Dŭm hruê anei, ti dŭm ƀuôn hgŭm Khánh Xuân, Thành Nhất, Tân Hòa leh anăn să Hòa Thuận, êpul bruă mdrao mgŭn ƀuôn prŏng Ƀuôn Ama Thuôt, čar Dak Lak dôk ngă bruă krih êa drao mdjiê kêč čiăng gang mkhư̆ klei đĭ lar mơ̆ng êngoh bi ƀlĕ êrah ti alŭ wăl.

Dôk nao mbĭt hŏng phung ngă bruă kriê êa drao ti anôk mrâo ƀuh mâo klei ruă ti ƀuôn hgŭm Thành Nhất, amai Đỗ Thục Vi, klam bruă gang mkhư̆ klei ruă tưp mơ̆ng anôk bruă mdrao mgŭn ƀuôn hgŭm Thành Nhất brei thâo, kyua mnuih ƀuôn sang ka ngă djŏ hdră bhiăn gang mkhư̆ klei ruă Êngoh bi ƀlĕ êrah jing phŭn agha mâo anôk mâo klei ruă:

 “Hŏng gŏ sang mâo klei ruă Êngoh bi blĕ êrah anei ƀuh mnuih ƀuôn sang ka ngă jăk bruă ti doh wăl hdĭp mda. Hmei bi mguôp hŏng bruă mdrao mgŭn alŭ wăl nao mtô bi doh wăl hdĭp mda, bi doh sang dôk, boh nik hlăm yan hjan, jing yan mâo lu êdi klei ruă Êngoh bi ƀlĕ êrah.”

Anôk bruă klei ruă Êngoh bi ƀlĕ êrah anei dưi hmao ƀih ti hruê 19/6 mrâo êngao ti gŏ sang amai Lê Thị Thuận, êlan Nguyễn Phúc Chu, ƀuôn hgŭm Thành Nhất, hŏng 3 čô hlăm gŏ sang mâo klei ruă. Hluê si amai Thuận, 3 čô amĭ anak mâo klei êngoh hlơr, čŏng mdrao ti sang amâo mâo hlao, kyuanăn nao đih sang êa drao:

 “Jih jang nao đih sang êa drao, arăng mkă dlăng êrah lač djŏ klei ruă Êngoh bi ƀlĕ êrah. Klei ruă anei hŭi hyưt kyua ênoh hlơr, leh anăn lŏ ƀlĕ êrah hlăm lam. Leh hlao klei ruă pô ăt wĭt bi doh pưk sang, ti anôk mâo êa pô srăng tuh hĕ čiăng kơ êa amâo mâo kdơ̆ng, amâo mâo brei kêč đĭ lar.”

Jing sa hlăm 3 alŭ wăl mâo ênoh mnuih djŏ klei ruă Êngoh bi ƀlĕ êrah lu hĭn ti čar Dak Lak, hŏng 84 čô, Anôk bruă mdrao mgŭn ƀuôn prŏng Ƀuôn Ama Thuôt dôk gĭt gai dŭm anôk bruă mdrao mgŭn să, ƀuôn hgŭm mgaih msir jih hnơ̆ng čiăng kơ klei ruă amâo mâo đĭ lar. Mbĭt anăn mđĭ hĭn bruă ksiêm dlăng boh sĭt klei ruă tưp, kñăm kơ dŭm anôk mâo klei ruă, anôk mâo klei huĭ hyưt mâo klei ruă čiăng hmao ƀuh hnưm phung djŏ klei ruă mrâo. Hluê si Võ Minh Hùng, khua kiă kriê anôk bruă mdrao mgŭn ƀuôn prŏng Ƀuôn Ama Thuôt, klei ruă Êngoh bi ƀlĕ êrah dôk dleh dưi ksiêm dlăng êjai ênoh mnuih djŏ hlăm mlan 6 mâo 50% ênoh djŏ klei ruă mơ̆ng akŏ thŭn truh kơ ară anei. Năng mđing hĭn, mâo leh 2 anôk mâo klei ruă ti ƀuôn hgŭm Thành Nhất leh anăn ƀuôn hgŭm Khánh Xuân.

 “Truh kơ ară anei ti ƀuôn prŏng Ƀuôn Ama Thuôt, jih jang dŭm să, ƀuôn hgŭm bi trŭn kơ bruă bi doh wăl hdĭp mda leh anăn anôk bruă mdrao mgŭn mkŏ mjing leh hdră êlan krih êa drao kơ 2 să, ƀuôn hgŭm mâo ênoh mnuih djŏ klei ruă Êngoh bi ƀlĕ êrah lu hĭn hlăm wang 3 thŭn êgao jing să Hòa Thuận leh anăn ƀuôn hgŭm Tân Hoà, hmei kčưm ngă mơ̆ng hruê kăm êlâo leh anăn srăng bi leh hlăm hruê kăm anei.”

Hluê si klei hưn mơ̆ng Anôk bruă ksiêm dlăng klei ruă tưp čar Dak Lak, truh kơ knhal jih mlan 6, hlăm čar mâo 408 čô djŏ klei ruă Êngoh bi ƀlĕ êrah. Klei ruă mâo hlăm 15/15 kdriêk, wăl krah, ƀuôn prŏng. Hoàng Hải Phúc, khua anôk bruă ksiêm dlăng klei ruă tưp čar Dak Lak brei thâo, bruă gang mkhư̆ klei ruă Êngoh bi ƀlĕ êrah dôk mâo dhar bruă mdrao mgŭn ngă mjêč:

Knơ̆ng bruă mdrao mgŭn gĭt gai anôk bruă ksiêm dlăng klei ruă tưp čar srăng ngă klei hưn mdah ti knăm 4 grăp hruê kăm. Mbĭt anăn gĭt gai sang êa drao prŏng krĭng Lăn Dap Kngư leh anăn dŭm sang êa drao prŏng ti alŭ wăl srăng hưn mdah klei ruă ti knăm 4 grăp hruê kăm čiăng kơ phung êa mdrao hmao thâo klei bi klă kơ klei đăo knăl klei ruă êngoh bi ƀlĕ êrah mrâo hĭn. Mbĭt anăn hmei ăt mđĭ hĭn bruă hâo hưn kơ mnuih ƀuôn sang srăng huă ƀơ̆ng, hdĭp doh, jah waih, bi doh wăl hdĭp mda, sang dôk grăp hruê leh anăn mâo klei bi knăl êngoh srăng nao mtam ti anôk bruă mdrao mgŭn.”

Ti Gia Lai, Anôk bruă ksiêm dlăng klei ruă tưp čar brei thâo, klei ruă Êngoh bi ƀlĕ êrah dôk bluh mâo ti jih jang 17 kdriêk, wăl krah, ƀuôn prŏng hŏng 600 čô ruă. Dŭm anôk mâo ênoh mnuih ruă lu jing ƀuôn prŏng Pleiku, dŭm kdriêk Krông Pa, Kông Chro, Đăk Pơ. Mơ̆ng akŏ thŭn truh kơ ară anei, čar Gia Lai mâo 312 anôk mâo klei ruă, hlăm anăn mâo 35 anôk ka dưi mgaih msir. Hlue si bruă mdrao mgŭn čar Gia Lai, ênoh phung djŏ klei ruă êngoh bi ƀlĕ êrah đĭ lu mơ̆ng mlan 5 leh anăn sui truh kơ ară anei, kyuadah yan hjan jing klei găl kơ kêč ƀloh đĭ lar.

Êngoh bi blĕ êrah srăng dleh dưi ksiêm dlăng hlăm wưng kơ anăp êjai mâo hjan lu, klei ap msah jing klei găl kơ hluăt lŏk, kêč ƀloh đĭ lar. Nguyễn Văn Đồng, k’iăng khua kiă kriê anôk bruă ksiêm dlăng klei ruă tưp čar Gia Lai brei thâo:

 “Anôk bruă bi mguôp hŏng dŭm kdriêk ngă bruă krih êa drao čiăng gang mkhư̆ leh anăn mgaih msir anôk mâo klei ruă Êngoh bi blĕ êrah. Bi mguôp hŏng anôk bruă mdrao mgŭn ngă bruă mdrao leh anăn kriê dlăng phung ruă. Mtô kơ mnuih ƀuôn sang, boh nik ti dŭm să mâo anôk mâo klei ruă bi doh wăl hdĭp mda čiăng mkhư̆ hluăt lŏk mơ̆ng kêč ƀloh”.

Krĭng Lăn Dap Kngư dôk mŭt hlăm yan hjan, yan găl kơ klei ruă êngoh bi blĕ êrah đĭ lar kluôm. Čiăng ksiêm dlăng klei ruă Êngoh bi blĕ êrah, mbĭt hŏng klei nao hgŭm mơ̆ng anôk bruă djŏ tuôm, grăp čô mnuih ƀuôn sang srăng thâo săng klă, êlâo hĭn jing jah wah, bi doh wăl hdĭp mda, msir hĕ dŭm anôk êa kdơ̆ng čiăng bi hrŏ klei đĭ lar mơ̆ng hluăt lŏk./.