Tui si anôk bruă ksiêm kơ klei ruă čar Gia Lai, klei ruă êngoh bi ƀlĕ êrah lŏ bluh đĭ leh truh hlăm jih jang 17 kdriêk, wăl krah, ƀuôn prŏng hŏng ênoh truh 732 čô mnuih ruă, đĭ leh 2,4 blư̆ mkă hŏng wưng anei thŭn dih. Dŭm kdriêk mâo mnuih ruă lu jing Krông Pa, Ayun Pa, Ia Pa lehanăn ƀuôn prŏng Pleiku.

         Ăt tui si anôk bruă mdrao mgŭn čar Gia Lai, êngoh bi ƀlĕ êrah srăng lŏ dơ̆ng đĭ nanao, kyua hlăm wưng kơ anăp dleh dôk thâo tĭng knăl mơ̆ng adiê hjan lu, hnơ̆ng h’uh h’ăp, jing anôk jăk snăk kơ hluăt lŏk lehanăn kêč ƀloh hdĭp mda. Kyuanăn, mbĭt hŏng klei gĭr mơ̆ng dhar bruă mdrao mgŭn, snăn jih jang mnuih ƀuôn sang brei thâo răng mgang kơ klei suaih pral pô. Đinh Hà Nam, k’iăng khua knơ̆ng bruă mdrao mgŭn čar Gia Lai, lač:

“Kơ bruă mdrơ̆ng hŏng klei ruă tưp êngoh bi ƀlĕ êrah, snăn brei mâo klei thâo uêñ mđing, hŏng hdră bi mdoh amâo mâo anôk kơ hluăt lŏk hdĭp ôh. Sitôhmô, giêt tŏ, pông êdeh, tơdah tuôm hŏng adiê hjan hlăm dŭm mnơ̆ng anăn jing dŏ êa kdơ̆ng anôk kêč ƀloh mboh. Mơ̆ng hrue kjêč mboh truh jing hluăt lŏk lehanăn kčeh jing kêč hlăm brô 10 hrue, snăn klei krih êa drao mdjiê kêč ƀloh snăn wưng tŭ dưn mơ̆ng êa drao knŏng hlăm brô 48h. Tơdah mâo mnuih êngoh bi ƀlĕ êrah snăn nao băng kơ sang êa drao mtam mkă dlăng lehanăn mdrao mgŭn”.

Ti čar Daklak, klei ruă êngoh bi ƀlĕ êrah ăt hlăk dôk đĭ lêč, anăp truh kơ klei jing klei ruă tưp prŏng tơdah adiê čhuang nao hlăm yan hjan leh êjai anăn čar dôk kƀah êa drao krih mdjiê kêč hluăt lŏk. Mơ̆ng akŏ thŭn truh kơ ară anei kluôm čar Daklak mâo leh truh 283 čô mnuih mâo klei ruă. Mkă hŏng mlan 4, đĭ hĭn êbeh 40 čô mnuih ruă, mâo 3 anôk mâo klei ruă tưp jing ti kdriêk Ƀuôn Đon, Krông Hnang lehanăn Krông Ana.

        Anôk kiă kriê bruă mdrơ̆ng hŏng klei ruă tưp čar Daklak mâo leh klei gĭt gai djăp êpul êya bi ksiêm dlăng, hmao ƀuh pral lehanăn mghaih msir mtam dŭm anôk mâo klei ruă tưp, gang mkhư̆ klei tưp lar truh hlăm yang ƀuôn, ksiêm bi nik ti anôk jing mâo leh klei ruă tưp snăn akâo bruă mkăp êa drao krih mdjiê hluăt lŏk lehanăn kêč ƀloh, kñăm dưi gang mkhư̆ klei ruă tưp êngoh bi ƀlĕ êrah. Lehanăn mâo klei hâo hưn mtă mtăn, mtrŭt mjhar mnuih ƀuôn sang bi mdoh wăl hdĭp mda, mdjiê kêč ƀloh, hluăt lŏk, gang mkhư̆ klei ruă tưp êngoh bi ƀlĕ êrah hlăm gŏ sang pô.

        Tui si aê mdrao Lê Phúc, K’iăng khua anôk bruă kiă kriê klei ruă čar Daklak, klei dleh dlan hlăm bruă gang mkhư̆ klei ruă tưp êngoh bi ƀlĕ êrah ară anei jing kƀah êa drao mdjiê kman, lehanăn kƀah ngăn prăk, lehanăn ka ruah mơh êpul bruă blei êa drao.

“Ară anei klei kơ êa drao mdjiê kman ka mâo ôh, hmei hlăk dôk akâo kơ Anôk bruă ksiêm duah kơ klei ruă tưp krĭng Lăn Dap Kngư đru brei mâo sa kdrêč kñăm čiăng dưi mkhư̆ ti anôk mâo klei ruă tưp bluh đĭ. Kčưm mŭt hlăm yan hjan leh, ăt jing yan kêč ƀloh hlăk dơ̆ng đĭ lêč mơh, ară anei mâo leh ti đa đa kdriêk čŏng dơ̆ng krih leh êa drao mdjiê kman, jing prăk mơ̆ng kdriêk pô, kñăm đru bi hrŏ klei đĭ lêč mơng klei ruă tưp”.

Čar Khánh Hòa bi knông hŏng čar Daklak lehanăn čar Lâm Đồng, snăn klei ruă tưp êngoh bi ƀlĕ êrah hlăk dleh dưi ksiêm dlăng mơh. Yap mơ̆ng akŏ thŭn truh kơ ară anei, čar Khánh Hòa mâo leh êbeh 1.100 čô mnuih mâo klei ruă êngoh bi ƀlĕ êrah hlăm anăn mâo leh sa čô mnuih djiê. Ênoh mnuih mâo klei ruă êngoh bi ƀlĕ êrah đĭ   êbeh kơ 6 blư̆ mkă hŏng wưng anei thŭn dih Bruă mkhư̆ gang klei ruă tưp ti čar Khánh Hòa adôk tuôm hŏng lu klei dleh dlan, kyua bruă kiă kriê, hmao ƀuh bŏ hŏng klei êmưt, mghaih msir gang mkhư̆ anôk mâo klei ruă tưp êdu. Lu mnuih ƀuôn sang amâo mâo klei uêñ mđing čŏng nao duah blei mă êa drao hjăn pô mdrao klei ruă, ba klei dleh dlan hlăm klei kñăm čiăng thâo ƀuh pral, lehanăn gang mkhư̆ anôk mâo klei ruă tưp. Jih jang bruă mdjiê hluăt lŏk kêč ƀloh ti alŭ wăl adôk êmưt, knŏng ngă mă khă kơ leh.

         Aê mdrao Tôn Thất Toàn, K’iăng khua anôk bruă kiă kriê klei ruă tưp čar Khánh Hòa lač, bruă mdrao mgŭn lŏ dơ̆ng hgŭm hŏng djăp êpul êya bruă, alŭ wăl mâo klei hâo hưn, mtô mblang lu hĭn, ngă mtam bruă mdjiê hluăt lŏk kêč ƀloh ti dŭm alŭ wăl anôk ênưih mâo klei ruă tưp bluh đĭ. Dŭm boh sang êa drao mđĭ hĭn bruă ksiêm dlăng, pral dưi thâo ƀuh, mghaih msir hĕ jih jang dŭm anôk mâo klei ruă tưp, kñăm bi hrŏ ênoh mnuih ruă lehanăn djiê mơ̆ng klei ruă anei. Aê mdrao Tôn Thất Toàn mtă:

 “Mâo lu snăk gŏ sang mgơ̆ng êa hlăm brŏng, năng brei mâo klei rao bi mdoh, mdjiê hĕ hluăt lŏk, bi mdoh jih jang mnơ̆ng đuôm gam bi mčhŏ mtih mgơ̆ng êa, hlăm hmăm. Kđăl hĕ bi krĭp mnơ̆ng mgơ̆ng êa, čiăng đăm mâo ôh êlan kêč ƀloh đĭ lêč. Mnuih ƀuôn sang tơdah mâo klei bi knăl đĭ êngoh snăn nao băng kơ sang êa drao mtam. Amâo mâo jăk ôh klei čŏng nao blei mă pô êa drao mnăm kơ sang, mơ̆ng anăn mâo lu snăk klei ruă đuĕ nao kơ kjham, mmông anăn ba kơ sang êa drao, snăn klei ruă jing dleh ktrŏ huĭ hyưt snăk”./.