Mơ̆ng akŏ thŭn truh kơ ară anei čar Daknông mâo leh giăm 2 êbâo čô mnuih mâo klei ruă êngoh bi ƀlĕ êrah, đĭ êbeh 8,7 blư̆ mkă hŏng thŭn dih. Klei ruă anei mâo hlăm jih jang 71 boh să, ƀuôn hgŭm, wăl krah ti Daknông. Hlăm anăn kdriêk Dakmil, Čư̆ Jŭt; Daksong lehanăn ƀuôn prŏng Gia Nghiã jing alŭ wăl mâo lu mnuih ruă hĭn. Tui si Huỳnh Thanh Huynh, k’iăng khua knơ̆ng bruă mdrao mgŭn čar Daknông, klei ruă êngoh bi ƀlĕ êrah hlăm alŭ wăl dleh dưi ksiêm dlăng, mâo hrue kăm mâo truh 170 čô mnuih ruă. Čiăng gang mkhư̆ klei bluh đĭ mơ̆ng klei ruă tưp êngoh bi ƀlĕ êrah, dhar bruă mdrao mgŭn hlăm mđĭ hĭn bruă hâo hưn, čiăng kơ jih jang mnuih mâo klei thâo săng, iêo mthưr djăp êpul bruă, bruă sang čư̆ êa mtrŭt phung ƀuôn sang nao hlăm bruă bi mdoh wăl hdĭp mda, bi mdjiê hluăt lŏk, kêč ƀloh. Huỳnh Thanh Huynh brei thâo:: Hdră tal êlâo hlăm wưng kơ anăp jing mđing mghaih msir dŭm anôk mâo klei ruă tưp, lehanăn bi mdoh wăl hdĭp mda, mbĭt hŏng anăn mđĭ bruă klam mơ̆ng dŭm gưl bruă Đảng, bruă sang čư̆ êa djăp gưl, boh nik dŭm êpul ngă bruă bi mdoh wăl hdĭp mda nah gŭ. Mbĭt hŏng anăn bruă mdrao mgŭn srăng krih êa drao mdjiê kman, mdjiê hluăt lŏk, mkhư̆ klei ruă tưp bluh đĭ. Êngao anăn lŏ mđing kơ bruă mjuăt bi hriăm mdrao mnuih ruă, lehanăn bi mâo djăp êa drao, kdrăp mdrao mgŭn tơdah mâo mnuih bruă”.

Ti Daklak, tui ênoh yap mơ̆ng anôk bruă kiă kriê klei ruă čar, mơ̆ng akŏ mlan 10 truh kơ ară anei, klei ruă êngoh bi ƀlĕ êrah hlăm alŭ wăl dleh dưi ksiêm dlăng, mnuih ruă hlăk đĭ lu, lehanăn ênoh mnuih djiê kyua klei ruă anei lu mơh. Mơ̆ng akŏ thŭn truh kơ ară anei, mâo leh êbeh 7 êbâo čô mnuih ruă. Năng mđing hĭn êdi, hlăm mlan 10 leh êgao mâo dua čô mnuih djiê kyua klei ruă êngoh bi ƀlĕ êrah.

Tui si Hoàng Hải Phúc, k’iăng khua anôk bruă kiă kriê klei ruă čar Daklak, kyua adiê hjan sui lehanăn lu hlăm dŭm hrue giăm anei, klei ruă ênoh bi ƀlĕ êrah đĭ lar mơh, dhar bruă mdrao mgŭn Daklak mđĭ hĭng leh bruă hâo hưn, mđĭ klei thâo săng kơ jih jang mnuih kơ bruă gang mkhư̆, ngă djăp bruă bi mdoh wăl hdĭp mda, bi mdjiê hluăt lŏk truh hlăm grăp boh ƀuôn, grăp boh sang:: “Anôk bruă ksiêm dlăng klei ruă čar mâo leh lu hră mơar kčĕ kơ knơ̆ng bruă mdrao mgŭn, čiăng lŏ kčĕ kơ knơ̆ng bruă sang čư̆ êa čar kiă kriê dŭm gưl dhar bruă, hlăm čar bi gang mkhư̆ klei ruă tưp. Boh nik, ngă bruă hâo hưn, snăn anôk bruă mđing bi lar hlăm hla pŏk yang ƀuôn msĕ si hlăm Zalo; Facebook mtruh hŏng jih jang mnuih thâo hlăm bruă gang mkhư̆ klei ruă tưp. Hmei ăt mâo klei mtă kơ jih jang mnuih čŏng bi răng mgang klei asei mlei pô, tơdah mâo klei bi knăl êngoh, ruă kŏ, bi êgah êmăn hlăm asei mlei, đĭ hlơr amâo mâo lưh mơ̆ng 1-2 hrue snăn nao mtam ti sang êa drao giăm hĭn”.

Yap mơ̆ng akŏ thŭn truh kơ ară anei, čar Gialai mâo leh êbeh 6 êbâo 400 čô mnuih ruă êngoh bi ƀlĕ êrah ti 287 anôk mâo klei ruă tưp hlăm dŭm boh să, ƀuôn hgŭm, wăl krah, mâo leh 1 čô mnuih djiê kyua klei ruă anei. Lu êdi jing hlăm mlan 9, ênoh mnuih mâo klei ruă êngoh bi ƀlĕ êrah đĭ pral, êbeh 2 êbâo 400 čô mnuih. Lu jing ti kdriêk Đăk Pơ, ƀuôn prŏng Pleiku, kdriêk Krông Pa... jih jang dŭm boh sang êa drao tiŏ nao leh jih mnuih ngă bruă, rơ̆ng čiăng dưi mkhư̆ jih mnuih mâo klei ruă.

Siă hŏng nah dưr lăn Dap Kngư jing čar Quảng Nam, klei ruă tưp êngoh bi ƀlĕ êrah ăt đĭ lar lu mơh. Truh kơ ară anei, čar anei mâo ênoh mnuih ruă êngoh bi ƀlĕ êrah jing lu hĭn hlăm alŭ wăl kwar krah êbeh kơ 12 êbâo 100 čô mnuih ruă, đĭ giăm 22 blư̆ mkă hŏng wưng anei thŭn dih, lehanăn mâo leh sa čô mnuih djiê. Anôk bruă   mdrao klei ruă tưp, sang êa drao prŏng alŭ wăl Dưr Quảng Nam, hlăm grăp hruê mâo mơ̆ng 40 – 50 čô mnuih êngoh bi ƀlĕ êrah. Hjăn kdriêk Đại Lộc, čar Quảng Nam, mâo hlăm brô 4 êbâo 300 čô mnuih ruă, hlăm anăn mâo 29 čô mnuih ruă đuĕ nao kơ kjham lŏ ba mdrao kơ gưl nah dlông, lehanăn 300 čô mnuih hlăk dôk mdrao ti sang êa drao alŭ wăl nah Dưr Quảng Nam.

Nguyễn Văn Văn, k’iăng khua knơ̆ng bruă mdrao mgŭn čar Quảng Nam brei thâo, ară anei, hŏng adiê jing guôp kơ kêč ƀloh ƀluh đĭ, anăp klei ruă tưp srăng lŏ prŏng hĭn. Dhar bruă mdrao mgŭn čar Quảng Nam bi mguôp hŏng knơ̆ng bruă sang čư̆ êa gưl kdriêk mkŏ mjing lu êpul ba anăp hlăm yang ƀuôn nao bi mdjiê hluăt lŏk, kêč ƀloh: “Păn kjăp bruă ksiêm dlăng, mghaih msir bi jih anôk mâo klei ruă tưp mơ̆ng phŭn tal êlâo mtam. Mbĭt hŏng anăn, grăp boh sang êa drao brei mâo klei răng nanao, đăm bi čhuai ôh klei ruă anei hŏng klei ruă mkăn. Mprăp djăp ênŭm mnơ̆ng mnuă yua, êa drao gŭn mdjiê kman hlăm dŭm anôk mâo klei ruă tưp. Grăp boh sang êa drao mprăp sơăi êdeh êdâo mdiăng mnuih ruă, dŏng mdrao mjêč pral dŭm klei ruă kjham”.

Čiăng thâo răng mgang kơ klei suaih pral pô, kơ găp djuê, lehanăn kơ jih jang mnuih riêng gah, Phŭn bruă mdrao mgŭn iêo mthưr leh kơ jih jang mnuih hlăm grăp hrue kăm kah 10 mnĭt ngă bruă bi mdjiê hluăt lŏk, kêč ƀloh, lehanăn djăp mta hdră gang mkhư̆ mkăn. Duiñ, lehanăn mkŭp jih atŏ mnơ̆ng thâo mgơ̆ng êa, jing dŏ amâo lŏ yua ôh, đăm mjing anôk kơ kêč ƀloh mboh mđai ôh. Pĭt đih hlăm mŭng, wăt êjai hrue dưn mơh, cŭt hơô čhum ao dlông păl, krih êa drao mdjiê kêč, bi mdjiê kêč lehanăn răng đăm brei kêč kĕ pô ôh./.