Mdrao mgŭn hŏng dhar kreh, mtô bi hriăm jing kmeh gơ̆ng yuôm bhăn, amâo djŏ knŏng hnơ̆ng kčah ôh ƀiădah lŏ jing boh kdrŭt mđĭ kyar mnuih mă bruă. Anăn klei blŭ hrăm mơ̆ng Khua gĭt gai Đảng Tô Lâm tơdah Bruă kƀĭn ala bi trông hlăm êpul kơ 2 hdră kñăm ala čar kơ klei kriê dlăng suaih pral, ênoh mnuih ƀuôn sang leh anăn mđĭ kyar hdră bi mrâo mrang, mđĭ hnơ̆ng jăk mtô bi hriăm wưng 2026-2035. Hlue si Khua gĭt gai Đảng, klei kñăm ala čar amâo djŏ knŏng jing hjăn bruă sang hră mtô bi hriăm amâodah mdrao mgŭn ôh, ƀiădah jing kluôm ala ƀuôn, jih jang mnuih ƀuôn sang ngă bruă. Hŏng bruă mdrao mgŭn, Khua gĭt gai Đảng mtă brei kƀĭn kriê dlăng klei suaih pral tal êlâo leh anăn gang mkhư̆, msir mgaih jih klei kơ wăl hdĭp mda, êa doh, doh êƀăt mnơ̆ng ƀơ̆ng - klei phŭn ba klei ruă. Tơdah amâo dưi msir mgaih mơ̆ng phŭn, wăt tơdah bi liê thiăm lu sang êa drao dưn ăt kăn dưi ngă djăp mơh klei čiăng.

“ Hŏng bruă mdrao mgŭn, yuôm bhăn hĭn jing kriê dlăng klei suaih pral tal êlâo, brei gang mkhư̆. Ară anei dôk nao lu hlăm klei ksiêm mkă, msĕ si truih mdjiê klei pui ƀơ̆ng đuč- kyua hdră gang mkhư̆ awăt anăn klei ruă đĭ kyar lu. Brei bi mklă grăp mta bruă, ya klei kƀah adôk mâo? 5 thŭn kơ anăp drei srăng dưi tĭng tla mơ̆ amâodah hơăi? Brei bi klă snăn. Klei ruă hnak dlông rŏng lăn lui sui leh, ti anôk mâo klei ruă snăn gang mkhư̆ liê prăk snăk. Klei ruă tiê si ngă, si tưp lar? Kâo lač jing hdră ala čar brei ngă hlăm bruă klă klơ̆ng, kơ ya klei kñăm.”

Hdră kñăm ala čar kơ klei kriê dlăng suaih pral, ênoh mnuih ƀuôn sang leh anăn mđĭ kyar wưng 2026 - 2035 mâo Bruă kƀĭn ala bi mklă, hŏng klei kñăm kluôm jing rơ̆ng kơ grăp čô mnuih dưi kriê dlăng, klei suaih pral tal êlâo, gang mkhư̆ mơ̆ng hnưm, mơ̆ng kbưi, ti anôk bruă nah gŭ mtam, mkhư̆ klei ruă; mđĭ ênoh kkiêng, gĭr ktưn ênoh bi knar êkei mniê tơdah kkiêng, mdrơ̆ng hŏng ênoh mnuih ƀuôn sang lu phung khua thŭn, mđĭ hnơ̆ng jăk ênoh mnuih ƀuôn sang; mđĭ kriê dlăng klei suaih pral kơ dŭm êpul ênưih kpĕ êka; đru mđĭ klei suaih pral asei mlei, ai tiê, hnơ̆ng, thŭn leh anăn hnơ̆ng jăk klei hdĭp mda ala ƀuôn, mkŏ mjing ala čar Việt Nam suaih pral.

Kơ hdră êlan bi liê Hdră kñăm ala čar kơ klei kriê dlăng suaih pral, ênoh mnuih ƀuôn sang leh anăn mđĭ kyar wưng 2026 – 2035, hdră mđing kơ klei kriê dlăng suaih pral jih jang mnuih ƀuôn sang, mdrơ̆ng hŏng ênoh mnuih ƀuôn sang lu phung khua thŭn leh anăn mđĭ klei đru kơ êpul ênưih kpĕ êka. Khua phŭn bruă mdrao mgŭn Đào Hồng Lan brei thâo:

 “Kơ hdră bruă, boh phŭn ngă bruă mơ̆ng hdră, kƀĭn klei găl čiăng pŏk ngă. Boh phŭn yuôm bhăn kñăm mđĭ hnơ̆ng jăk bruă mdrao mgŭn nah gŭ, klei gang mkhư̆, mđĭ ktang bruă ênoh mnuih ƀuôn sang, mđĭ kyar rơ̆ng hnơ̆ng jăk ênoh mnuih ƀuôn sang, mdrơ̆ng hŏng ênoh mnuih ƀuôn sang mâo lu phung khua thŭn, kriê dlăng ala ƀuôn kơ phung ênưih kpĕ êka. Anei jing dŭm boh phŭn, tur knơ̆ng, phŭn mơ̆ng bruă mdrao mgŭn leh anăn ênoh mnuih ƀuôn sang, dôk čiăng kƀĭn klei găl ruh mgaih klei dleh dlan, gun kpăk hlăm hdră pŏk ngă. Dŭm klei gun kpăk kñăm dưi pŏk ngă klei kñăm hdră bruă lač leh hlăm hdră mtrŭn gưl dlông.”

Klei kñăm klă klơ̆ng mơ̆ng Hdră kñăm ala čar kơ klei kriê dlăng suaih pral, ênoh mnuih ƀuôn sang leh anăn mđĭ kyar wưng 2026 - 2035 jing đru hlue ngă klei kñăm ênoh să, ƀuôn hgŭm, wăl mâo Hnơ̆ng kčah ala čar kơ bruă mdrao mgŭn să jing 90% hlăm thŭn 2030 leh anăn 95% čiăng truh thŭn 2035. Gĭr mâo ênoh mnuih ƀuôn sang dưi čih mkra hră klei suaih pral điện tử leh anăn kriê dlăng klei suaih pral hlue si klei hdĭp mâo 100% mơ̆ng thŭn 2030. Ênoh anôk bruă ksiêm dlăng klei ruă dŭm čar, ƀuôn prŏng djăp klei găl ksiêm dlăng klei hmăi, klei dưi mdrơ̆ng hŏng klei ruă tưp huĭ hyưt, hnơ̆ng jăk êa doh, bi mdoh wăl sang hră hlue si klei kčah mtrŭn mơ̆ng Phŭn bruă mdrao mgŭn truh thŭñ 2030 mâo 100%. Ênoh anôk bruă să, ƀuôn hgŭm, wăl pŏk ngă hlue ngă hdră gang mkhư̆, kriê dlăng, mdrao đa đa klei ruă amâo tưp lar hlue si klei ktrâo lač mơ̆ng Phŭn bruă mdrao mgŭn truh thŭn 2030 mâo 100% leh anăn mđĭ lar truh thŭn  2035. Ênoh kdjuôt kdjĭng asei mlei phung hđeh ti gŭ 5 thŭn truh thŭn 2030 hrŏ adôk ti gŭ 15% leh anăn truh thŭn 2035 hrŏ adôk ti gŭ 13%.