-  Hlăk anăn mơak snăk tơl hia, aê mdrao Khải lač ĕ kbiă leh, ƀuh leh ñu pô kbiă êa ală, mơak snăk. Ƀuh hơ̆k mơak êdi yơh, msĕ si pô lŏ êra hĕ.

Anăn jing klei yăl dliê mơ̆ng amai Nguyễn Thị Thu Dền ti ƀuôn Trăp, kdriêk Krông Ana, čar Dak lak hlăk tal êlâo bi tuôm hŏng anak hlăm adŭ bliah mă anak ĭ. Amai Dền brei thâo, ung mô̆ ñu amâo mâ anak êbeh 5 thŭn leh, ăt tuôm nao ksiêm mkă ti lu anôk mdrao mgŭn ti ƀuôn prŏng Hồ Chí Minh ƀiădah amâo mâo klei tŭ dưn ôh. Hlăm 5 thŭn nao duah anak, 2 ung mô̆ ñu mâo leh lu klei rŭng răng hlăm ai tiê leh anăn ngăn prăk. Thŭn 2023, thâo kơ hdră “Mjing klei jăk mơak” mơ̆ng sang êa drao Sang hră gưl prŏng Ƀuôn Ama Thuôt, ung mô̆ amai nao lông ngă. Leh anăn, klei myun truh hŏng ung mô̆ diñu leh hră mơar dưi tŭ mă. Mơ̆ng blư̆ mdrao mgŭn ñu dưi ƀa tian anak khua.

Ăt msĕ si amai Dền, ung mô̆ amai Nông Thị Thu, ti alŭ 6a, să Ea Wy, kdriêk Ea Hleo, čar Dak Lak ăt mâo klei hơ̆k mơak mơ̆ng hdră anei. Amai Thu brei thâo, bŏ 11 thŭn 2 ung mô̆ nao djăp anôk čiăng mâo anak. Mơ̆ng hdră anăn, ñu găn leh 1 blư̆ klei hrup mă, 3 blư̆ hroh anak ĭ, 1 blư̆ bliah klei ruă poluyp hlăm sang anak ĭ. Mĭn dah lui yơh kyua bruă duh mkra leh anăn ai tiê luč jih, ƀiădah klei mơak truh yuôm bhăn snăk kyua ñu ba tian hlăm hdră “Mjing klei jăk mơak” mơ̆ng Sang êa drao Sang hră gưl prŏng Y Dược Ƀuôn Ama Thuôt thŭn 2023. Jih 9 mlan ba tian, amai Thu tuôm hŏng lu klei dleh dlan hlăk ba tian kƀah êa, tian điêt hĭn mkă hŏng mlan, mâo mta mmih hlăm êrah, huĭ mâo klei amâo jăk. Amai Thu mgei ai tiê yăl dliê:

“Amâo bi  mĭn ôh srăng ba tian kyua ngă dŭm blư̆ ti anôk mkăn amâo dưi ôh, ƀri mơh tal anei mâo hĕ. Hlăk kkiêng anak msĕ si klei êpei, amâo đăo ôh dôk pŭ hĕ anak ti kngan.”

 Jing pô hrăm mbĭt hŏng hlâo ung mô̆ amâo mâo anak hlăm hdră “Mjing klei jăk mơak”, aê mdrao Lê Huy Khải, Khua Anôk bruă đru kơ klei ƀă kiêng anak IVFMD Ƀuôn Ama Thuôt, Sang êa drao Sang hră gưl prŏng Y Dược Ƀuôn Ama Thuôt brei thâo, phung amâo mâo anak duah lu jing hlăm boh klei luč klei čang hmăng kyua hiu mdrao leh lu anôk ƀiădah amâo mâo klei tŭ dưn ôh. Kyua anăn, êngao kơ bruă mdrao klei ruă, phung aê mdrao lŏ mdrao wăt hlăm ai tiê klei mĭn mnuih ruă hơĭt ai tiê, đăo knang, mâo klei tŭ dưn jăk hĭn:

“Ktưn hưn leh anăn myun snăk tơdah pô ƀuh boh tŭ pô leh anăn phung ruă hrăm mbĭt dưi mâo. Pô knŏng čang hmăng srăng lŏ dơ̆ng ngă čiăng hrăm mbĭt hĭn hŏng mnuih ruă dưi mâo klei jăk mơak  msĕ snăn.”

“Mjing klei jăk mơak” jing hdră đru ba tian mơ̆ng hdră mrâo mrang amâo mă prăk mơ̆ng kdrăp IVFMD kơ hlâo ung mô̆ amâo mâo anak, knŏng dưi mâo hlăm hdră anei ƀiădah kyua klei hdĭp dleh dlan anăn ka dưi ngă ôh. Hdră anei mphŭn mơ̆ng thŭn 2014 leh anăn hră mbĭt hŏng giăm 600 hlâo ung čang hmăng mâo anak mâo klei hdĭp dleh dlan. Klă sĭt mguôp hlăm Hdră mơ̆ng thŭn 2023, Sang êa drao Sang hră gưl prŏng Y Dược Ƀuôn Ama Thuôt đru leh tŭ jing 6 hlâo ung mô̆, hlăm anăn 3 čô drông leh anak suaih pral. Ênoh bi liê đru hlăm hdră êbeh 1,1 êklai prăk. Aê mdrao Võ Minh Thành, Khua Sang êa drao Sang hră gưl prŏng Y Dược Ƀuôn Ama Thuôt brei thâo, Sang êa drao Sang hră gưl prŏng Y Dược Ƀuôn Ama Thuôtăt dôk mă hră mơar kơ Hdră “Mjing klei jăk mơak” thŭn 2024. Thŭn anei, Sang êa drao srăng đru 10 hlâo ung mô̆ amâo mâo anak mâo klei hdĭp dleh dlan ti Lăn Dap Kngư:

 “Hdră anei ba klei tŭ dưn yuôm bhăn leh anăn djŏ guôp hŏng hdră tă ngă bruă mơ̆ng Sang êa drao kyua anăn hmei srăng lŏ dơ̆ng hrăm mbĭt leh anăn gĭr hĭn si ngă čiăng jăk hĭn kơ mnuih ƀuôn sang dưi dưn boh tŭ mơ̆ng klei kreh knhâo kdrăp mrâo ăt msĕ mơh klei đru kơ ngăn prăk.”

Dŭm ênoh đru klă sĭt mơ̆ng Hdră “Mjing klei jăk mơak” mơ̆ng Sang êa drao sang hră gưl prŏng Y Dược Ƀuôn Ama Thuôt ngă leh klei čang hmăng kơ sa gŏ sang jăk mơak kluôm ênŭmm mơ̆ng lu hlâo ung mô̆ mâo kle hdĭp dleh dlan ti Lăn Dap Kngư. Đru hâo hưn thiăm klei đăo knang, boh kdrŭt kơ dŭm gŏ sang amâo mâo anak hlăm bruă hiu duah anak./.