Hlue si klei ksiêm yap mơ̆ng Anôk bruă ktuê dlăng klei ruă ƀuôn prŏng Hồ Chí Minh, knŏng hlăm sa hruê kăm, ƀuôn prŏng yap mâo êbeh 300 čô êngoh bi ƀlĕ êrah. Ênoh mnuih êngoh bi ƀlĕ êrah mơ̆ng akŏ thŭn 2025 truh ară anei jing giăm 6000 čô.

Hlăm sa hruê kăm, ƀuôn prŏng ăt yap mâo êbeh 300 čô mâo klei ruă jơ̆ng kngan ƀăng êgei. Hlăm ênoh mâo klei ruă jơ̆ng -kngan-ƀăng êgei yap mơ̆ng thŭn 2025 truh ară anei jing giăm 2300 čô.

 Klei čih mơ̆ng pô čih klei mrâo ti Sang êa drao mdrao hđeh mrô 2 ƀuôn prŏng Hồ Chí Minh, lu phung hđeh mơ̆ng dŭm čar hruê đih mdrao kyua phung amĭ ama rŭng răng kơ anôk mdrao nah gŭ amâo djăp klei dưi ksiêm dlăng bi mklă djŏ klei ruă.

Hlăk êjai klei ruă ƀlĕ sruê ka jih, klei ruă jơ̆ng -kngan- ƀăng êgei leh anăn klei ruă êngoh bi ƀlĕ êrah dôk mâo srăng dleh đăo knăl tơdah amâo dưi ktuê dlăng.

 Ayŏng Phạm Đức Tuấn mơ̆ng čar Bình Phước ba anak 2 thŭn nao ti ƀuôn prŏng mdrao klei ruă, wăt tơdah thâo ti alŭ wăl mâo djăp êa drao leh anăn hdră mdrao mgŭn ƀiădah nao ti Sang êa drao mdrao hđeh mrô 2 gŏ sang hơĭt ai tiê hĭn:

 “Ti alŭ wăl pô bi mklă jing klei ruă kŏng đŏk ngă êngoh, hriê tinei ksiêm mkă dôk guôn mă boh tŭ snăn anak kâo bi knhăk dŏng mdrao mjêč. Tal êlâo kâo bi mĭn bi knhăk ƀiădah leh 3-4 mmông anak kâo bi kđuč hlăm klĭt, phung nai brei nao ti anôk mdrao klei ruă ksiêm dlăng snăn lač anak kâo mâo klei ruă jơ̆ng kngan ƀăng êgei.”

Msĕ si amai, Lê Thị Huyền (čar Đồng Nai) ăt ba anak nao ti sang êa drao 2 blư̆ kyua êlâo anăn hdjul anăn brei anak đih mdrao ti êngao:

“Knăm dua mphŭn êngoh hlơr ƀiădah truh knăm pă hriê tinei ksiêm mkă, năng ai aê mdrao ƀuh hdjul anăn brei êa drao mnăm. Jih 2 hruê ƀuh anak amâo lưh ôh, pĭt bi kjhăt, hua, alah huă ƀơ̆ng leh anăn êngoh hlơr anăn ba tinei. Mdrao mgŭn hơĭt snăn hruê anei anak kâo dưi wĭt ti sang”.

Jơ̆ng kngan ƀăng êgei mâo vaccin, ƀiădah mâo leh hdră mdrao mgŭn, dŭm anôk mdrao gưl čar mâo hriăm mjuăt leh, ƀiădah rŭng răng lu đei anăn amĭ ama ba anak nao ti ƀuôn prŏng mdrao ngă kơ sang êa drao lu đei êgao hnơ̆ng.

 Hlăk êjai anăn, aê mdrao Dư Tuấn Quy, Khua Anôk mdrao klei ruă tưp- kŏ dlô, Sang êa drao mdrao hđeh mrô 1 brei thâo, klei ruă jơ̆ng kngan ƀăng êgei hruê kăm anei mâo lu klei đĭ. Ară anei, mâo 18 čô mâo klei ruă jơ̆ng kngan ƀăng êgei ti anôk mdrao ti sang êa drao, kah knar sa hruê mâo 15-20 čô mâo klei ruă jơ̆ng kngan ƀăng êgei dưi mdrao ti êngao sang êa drao, ka mâo ôh hlei pô ruă kjham.

 Sang êa drao đăo knăl hưn răng srăng lŏ wĭt mâo kyua anăn mtô bi hriăm leh hnưm phung mă bruă mdrao mgŭn, dŭm gưl čar leh anăn boh nik mprăp êa drao pioh mdrơ̆ng. Hjăn klei ruă ƀlĕ sruê, anôk mdrao ăt dôk mâo 40 čô hlăm anôk mdrao, mâo klei bi knăl hrŏ. Khădah snăn, aê mdrao mtă kơ mnuih ƀuôn sang brei tlŏ mgang ƀlĕ sruê hŏng mnuih prŏng leh anăn phung hđeh mâo 95% čiăng dưi gang mkhư̆ klei ruă êpul êya, răng mgang phung mâo klei ruă msĕ si klei ruă kboh, boh ƀleh, klei ruă brŭ.

Aê mdrao Quy ăt mtă thiăm, wưng mơ̆ng mlan 4 truh mlan 6 jing mphŭn mâo klei ruă jơ̆ng kngan ƀăng êgei leh anăn klei ruă êngoh bi ƀlĕ êrah. Kyua anăn ăt mprăp ai tiê, mđĭ ai mdrơ̆ng, tlŏ mgang hŏng dŭm mta klei ruă mâo vaccin:

“Klei ruă ƀlĕ sruê lŏ dơ̆ng tlŏ mgang, boh nik dŭm alŭ wăl brei pral ngă. Pô mtă brei tlŏ mgang tơdah hđeh mâo 6 mlan, tal êlâo brei hdơr leh anăn ngă čiăng kơ phung hđeh đăm mâo klei ruă anei, brei mđing kơ phung mâo klei ruă êlâo. Tơdah mâo leh klei dưi tlŏ mgang hlăm êpul êya amâo mâo ôh hlei pô mâo klei ruă ƀlĕ sruê snăn kơh dưi mkhư̆ jih klei ruă tưp. Tal 2, pô hâo hưn si bĕ ngă čiăng kơ mnuih ƀuôn sang thâo mơ̆ng mlan 4 truh mlan 6 yan klei ruă jơ̆ng kngan ƀăng êgei čiăng pral gang mkhư̆. Brei mnuih ƀuôn sang mđing hĭn leh anăn amâo dưi ngă ngơi mang ôh hŏng klei ruă msĕ si êngoh bi ƀlĕ êrah, ƀlĕ čut. Dŭm klei ruă mâo leh vaccin gang mkhư̆ brei mnuih ƀuôn sang tlŏ mgang, leh anăn hưn brei răng kyua ala čar drei krĭng hlơr, klei ruă srăng mâo hlăm jih thŭn”.

 Ti Sang êa drao mdrao hđeh mrô 2, aê mdrao Nguyễn Đình Qui brei thâo, wưng anei klei ruă êngoh bi ƀlĕ  êrah, jơ̆ng kngan ƀăng êgei dôk đĭ lar leh anăn phung mă bruă ăt rŭng răng hlăk êjai klei ruă tal 3 ăt srăng mâo hlăm wưng anăn mơh:

“Hjăn klei ruă ƀlĕ sruê ăt dleh dlan leh, ară anei lŏ mâo klei ruă êngoh bi ƀlĕ êrah sui hŏng anei 2-3 hruê kăm ăt đĭ mơh, phŭn knhal jih mlan anei klei ruă jơ̆ng kngan ƀăng êgei mphŭn mâo leh. Pô huĭ tlâo klei ruă anei bluh mâo sa blư̆ mtam snăn suăi snăk kơ phung mă bruă mdrao mgŭn. Ară anei brei mđĭ pral bruă hâo hưn kơ mnuih ƀuôn sang gang mkhư̆, thâo săng”.