Chơ Chun jing să knông lăn dleh dlan ti kdriêk čư̆ čhiăng Nam Giang, čar Quảng Nam. Să anei mâo tlâo alŭ hŏng giăm 250 gŏ sang, lu hĭn jing mnuih ƀuôn sang djuê ana Cơ Tu. Thâo mâo êpul eâ mdrao Lĭng kahan knông lăn Quảng Nam mkŏ mjing klei mkă dlăng leh anăn mbha êa drao amâo mâo mă prăk ti să Chơ Chun, mơ̆ng čang rang aguah, A Viết Mư leh anăn mnuih ƀuôn sang alŭ Blăng, să Chơ Chun, kdriêk Nam Giang găn leh êlan kbưi čiăng mâo ƀô̆ mta ti anôk mkă dlăng, ñu lač:

“Yăng đar čiăng mkă dlăng klei ruă srăng nao ti dŭm sang êa drao ti ƀuôn prŏng Đà Nẵng amâodah kdriêk Đại Lộc, čar Quảng nam, ƀiădah hmei amâo mâo prăk kăk, amâo mâo êdeh êdâo, amâodah nao mkă dlăng ôh. Hruê anei mâo ayŏng adei lĭng kahan hriê mkă dlăng kơ mnuih ƀuôn sang krĭng čư̆ čhiăng knông lăn, hmei ăt ƀuh klei hơĭt leh”.

Êngao kơ mkă dlăng kluôm leh anăn mbha êa drao amâo mâo mă prăk kơ mnuih ƀuôn sang, phung nai mdrao, aê mdrao lĭng kahan knông lăn čar Quảng Nam lŏ ba dŭm kdrăp yua bruă mdrao mgŭn mrâo mrang čiăng dưi mkă dlăng leh anăn hmao ƀuh dŭm mta klei ruă mnuih ƀuôn sang krĭng čư̆ čhiăng kreh mâo msĕ si êlan prôč êhung, êlan bi êwa, kboh, aruăt êra dlô, klei ruă klang kleh…Mơ̆ng anăn, hưn kơ mnuih ƀuôn sang hdră êlan mdrao mgŭn djŏ guôp, hâo hưn, mtô lač kơ mnuih ƀuôn sang bi doh wăl hdĭp mda, gang mkhư̆ dŭm mta klei ruă tưp. Riah Pêl, khua bruă sang čư êa să Chơ Chun, kdriêk Nam Giang brei thâo, hlăm wưng êgao, mnuih ƀuôn sang ti alŭ wăl ƀrư̆ ƀrư̆ lui jih dŭm klei bhiăn mluk mgu, amâo mâo lŏ knang kơ hƀuê mjâo tơdah mâo klei ruă duam, klei k’kiêng ƀă anak…

“Bruă anei mkŏ mjing klei găl kơ phung ruă hlăm să. Mâo đa đa phung ruă kjham dưi thâo boh sĭt klei ruă leh anăn ba mdrao kơ gưl nah dlông.”

Grăp thŭn, phung aê mdrao grat mtah nao truh ti dŭm ƀuôn sang taih kbưi hĭn ti krĭng knông lăn Việt Nam – Lào čiăng mkŏ mjing lu gưl mkă dlăng klei ruă kơ mnuih ƀuôn sang. Diñu hmao dŏng mdrao lu mnuih ruă kjham, đru kơ mnuih ƀuôn sang krĭng čư̆ čhiăng Quảng Nam leh anăn mnuih ƀuôn sang čar Sê Kông, ala čar mah jiăng Lào mâo klei găl dưi mdrao mgŭn hŏng dŭm kdrăp mrâo mrang. Aê mdrao lĭng kahan knông lăn lŏ mkŏ mjing klei hâo hưn, mtô mblang kơ bruă gang mkhư̆ dŭm mta klei ruă tưp msĕ si ênoh ê’ăt, jơ̆ng – kngan – ƀăng êgei, êngoh bi blĕ êrah…phung nai êa drao, aê mdrao ngă bruă jih ai tiê, mnuih ƀuôn sang kriê dlăng, mkă dlăng klei ruă, amâo mâo lui mnuih ƀuôn sang guôn sui, brei mnuih ƀuôn sang nao mă bruă knuă. Thượng tá, Aê mdrao Lê Đức Mạnh, khua kiă kriê aê mdrao lĭng kahan knông lăn čar Quảng Nam brei thâo, lu phung dưi hmao ƀuh leh anăn mdrao klei ruă, mnuih ƀuôn sang ƀrư̆ ƀrư̆ lui jih dŭm klei bhiăn amâo mâo lŏ djŏ:

“Hŏng dŭm mta bruă jêñ jêñ msĕ sơnei, dưi đru kơ êpul lĭng kahan knông lăn čar Quảng Nam mkŏ mjing klei bi mguôp hŏng mnuih ƀuôn sang krĭng knông lăn. Mơ̆ng anei, mnuih ƀuôn sang lŏ đăo knang hĭn kơ lĭng kahan knông lăn, đru răng mgang klei dưi kiă kriê knông lăn ala čar”.

Đại tá Hoàng Văn Mẫn, Khua bruă kđi čar kdông kakan knông lăn čar Quảng Nam brei thâo, thŭn dih, ƀri wưng bi hdơr 60 thŭn mkŏ mjing klei mjĕ giăm Việt Nam – Lào leh anăn 45 thŭn hruê bi klă klei kuôl kă bi hgŭm leh anăn bi mguôp Việt Nam – Lào, Êpul bruă êdam êra Sang êa drao 199 (Phŭn bruă kahan ksiêm) bi mguôp hŏng knơ̆ng bruă yang ƀuôn Phúc Vạn Phúc leh anăn kđông kahan ƀang jang knông lăn Nam Giang, čar Quảng Nam mkŏ mjing hdră anôk mnia mblei 0 prăk Việt Nam – Lào, bi mguôp mkă dlăng klei suaih pral, mbha êa drao amâo mâo mă prăk kơ mnuih ƀuôn sang Lào ti ƀăng jang knông lăn Nam Giang, čar Quảng Nam. Phung nai mdrao, Aê mdrao sang êa drao 199, phŭn bruă kahan ksiêm jưh ti ƀuôn prŏng Đà Nẵng bi mguôp ngă bruă ksiêm mkă, hâo hưn leh anăn mbha êa drao amâo mâo mă prăk kơ jih jang mnuih ƀuôn sang nao hlăm hdră. Đại tá Hoàng Văn Mẫn, , Khua bruă kđi čar kdông kakan knông lăn čar Quảng Nam mñă klă.

“Hlăm klei mjĕ giăm bi hgŭm Việt Nam – Lào leh anăn mâo čar Quảng Nam – Sê Kông dưi lač jing klei bi hmô. Hmei dưi bi lar knhuah gru hrăm mbĭt mkŏ mjing klei bi mguôp 2 tĭng knông lăn leh anăn ƀrư̆ hruê ƀrư̆ bi hgŭm bi mguôp leh anăn bi hmô”.

Ti anôk mnia mblei hŏng ênoh 0 prăk Việt Nam – Lào, dŭm knơ̆ng bruă hrăm mbĭt, lĭng kahan knông lăn čar Quảng Nam, kđông kahan ƀang jang knông lăn Nam Giang mđup brei 700 hnư mnơ̆ng. Grăp hnư mâo ênoh 300 êbâo prăk, mâo mnơ̆ng ƀơ̆ng huă, êa mnăm, čhum ao…Mđup brei kơ mnuih ƀuôn sang Lào ti kdriêk Đăk Chưng, čar Sê Kông (Lào) dôk ti siă knông lăn Việt Nam – Lào mâo klei hdĭp dleh dlan.