Anôk bruă dŏng mdrao gang mkhư̆ mta ruă Sang êa drao prŏng ƀuôn prŏng Ƀuôn Ama Thuôt dăp 6 6 jhưng đih leh anăn 5 jhưng dŏng mdrao mprăp tŭ drông phung ruă hlăm wưng tết. Aê mdrao Trần Thanh Quý, k’iăng khua kiă Anôk bruă dŏng mdrao gang mkhư̆ mta ruă brei thâo:

“Anôk bruă mâo leh klei mprăp sa wơng mă bruă mâo 1 čô aê mdrao leh anăn 2 čô nai mdrao leh anăn mă ƀruă 24/24 mprăp bi mdrơ̆ng hŏng klei tăm mâo, boh nik tơdah mâo klei djŏ ƀơ̆ng mta bruă ăt msĕ mơh klei truh hlăm êlan klông hlăm wưng tết”.

Sang Êa drao prŏng Lăn Dap Kngư, hŏng bruă klam jing sang êa drao knhal tuč mơ̆ng alŭ wăl Lăn Dap Kngư, dôk nanao hlăm klei mprăp bi mdrơ̆ng hŏng dŭm klei dŏng mdrao kjham leh anăn dŭm boh klei mjêč. Aê mdrao Nguyễn Doãn Sơn, k’iăng khua anôk bruă dŏng mdrao brei thâo, hlăm wưng tết, ênoh phung ruă năng ai srăng đĭ êbeh 50% mkă hŏng hruê yang đar, boh nik phung klei êka kjham kyua klei truh hlăm êlan kloong, klei ruă hlăm kboh leh anăn klei ruă êbuh.

“Hmei srăng mđĭ thiăm ênoh mnuih mă bruă, mđĭ thiăm 1 gưl dŏng mdrao, 1 gưl mđĭ thiăm leh anăn 1 gưl mkăp kơ dŭm boh klei tăm mâo msĕ si ênoh phung ruă lu amâodah dŭm klei truh srăng tiŏ nao mtam. Êngao kơnăn răng ngă gưl ngă bruă ti anôk bruă, tơdah mâo klei čiăng hmei srăng tiŏ nao 1 čô aê mdrao, 2 čô nai mdrao nao dŏng mdrao mtam”.

Mbĭt hŏng čŏng pô mnuih mă bruă, mnơ̆ng yua leh anăn êadrao gŭn, Sang êa drao prŏng Lăn Dap Kngư ăt kñăm kơ bruă kriê dlăng kơ klei hdĭp leh anăn ai tiê hŏng phung ruă hlăm wưng phung ruă đih sang êa drao hlăm wưng Tết. Aê mdrao Nguyễn Ngọc Thịnh, k’iăng khua kiă kriê sang êa drao brei thâo:

 “Jih jang dŭm anôk bruă hmei mtă brei bi hrŏ klei mdei čiăng kñăm kơ bruă kriê dlăng klei suiah pral jăk hĭn kơ phung ruă, bi hŏng anôk bruă dŏng mdrao eh anăn krŭ wĭt ai ktang srăng mă bruă 24/24. Hlăm wưng tết anei hmei mkŏ mjing knăm mnia bmlei kơ phung ruă dleh dlan, sitôhmô đru brei braih, êa prăi, êa ksâo, sĭk čiăng kơ phung ruă mâo tết trei mđao.

Amâo djŏ knŏng sang êa drao gưl čar, dŭm anôk bruă mdrao mgŭn kdriêk ăt mprăp klă kơ wưng Tết Nguyên Đán. Aê mdrao Lê Thị Thủy, khua anôk bruă mdrao mgŭn kdriêk Mdrak, brei thâo:

“Êpul khua kiă kriê gĭt gai jih jang dŭm anôk bruă mdrao mgŭn să hlăm bruă mprăp dŭm mta phŭng rơ̆ng kjăp bruă kriê dlăng mnuih ruă hlăm 2 gưl , hŏng wăl krah čŏng pô ngă hrăm mbĭt dŭm mta phŭn djŏ tuôm hŏng êa drao, mnơ̆ng yua leh anăn tiŏ nao mnuih mă bruă rơ̆ng kơ klei dŏng mdrao êlâo hlăm leh anăn êdei tết nguyên đán.

Msĕ sơnăn, ti anôk bruă mdrao mgŭn kdriêk Ea Sup, aê mdrao Nguyễn Viết Hữu, khua kiă kriê anôk bruă ăt mñă klă:

 “Hmei amâo mâo dăp klei akâo mdei wưng knhal jih thŭn leh anăn Tết, rơ̆ng kơ ênŭm mnuih mă bruă, ngă bruă mkă dlăng klei ruă đru kơ mnuih ƀuôn sang hlăm wưng Tết”.

Bruă mdrao mgŭn čar Dak Lak mâo leh hdră êlan mprăp mơ̆ng dŭm anôk bruă gưl čar truh kơ kdriêk, rơ̆ng kơ bruă mkă dlăng klei ruă leh anăn dŏng mdrao. Aê mdrao Nguyễn Hữu Vũ Quang, k’iăng khua knơ̆ng bruă mdrao mgŭn brei thâo:

 “Knơ̆ng bruă mdrao mgŭn mâo leh hră mơĭt kơ dŭm anôk bruă dăp mnuih mă bruă, êa drao ênŭm mơ̆ng kdriêk truh kơ čar. Dhar bruă mdrao mgŭn mprăp drông jŭm jih jang phung ruă hriê ti anôk bruă mdrao mgŭn hlăm wưng tết. Mă bruă msĕ hŏng gak răng ti knông lăn.”

Hŏng klei mprăp klă nik leh anăn ai tiê bruă klam mơ̆ng êpul nai aê mdrao, bruă mdrao mgŭn čar Dak Lak mprăp leh bruă bi mdrơ̆ng hŏng grăp boh klei mâo hlăm dŭm hruê tết. Wăt kơ dŏng mdrao amâodah kriê dlăng mnuih ruă, phung aê mdrao ăt jih ai tiê, ba wĭt sa wưng tết êđăp ênang kơ mnuih ƀuôn sang.