Ti Anôk bruă mdrao mgŭn lĭng kahan mnuih ƀuôn sang krĭng Phú Quý, grăp hruê mâo dŭm êtuh čô mnuih nao ksiêm mkă dlăng lehanăn mdrao klei ruă. Dŭm thŭn giăm anei, anôk bruă mdrao mgŭn ti plao ksĭ anei mâo leh klei bi mlih klă sĭt hŏng bruă duh thiăm kdrăp maĭ mŏk, pŏk mlar hdră mdrao, krĭng mdrao lehanăn mđĭ boh tŭ hdră mdrao mgŭn tinei. Lu mnuih ruă êlâo adih kreh ba ưĭt ti lăn hang mdrao ară anei dưi ksiêm mkă dlăng, mdrao ti plao ksĭ anei mtam, đru kơ mnuih ƀuôn sang bi hrŏ ênoh bi liê, wưng êrô êbat. Nguyễn Văn Hai, ti alŭ Quý Hải brei thâo, mkă hŏng êlâo adih, hdră ksiêm mkă dlăng klei ruă tinei jăk găl hĭn, êpul nai aê mdrao jăk ênang, thâo, mjing klei đăo knang kơ mnuih ƀuôn sang.

 “Ară anei kâo nao ksiêm mkă dlăng, êa mdrao jăk, mơak hlak, ksiêm dlăng mbha êa drao kơ mnuih ƀuôn sang. Mkă hŏng êlâo adih, ară anei đĭ kyar leh. Knŏng mnuih ruă ktrŏ kơh nao ba kơ lăn hang, kyua lu hdră mdrao klei ruă ktrŏ tinei ăt adôk kƀah mơh”.

Hdră ksiêm mkă mdrao klei ruă ti krĭng Phú Quý ară anei dưi mkăp djăp hŏng klei čiăng mơ̆ng mnuih ƀuôn sang. Khă snăn, hŏng klei ruă ktrŏ msĕ si êbuh đih, dăl êruăt êrah kboh amâo dah êka kjham lu anôk, klei thâo dŏng mdrao tinei ăt kƀah mơh. Hlăk êjai anăn, bruă atăt ba mnuih ruă wĭt ti lăn hang kreh tui hluê hlăm klei mâo yan adiê lehanăn hruê mmông hô̆ mran wĭt kơ lăn hang, đa đa djŏ mmông kreh mdiăng hŏng êdeh phiơr dakwak čiăng ba wĭt mnuih ruă nao mdrao.

Hluê si Aê mdrao Bùi Thị Hảo, Kơiăng khua Anôk bruă mdrao mgŭn lĭng kahan mnuih ƀuôn sang krĭng Phú Quý, klei čiăng mjêč ară anei jing mđĭ klei thâo dŏng mdrao tinei kñăm ba yua “mmông yuôm bhăn” dŏng hdĭp mnuih ruă. Ară anei, anôk bruă ăt kƀah dŭm adŭ mdrao thơ̆ng mdê mdê, boh nik jing adŭ dŏng mdrao mjêč, mdrao kboh lehanăn kŏ dlô. Čiăng msir mghaih klei anei, Anôk bruă bi hgŭm hŏng Sang êa drao prŏng Bạch Mai iêo jak phung thơ̆ng kơ bruă nao bi hriăm kơ hdră dŏng mdrao mjêč, klei ruă êbuh đih kơ êpul knuă druh alŭ wăl.

 “Ară anei anôk bruă mâo leh Sang êa drao prŏng Bạch Mai đru mjuăt bi hriăm amâo mă prăk kơ sa êkip thơ̆ng kơ hdră mdrao êbuh đih, hlăm anăn mâo sa čô aê mdrao lehanăn knuă druh mdrao mgŭn. Mrâo êgao, Knơ̆ng bruă mdrao mgŭn ăt duh sa kdrăp masin CT msir mghaih klei ruă êbuh đih. Sang êa drao Bach Mai ăt đru kơ sa êpul kăp đru kčĕ online, bi mklă hdră ksiêm mkă dlăng mơ̆ng kbưi, đru kơ anôk bruă pral msir mghaih dŭm hdră dŏng mdrao mjêč.

Huỳnh Thị Phương Duyên, Khua knơ̆ng bruă mdrao mgŭn čar Lâm Đồng brei thâo, krĭng Phú Quý mâo 121 čô knuă druh bruă mdrao mgŭn, hlăm anăn mâo 29 čô aê mdrao. Hŏng êpul aê mdrao anei, anôk bruă mdrao mgŭn dưi mkăp djŏ hŏng klei čiăng ksiêm mkă dlăng mdrao klei ruă kơ mnuih ƀuôn sang ti plao ksĭ, êpul djă phao ktuang lehanăn mnuih hiu trah mă kan.

Khă snăn, ti anăp klei čiăng ƀrư̆ hruê ƀrư̆ đĭ, boh nik hlăk Phú Quý dôk mtrŭt mđĭ hdră hiu čhưn ênguê, anôk bruă mdrao mgŭn Lâm Đồng dôk mđing mđĭ klei thâo dŏng mdrao, boh nik adŭ dŏng mdrao mjêč. Hluê si Huỳnh Thị Phương Duyên, Knơ̆ng bruă mdrao mgŭn dôk ba mdah hdră mkra mđĭ anôk bruă nah gŭ lehanăn blei thiăm kdrăp mnơ̆ng kñăm mkăp jăk hĭn kơ hdră dŏng mdrao ti krĭng ksĭ, plao ksĭ.

 “Klei năng mơak jing 100% knuă druh bruă mdrao mgŭn ti Phú Quý mâo Anôk bruă dŏng mdrao mjêč klei ruă êbuh đih Sang êa drao prŏng Bach Mai mjuăt bi hriăm kơ hdră dŏng mdrao klei ruă lehanăn mâo mkăp hră bi mklă. Mbĭt anăn, sang êa drao Bạch Mai ăt ƀuăn đru prăk bi liê hriăm mjuăt kơ Phú Quý truh thŭn 2028”.

Bruă mđĭ hĭn mnuih mă bruă, mjuăt bi hriăm klei thâo êlam hĭn lehanăn duh kơ maĭ mŏk amâo djŏ knŏng đru mđĭ hnơ̆ng tŭ bruă ksiêm mkă dlăng klei ruă kơ mnuih ƀuôn sang ti krĭng Phú Quý ƀiădah lŏ đru rơ̆ng klei êđăp ênang, suaih pral kơ mnuih hiu trah mă kan lehanăn phung tuê hiu čhưn ti krĭng plao ksĭ kbưi hŏng lăn hang anei. Anei ăt jing sa knhuang mprăp yuôm bhăn čiăng kơ hdră mdrao mgŭn Phú Quý mkăp jăk hĭn kơ dŭm boh klei mjêč ti krĭng plao ksĭ anei./.