-Akâo kơ ih brei thâo kơ dŭm mta bruă mơ̆ng Êpul bruă djuê ana ngă leh hlăm wưng čar Dak Lak găn hlăm gưl bluh đĭ mơ̆ng klei ruă tưp Covid-19?

Hà Huy Quang: “Thŭn 2021, 2022 ti anăp boh sĭt klei ruă tưp Covid-19 bluh đĭ ti alŭ wăl čar, boh nik ti dŭm alŭ, ƀuôn mnuih djuê ƀiă, thâo săng kơ boh klei anăn, Êpul bruă djuê ana čar hmao mâo klei kčĕ hŏng Knơ̆ng bruă sang čư êa čar mkŏ mjing hdră gĭt gai anôk bruă čung ba mnuih ƀuôn sang, dŭm gưl bruă mtrŭt mđĭ ktang bruă hâo hưn, gang mkhư̆ klei ruă tưp Covid-19 ti krĭng mnuih djuê ƀiă hlăm alŭ wăl čar, boh nik jing dŭm alŭ ƀuôn mâo klei hmăi kjham mơ̆ng klei ruă tưp. Hŏng dŭm hdră hâo hưn msĕ si mbha hră mplĕ, mkra pano leh anăn tiŏ nao phung mâo klei đăo knang krĭng mnuih djuê ƀiă truh kơ grăp kjhiêt, khŏk ƀăng gră boh sang, mtrŭt mjhar mnuih ƀuôn sang jing mnuih djuê ƀiă hluê ngă djŏ dŭm hdră êlan gang mkhư̆ klei ruă tưp Covid-19 leh anăn hluê si klei mtă mơ̆ng Dhar bruă mdrao mgŭn, kyuanăn klei ruă tưp Covid-19 ti krĭng mnuih djuê ƀiă ƀrư̆ ƀrư̆ dưi ksiêm dlăng, bi hrŏ jih hnơ̆ng klei hmăi kơ klei hdĭp mnuih ƀuôn sang, ba klei hdĭp mnuih ƀuôn sang lŏ wĭt msĕ yăng đar, kñăm kơ klei mă bruă knuă, mđĭ kyar bruă duh mkra.

-Dưi lač klă, vaccine jing mta phŭn yuôm bhăn hlăm bruă gang mkhư̆ klei ruă tưp Covid-19. Ƀiădah, leh klei ruă tưp mâo klei hrŏ, mâo mnuih ƀuôn sang ti čar Dak Lak mâo klei mĭn ngă mgơi mang, amâo mâo tlŏ ôh vaccine gang mkhư̆ klei ruă tưp Covid-19, ti anăp boh sĭt anei, ya hdră êlan mơ̆ng Êpul bruă djuê ana mâo leh čiăng hâo hưn, mtrŭt mjhar mnuih ƀuôn sang nao tlŏ mgang vaccine?

Hà Huy Quang: Dưi bi klă msĕ sơnei, bruă tlŏ mgang vaccine gang mkhư̆ klei ruă tưp Covid-19 jing khil mgang msei mâo boh tŭ dưn hĭn hlăm bruă gang mkhư̆ klei ruă tưp, msĕ drei ƀuh leh, hlăm wưng tal êlâo, kyua mâo hdră êlan djŏ guôp, djŏ hruê mmông mơ̆ng gưl bruă Đảng nah gŭ, bruă sang čư êa leh anăn dŭm gưl, boh nik jing hdră “vaccine mơ̆ng tač êngao” hŏng klei mbruă mơ̆ng Đảng, knŭk kna, drei mâo leh hnơ̆ng vaccine lu đru kơ bruă tlŏ mngang kơ mnuih ƀuôn sang ti dŭm anôk mâo klei ruă tưp, kyuanăn, klei ruă tưp ƀrư̆ ƀrư̆ dưi ksiêm dlăng, ênoh mnuih djiê kyua klei ruă tưp mâo klei hrŏ lu, klei hdĭp mnuih ƀuôn sang ƀrư̆ ƀrư̆ wĭt hlăm wưng msĕ aguah tlam, mơ̆ng anăn mkŏ mjing klei mĭn hlăm mnuih ƀuôn sang, boh nik ti krĭng mnuih djuê ƀiă êlâo dih mâo klei ngă ngơi mang, amâo đei uêñ kơ bruă tlŏ mgang vaccine. Thâo klă klei anei, hŏng klei mtô lač mơ̆ng bruă mdrao mgŭn dŭm gưl, Êpul bruă djuê ana čŏng bi mguôp hŏng Sang mđung asăp blŭ Việt Nam krĭng Lăn Dăp Kngư leh anăn Sang mđung rup čar Dak Lak hluê ngă lu hdră hâo hưn hdră gang mkhư̆ klei ruă tưp hŏng lu klei blŭ, mđing hlăm êlan mđung asăp hlăm čar leh anăn dŭm alŭ wăl čiăng mđĭ hĭn klei thâo săng kơ mnuih ƀuôn sang krĭng mnuih djuê ƀiă, thâo klă boh tŭ dưn, klei yuôm bhăn mơ̆ng bruă tlŏ mgang vaccine hlăm bruă gang mkhư̆ klei ruă tưp Covid-19, mtrŭt mjhar  mnuih ƀuôn sang krĭng mnuih djuê ƀiă nao tlŏ mgang ênŭm vaccine. Hluê anăn, tui si klei hưn ênŭm mơ̆ng dhar bruă mdrao mgŭn, truh kơ ară anei, hnơ̆ng tlŏ mgang vaccine gang mkhư̆ klei ruă tưp Covid-19 truh kơ dŭm êpul mâo boh tŭ dưn jăk, đru msưh kdŭn klei ruă tưp Covid-19 ti alŭ wăl čar.

- Msĕ ih mrâo kah mbha leh kơ klei bi mguôp hŏng dŭm anôk bruă klei mrâo hâo hưn čiăng bi lu jơr hdră hâo hưn kñăm mđĭ klei thâo săng kơ mnuih ƀuôn sang hlăm bruă gang mkhư̆ klei ruă tưp Covid-19, si ngă klei ih bi klă mơ̆ng klei wĭt lač mơ̆ng phung mđing hmư̆, leh anăn hlăm wưng kơ anăp, si ngă hdră bi mguôp mơ̆ng Êpul bruă djuê ana čar Dak Lak čiăng mâo dŭm hdră hâo hưn kluôm ênŭm kơ dŭm boh klei leh anăn dŭm hdră êlan kơ krĭng mnuih ƀuôn sang jing mnuih djuê ƀiă?

Hà Huy Quang: “Anăn ăt jing sa klei bi knăl jăk hlăm bruă hâo hưn, gang mkhư̆ klei ruă tưp Covid-19 hŏng bruă bi mguôp hŏng dŭm anôk bruă klei mrâo hâo hưn ăt msĕ hŏng dŭm alŭ wăl čiăng mđĭ hĭn klei thâo săng, bruă klam mơ̆ng mnuih ƀuôn sang hlăm bruă gang mkhư̆ klei ruă tưp. Bi lar dŭm boh tŭ dưn dưi mâo, bruă hâo hưn gang mkhư̆ klei ruă tưp Covid-19 hlăm wưng kơ anăp srăng kñăm kơ dŭm boh klei msĕ si: Lŏ dơ̆ng bi mguôp hŏng dŭm anôk bruă klei mrâo hâo hưn msĕ si Sang mđung asăp blŭ Việt Nam krĭng Lăn Dăp Kngư (VOV), Sang mđung asăp, mđung rup čar mđĭ hĭn mmông hâo hưn leh anăn jêñ jêñ hĭn, kluôm êlam hĭn hlăm krĭng mnuih ƀuôn sang jing mnuih djuê ƀiă. Boh nik jing bi lar bruă klam phung mâo klei đăo knang mđĭ hĭn bruă hâo hưn gang mkhư̆ klei ruă tưp, đru kơ mnuih ƀuôn sang jing mnuih djuê ƀiă thâo săng klă boh tŭ dưn, klei yuôm bhăn mơ̆ng bruă tlŏ mgang vaccine, čŏng pô ngă dŭm hdră êlan gang mkhư̆ klei ruă tưp msĕ si: Truă čhiăm guôm ƀô̆, vaccine, êa drao, mdrao mgŭn, kdrăp mrâo mrang leh anăn dŭm hdră êlan hluê si klei mtă mơ̆ng anôk bruă mdrao mgŭn dŭm gưl, nao mbĭt hŏng bruă ngă jăk dŭm hdră djuê ana hlăm alŭ wăl, boh nik, hluê ngă jăk hdră ala čar kñăm kơ klei mđĭ kyar bruă duh mkra – ala ƀuôn krĭng mnuih djuê ƀiă leh anăn krĭng čư̆ čhiăng wưng thŭn 2021 – 2030. Đru hnưm dưi msưh mdŭn klei ruă tưp Covid-19, kñăm kơ bruă mđĭ kyar bruă duh mkra ala ƀuôn, mđĭ hnơ̆ng klei hdĭp, rơ̆ng klei êđăp ênang yang ƀuôn krĭng mnuih djuê ƀiă, bi hrŏ êwang kpleh hlăm klei hdĭp plah wah mnuih ƀuôn sang jing mnuih djuê ƀiă hŏng mnuih djuê ana Yuăn, plah wah krĭng ƀuôn sang leh anăn ƀuôn prŏng.

PV: Lač jăk kơ ih lu!