Ti krah adiê mđiă hlơr mơ̆ng yan adiê dôk bi mlih yan, adŭ mdrao klei ruă Anôk mdrao êdei kơ bliah, kriê dlăng klei ƀă kkiêng anak leh anăn amĭ leh kkiêng – Anôk mdrao mgŭn kdriêk Kon Braih, ăt thiăm klei suăi êmăn. Thâo săng hŏng klei dleh dlan mơ̆ng phung ruă, aê mdrao Y-Hồng Nga, êmuh ksiêm mkă kơ grăp čô mnuih. Ñu brei thâo, čiăng ksiêm mkă djŏ klei ruă, mdrao pral hlao, hŏng klei thâo, yuôm bhăn hĭn jing brei mâo mnuih ruă đăo knang:

 “Kâo jing sa čô aê mdrao, kâo jing mnuih Sêdang thâo săng lu mnuih ruă hriê ksiêm mkă, mdrao tinei dleh dlan snăk, khădah kâo gĭr nanao mjing klei găl čiăng ksiêm mkă mdrao jăk hĭn kơ mnuih ruặing mnuih djuê ƀiă. Jing sa čô aê mdrao kâo bi mklă klei tal êlâo jing brei bi leh bruă klam gưl dlông jao, hŏng mnuih ruă kâo jih ai tiê, gĭr mdrao jăk hĭn kơ digơ̆.”

 Hlăm gŏ sang ama ñu jing mnuih Sêdang, amĭ mnuih Yuăn, aê mdrao Y Hồng Nga mâo klei thâo săng kơ phung ruă jing mnuih djuê ƀiă. Čiăng đru kơ mnuih ruă hlăm hdră mdrao mgŭn, hŏng bruă klam jing Khua dlăng bruă êdam êra Anôk bruă mdrao mgŭn kdriêk Kon Braih, Y Hồng Nga mtrŭt mjhar phung êdam êra anôk bruă, leh anăn iêô jak mơ̆ng lu anôk mkŏ mjing anôk tŭk knă đru kơ mnuih knap mñai, mbha čhum ao amâo mă prăk… đru kơ mnuih ruă. Êngao anăn, dŭm gưl bi hdơr msĕ si Hruê mkŏ mjing Êpul êdam êra cộng sản Hồ Chí Minh 26/3, Hruê mtlaih êngiê kwar dhŭng 30/4, Hruê phung kahan êka êka êngiă asei 27/7… Êpul bruă êdam êra mkŏ mjing dŭm bruă hdơr knga, đru phung dleh dlan ti alŭ wăl. Pô kăp đru mdrao mgŭn Nguyễn Trần Mỹ Hạnh brei thâo, hlăm dŭm bruă ngă mơ̆ng êdam êra Anôk bruă mdrao mgŭn kdriêk Kon Braih mâo nanao klei đru mơ̆ng Khua dlăng bruă êdam êra:

 “Amai Nga jing sa čô mâo ai tiê, bruă klam hŏng bruă knuă leh anăn mnuih ruă. Êngao kơ bruă mdrao mgŭn amai Nga lŏ hriăm mbŏ klei thâo mrâo mrang. Amai Nga jih ai tiê, gĭr hgŭm hlăm bruă ngă mơ̆ng Êpul êdam êra pŏk ngaw. Amai Nga jing sa čô bi hmô kơ amai adei hlăm Êpul êdam êra Anôk bruă mdrao mgŭn tui hlue.”

Hlue si aê mdrao Nguyễn Luận, K’iăng Khua klam bruă Anôk bruă mdrao mgŭn kdriêk Kon Braih, kyua adôk kƀah truh 15 čô aê mdrao anăn dŭm mmông bi kƀĭn kơ bruă ti anôk bruă rŭng răng snăk. Aê mdrao ngă bruă hlăm anôk mdrao hlăm lam, ti êngao, ƀă kkiêng anak, mdrao hđeh, dŏng mdrao mjêč leh anăn gĭt gai mơ̆ng kbưi hŏng phung arăng ba dŏng mdrao ti dŭm anôk mdrao mgŭn să. Snăn ƀiădah aê mdrao Y Hồng Nga amâo djŏ knŏng bi leh jăk bruă klam ôh, lŏ ba anăp hlăm bruă ngă ti anôk bruă. Aê mdrao Nguyễn Luận, brei thâo:

 “Aê mdrao Y Hồng Nga mđing kơ bruă kriê dlăng klei suaih pral, ksiêm dlăng mdrao mgŭn mnuih ruă, kčĕ kơ phung ruă kơ hdră čŏng răng mgang klei suaih pral pô hlăm wưng đih mdrao leh anăn leh wĭt ti sang. Kơ bruă mkăn snăn aê mdrao Y Hồng Nga jing sa čô Khua dlăng bruă êdam êra ti anôk bruă hur har hlăm djăp mta bruă, boh nik hlăm klei myơr êrah, bruă ksiêm mkă, mdrao mgŭn đru kơ mnuih knap mñai.”

Aê mdrao Y Hồng Nga bi mklă leh klei thâo bruă leh anăn mâo lu klei khăp mơ̆ng phung ruă leh anăn phung mă bruă hlăm Anôk bruă mdrao mgŭn kdriêk Kon Braih, čar Kon Tum. Ñu čang hmăng srăng mâo klei găl nao hrăm chuyên khoa I – klei ƀă kkiêng anak čiăng mđĭ klei thâo bruă, mdrao kơ mnuih ruă ti Anôk bruă mdrao mgŭn kdriêk Kon Braih jăk hĭn./.