Sang êa drao mdrao klei ruă phung hđeh mrô 1 ti Ƀuôn prŏng Hồ Chí Minh mâo dŏng hdĭp sa čô hđeh mniê 12 thŭn, dôk ti čar Trà Vinh, mâo klei ruă êngoh bi ƀlĕ êrah kjham mâo mbĭt hŏng kbiă êrah êlan prôč tian, kluh êrah. Aê mdrao Phạm Văn Quang- Khua adŭ dŏng mdrao mjêč, Sang êa drao mdrao klei ruă phung hđeh mrô 1 brei thâo, anei jing pô ruă êngoh bi ƀlĕ êrah kjham kyua luič lu êrah, mdê hŏng lu phung ruă mkăn kreh mâo klei ruă anei mbĭt hŏng klei ruă amâo jăk ti kboh, boh ƀleh. Tơdah mŭt dŏng mdrao êla, hđeh anei huĭ srăng kjham truh kơ djiê.

 “Klei ruă êngoh bi ƀlĕ êrah ba lu klei amâọăk hlăm êrah kyua anăn ĕ anei kluh êrah lu. Tal dua jing kyua hđeh anei kbiă êrah êlan prôč tian snăn hmei hluê ngă hdră nội soi mjêč. Klei ruă êbgoh bi ƀlĕ êrah kjham pô knŏng thâo krơ̆ng êrah kbiă ti anôk kbiă lu, bi dŭm anôk mkăn ăt kbiă, gĭr tlŏ êa drao čiăng krơ̆ng êrah. Leh kơnăn hmei bi trông hŏng Sang êa drao ksiêm hriăm kơ êrah čiăng tlŏ dŭm mta êa drao mrâo kñăm đru kơ hđeh anei.

Sang êa drao mdrao klei ruă phung hđeh Ƀuôn prŏng ăt mrâo dŏng hdĭp sa čô hđeh 5 mlan mâo klei ruă êngoh bi ƀlĕ êrah kjham, amâo mâo hlăm hlăm êrah. Êlâo anăn, hđeh anei êngoh 3 hruê, mâo bi mklă ksiêm dlăng klei ruă jơ̆ng kngan ƀăng êgei ti anôk bruă mdrao mgŭn êngao knŭk kna. Truh hruê tal 4, khădah amâo lŏ êngoh, ƀiădah hđeh anei pĭt nanao, asei mlei ƀô̆ mta ơ̆ng, awăt, ƀlĕ ô̆ jŭ, mâo klei bi êdah êkŏ êrah kjham. Kyua dŏng mdrao mjêč hŏng êa drao, dŭm mta êrah mbŏ lehanăn đru bi êwa, leh 3 hruê, hđeh anei êgao leh wưng huĭ hyưt.

Aê mdrao Nguyễn Minh Tiến, Kơiăng khua Sang êa drao mdrao klei ruă phung hđeh Ƀuôn prŏng brei thâo, klei anei dôk mđĭ klei răng kơ klei ruă êngoh bi ƀlĕ êrah ti phung hđeh điêt.

Brei drei mđĭ klei răng, aê mdrao mtă kơ mnuih ruă tơdah mâo klei bi êdah msĕ si ruă tian, amâo jăk hlăm asei mlei, kbiă êrah ƀăng adŭng, kbiă êrah gŭ jơ̆ng êgei, jơ̆ng kngan ê’ ăt, hđeh dôk đih sa anôk amâo lêñ, ô̆ kbiă êrah, eh jŭ. Ƀuh mâo dŭm klei bi êdah anei, brei drei ba mtam hđeh kơ sang êa drao, wăt hŏng mnuih ruă prŏng drei ba nao mơh.

Ti  Sang êa drao mdrao klei ruă phung hđeh mrô 2, ênoh hđeh mâo klei ruă êngoh bi ƀlĕ êrah đĭ êbeh 2 blư̆ mkă hŏng hruê kăm êlâo. Amai Nguyễn Thị Lan, dôk kriê dlăng anak điêt ti Sang êa drao mdrao klei ruă phung hđeh mrô 2 brei thâo, jih 3 čô anak mâo klei ruă êngoh bi ƀlĕ êrah sơaĭ.

“Sang kâo mâo sa bŭ dưm êa, yan mdei prŏng, phung hđeh dôk ti sang amâo mâo anôk hiu ôh. Anak khua kâo amâo bi mĭn djŏ klei ruă êngoh bi ƀlĕ êrah ôh. Truh hruê tal dua ksiêm mklă dlăng đing mâo klei ruă anei. Dŭm čô anak kâo ăt đing mâo klei ruă êngoh bi ƀlĕ êrah mơh”.

Hluê si Anôk bruă ksiêm dlăng klei ruă tưp mơ̆ng ƀuôn prŏng Hồ Chí Minh, mơ̆ng akŏ thŭn truh kơ ară anei, ênoh phung hđeh mâo klei ruă êngoh bi ƀlĕ êrah Dengue đĭ leh giăm 3 blư̆ mkă hŏng wưng anei thŭn 2024 (đĭ giăm 4000 čô ruă). Dŭm sang êa drao čih yap giăm 300 čô ruă kjham, hlăm anăn êbeh mkrah wah jing mơ̆ng čar, ƀuôn prŏng mkăn ba dŏng mdrao mjêč. Ară anei, ƀuôn prŏng ka mâo mnuih ruă êngoh bi ƀlĕ êrah djiê.

Knơ̆ng bruă mdrao mgŭn ƀuôn prŏng Hồ Chí Minh hưn brei răng, wưng bluh đĭ mơ̆ng klei ruă êngoh bi ƀlĕ êrah mphŭn kčưm mơ̆ng akŏ mlan 6 lehanăn tĭng srăng sui kơ jih mlan 10 grăp thŭn. Čiăng pral mâo hdră mdrơ̆ng hŏng klei ruă tưp, bi hrŏ ênoh mnuih ruădjiê, dŭm êpul êya bruă lehanăn jih jang mnuih ƀuôn sang bi hluê ngă hdră gang mkhư̆, mdrơ̆ng hŏng klei ruă êngoh bi ƀlĕ êrah  Dengue.

Anôk bruă mdrao mgŭn iêu mthưr mnuih ƀuôn sang hluê ngă kjăp hdră gang mkhư̆ hŏng klei ruă. Klă klơ̆ng, guôm, kđăl jih mnơ̆ng dưm êa, hrui mƀĭn lehanăn hwiê jih mnơ̆ng amâo lŏ yua msĕ si bŭ mnga, bŭ dưm ana kyâo bi msiam pưk sang, pông êdeh hđăp huĭdah mjing anôk kơ kêč ƀloh, hluăt lŏk dôk….

Hluê ngă hdră bi mdoh wăl hdĭp mdadjieue gah pưk sang, pĭt kă mŭng, ba yua kpŭng krem, êa drao kjhĭt kêč, giê pah kêč. Tơdah êngoh, brei nao mtam kơ anôk bruă mdrao mgŭn ksiêm mkă dlăng, amâo čŏng mdrao ti sang./.