Leh huă mmăt, PhạmThị Dự (ti Hưng Yên) ƀuh ruă kŏ, čiăng ƀlĕ ô̆, ruă hlăm ală. Leh sa mlam klei bi knăl ruă kjham hĭn, ală ruă ktang hĭn, kyua anăn phung hlăm sang ba ñu nao ti Sang êa drao mdrao ală  gưl dlông čiăng ksiêm mkă. Leh mâo phung aê mdrao ksiêm dlăng. Dự thâo pô mâo klei ruă  Glôcôm (khăng pia jing klei ruă hlăm lam ală, amaoadah klei ruă mmăt ală):“Kâo bi mĭn pô hdrak ngă đuč, ñu mâo hlăm lam, pô amâo bi mĭn ôh jing klei ruă hlăm ală. Msĕ si čiăng kblač hlăm ală, ruă kŏ snăk, mmăt ală mta, leh anăn ruă hlăm lam ală, amâo dưi lŏ dôk ôh, mnăm êa drao kăn hrao rei. Phung aê mdrao brei yua lazer leh anăn mnăm êa drao, ktuê dlăng 2 hruê kăm. Khădah snăn, leh 2 hruê kăm mdra, lŏ nao ksiêm mkă, ală kâo ăt kăn hlao mơh kyua anăn aê mdrao bi mklă bliah”.

Hŏng klei bi knăl ruă kŏ, ruă ală msĕ si Dự,  pô ruă mda asei Đỗ Thị Lan Hương (ti Hải Phòng) ƀuh hroh ai tiê leh mâo klei rưa Glôcôm. Êlâo anăn, amai Hương ăt ka tuôm mâo ôh ya klei ruă kơ ală, êngao kơ măt ală ƀiă, tăp năng êgah ƀiădah knŏng jing klei bi knăl aguah tlam leh anăn čŏng hlao:“Tal êlâo kâo rŭng răng snăl, khăng bi mĭn klei amâo jăk, leh ksiêm mkă hŏng phung aê mdrao tinei kâo hơĭt ai tiê hĭn.  Êlâo hĭn  jih wưng mjêč kâo dưi mdrao hŏng êa drao mnăm, ksiêm dlăng grăp hruê kăm, grăp mlan kơ mnuih ruă, khădah snăn kyua klei ruă amâo thâo hlao hlue hruê mmông kyua anăn amâo dưi hlao ôh, leh anăn allă kâo amâo hơĭt ôh snăn brei bliah”.

Hlue si phung  aê mdrao, Glôcôm jing sa klei ruă mâo mta phŭn jing mđĭ klei kpĭ hlăm ală ngă êka aruăt thâo ƀuh ngă truh kơ klei hroh hnơ̆ng dưi dlăng leh anăn bum ală. Klei ruă Glôcôm ăt jing klei ruă ngă lu mnuih bum ală knŏng leh asăr lă mâo klĭt hruôm. Tơdah amâo hmao ƀuh leh anăn mdrao mgŭn hnưm, klei thâo ƀuh mnuih ruă srăng ƀrư̆ ƀrư̆ hroh truh kơ klei bum ală lă lar leh anăn amâo dưi hlao ôh.

 Aê mdrao Nguyễn Thị Thanh Hương, anôk mdrao klei ruă Glôcôm, Sang êa drao mdrao ală gưl dlông brei thâo, čiăng thâo ƀuh hnưm leh anăn dưi ksiêm dlăng klei ruă Glôcôm, knŏng hŏng klei ksiêm mkă:“Tal sa jing phung mâo găp djuê hlăm gŏ sang mâo klei ruă anei; phung mâo klei ruă kluôm asei mlei msĕ si hnơ̆ng êrah đĭ, mâo mta mmih hlăm êrah, klei ruă gut, klei ruă hlăm klang… Phung mâo klei ruă hlăm hnơ̆ng êrah đĭ, mâo mta mmih hlăm êrah brei nao ksiêm mkă grăp gưl čiăng ksiêm dlăng ală, gang mkhư̆ klei truh kơ klei ruă Glôcôm. Boh nik lu phung khua thŭn khăng yua êa drao hŏng hla kyâo… ênưih mâo klei ruă Glôcôm kjham leh yua êa drao anei. Êngao anăn, phung mda asei mâo klei mmăt ală ktang ƀiădah hnơ̆ng đĭ pral ăt brei ksiêm dlăng klei ruă Glôcôm kyua lu phung đĭ hnơ̆ng mmăt ală pral mâo leh klei ruă Glôcôm. Phung anei brei nao ksiêm mkă bi hnưm”.

 Hŏng phung mâo ksiêm mkă klei ruă Glôcôm, mnuih mâo klei ruă brei hdĭp mbĭt hŏng klei ruă jih klei hdĭp, leh anăn klei mmăt ală jing amâo dưi hlao ôh; kyua anăn, bruă brei ksiêm dlăng mdrao mgŭn jing yuôm bhăn snăk. Phung ruă brei mdrao hŏng êa drao djŏ mmông, ksiêm mkă djŏ mmông kčah, amâo čŏng yua êa drao čiăng krơ̆ng hnơ̆ng dưi thâo ƀuh, ñĕ kơ klei bum ală./.