăn Dap Kngư.

“Leh hriê tinei đuh đung êa lu truh kơ 2 plat jơ̆ng leh anăn hlăm plat kngan. Kâo ăt kăn mâo klei thâo kơ klei ruă jơ̆ng kngan ƀăng êgei rei anăn ti sang mâo mnơ̆ng anak hlăp snăn pô ăt lui snăn mơh kăn mĭn mơh yan anei mâo klei ruă anei.”

           Hlue si aê mdrao Huỳnh Thị Bích Như, Anôk mdrao kơ hđeh, Sang êa drao prŏng krĭng Lăn Dap Kngư, mơ̆ng akŏ thŭn truh ară anei, anôk mdrao jum leh, mdrao kơ 85 čô hđeh mdrao klei ruă jơ̆ng kngan ƀăng êgei. Năng mđing hlăm 1 mlan hŏng anei ênoh mnuih nao đih mdrao đĭ lu. Ară anei anôk mdrao dôk mdrao 15 čô hđêh mâo klei ruă jơ̆ng kngan ƀăng êgei, hlăm anăn mâo 2 čô kjham. Aê mdrao Huỳnh Thị Bích Như brei thâo:

          “Pô dôk gang mkhư̆ hŏng klei mđĭ klei dưi mdrơ̆ng kơ anak, huă mnăm djăp mnơ̆ng tŭ jăk, mnăm djăp êa leh anăn mbŏ dŭm mta vitamin čiăng mđĭ klei dưi mdrơ̆ng kơ anak leh anăn tlŏ thiăm vaccin gang mkhư̆ klei ruă hdrak leh anăn ktrâo lač kơ anak bi doh kngan kyua klei ruă jơ̆ng kngan ƀăng êgei pô bi doh snăn ăt dưi mkhư̆ klei tưp lar.”

 Knŏng hjăn ti Wăl krŭ wĭt klei suaih pral hđeh - hđeh mrâo kkiêng, Sang êa drao prŏng krĭng Lăn Dap Kngư, mơ̆ng akŏ thŭn truh ară anei, Anôk mdrao tŭ mă leh anăn mdrao kơ 4 čô mâo klei ruă jơ̆ng kngan ƀăng êgei kjham leh anăn kjham hĭn, đĭ 100% mkă hŏng wưng anei thŭn dih. Aê mdrao chuyên khoa II Hoàng Ngọc Anh Tuấn, Khua kơrŭ wĭt dŏng mdrao hđeh điêt- hđeh mrâo kkiêng brei thâo, hlăm dŭm thŭn êlâo klei ruă jơ̆ng kngan ƀăng êgei ƀiă mâo hđeh ruă kjham, ƀiădah thŭn anei ênoh hđeh kjham đĭ, mnuih rư mâo klei bi knăl kjham lu, dleh đăo knăl anăn phung aê mdrao ti Anôk mdrao ktuê dlăng bi jăk klei suaih pral grăp čô hđeh čiăng hmao msir mgaih:

“Hŏng klei ruă jơ̆ng kngan ƀăng êgei snăn truh ară anei ăt kăn dưi ngă ngơi mang mơh. Kâo mtă êngao kơ gang mkhư̆ hlăm klei huă mnăm, rơ̆ng klei suaih pral, rơ̆ng wăl hdĭp mda snăn phung amĭ ama ăt brei mđing tơdah hđeh kđuč hlăm ƀăng êgei, amâo đei huă ƀơ̆ng amâodah êngoh hlơr, bi đuč đung êa snăn brei nao ti anôk mdrao mgŭn giăm hĭn čiăng mâo phung aê mdrao kčĕ hdră mdrao mgŭn, kriê dlăng.”

 Hlue si klei hưn mdah mơ̆ng Anôk bruă ktuê dlăng klei ruă tưp čar Dak Lak, mơ̆ng akŏ thŭn truh ară anei, kluôm čar mâo 158 čô mâo klei ruă jơ̆ng kngan ƀăng êgei, hlăm anăn mâo 1 čô djiê. Năng mđing jing ênoh hđeh mâo klei ruă jơ̆ng kngan ƀăng êgei truh kjham mâo klei bi knăl đĭ mkă hŏng thŭn êlâo./.