Anôk gĭt gai mlir dhar bruă Gưl dlông mkŏ mjing leh 5 êpul mlir dhar bruă kƀĭn hlăm bruă mđĭ ksiêm dlăng mlir dhar bruă mơ̆ng gưl dlông truh gưl să hlăm gưl Tết Nguyên đán Ất Tỵ leh anăn knăm mơak yan mnga 2025. Mbĭt anăn mtă kơ dŭm alŭ wăl, mkŏ mjing êpul ksiêm dlăng dŭm gưl, mơ̆ng čar truh ti să. Iêô mkrum jih hnơ̆ng hdră hâo hưn mtô mblang kơ hdră bhiăn doh êƀăt mnơ̆ng ƀơ̆ng ăt msĕ mơh klei thâo hlăm klei ruah, kriê dlăng, mkra mjing leh anăn ba yua mnơ̆ng ƀơ̆ng truh kơ mnuih ƀuôn sang. Hlue si Phŭn bruă lŏ hma leh anăn mđĭ kyar krĭng ƀuôn sang, gưl Tết Nguyên đán jing wưng klei čiăng yua mnơ̆ng ƀơ̆ng lu, boh nik jing gưl mnơ̆ng dhơ̆ng mơ̆ng kđeh čĭm đĭ lu, Phŭn bruă bi hgŭm leh hŏng dŭm anôk bruă djŏ tuôm mkŏ mjing 9 êpul ksiêm dlăng, kriê dlăng anôk čuh tă mnơ̆ng dhơ̆ng, ksiêm dlăng klei mdrao mgŭn hlô mnơ̆ng ti 17 čar, ƀuôn prŏng, boh nik ksiêm dlăng kjăp čĭm blei mơ̆ng ala tač êngao, hlăm anăn, mđing kơ 3 êpul bruă kơ klei ruă tưp, doh êƀăt mnơ̆ng ƀơ̆ng leh anăn bi klă phŭn agha. Tống Xuân Chinh, K’iăng Khua Anôk bruă rông mnơ̆ng, Phŭn bruă lŏ hma leh anăn mđĭ kyar krĭng ƀuôn sang brei thâo:

 Hŏng ênoh êpul ară anei snăn hmei lač dưi rơ̆ng čĭm, êa ksâo ba yua jih thŭn, hlăm gưl mâo knăm mơak, Tết hat. Hlue anăn, Phŭn bruă lŏ hma leh anăn mđĭ kyar krĭng ƀuôn sang mtă kơ dŭm čar, ƀuôn prŏng gĭt gai anôk bruă thơ̆ng, bruă sang čư̆ êa dŭm gưl bi hgŭm hâo hưn mtô mblang hdră bhiăn kơ klei doh êƀăt mnơ̆ng ƀơ̆ng, klei hmăi leh anăn boh jhat bruă yua êa drao kăm, êngao kơ anăn knăl brei dưi yua hlăm bruă mkra mjing tal êlâo, hrui êmiêt, mkra mjing mnơ̆ng dhơ̆ng lŏ hma, dlliê krmơ̆ng, kan hdang…

Boh sĭt ti ƀuôn prŏng phŭn Hà Nội Anôk bruă gĭt gai 389 ƀuôn prŏng Hà Nội brei thâo, hnưm mâo Hdră kčah rơ̆ng doh êƀăt mnơ̆ng bơ̆ng kơ gưl Tết Nguyên đán Ất Tỵ leh anăn knăm mơak Yan mnga thŭn 2025. Knơ̆ng bruă sang čư̆ êa ƀuôn prŏng Hà Nội mkŏ mjing 4 êpul ksiêm dlăng mlir dhar bruă ksiêm dlăng kơ doh êƀăt mnơ̆ng ƀơ̆ng gưl ƀuôn prŏng.  Boh phŭn ksiêm dlăng kƀĭn hlăm dŭm anôk mkra mjing, mnia blei, blei mnơ̆ng dhơ̆ng, dưi yua lu hlăm gưl Tết leh anăn hlăm jih yan knăm mơak. Ti gưl kdriêk, wăl krah, srăng mkŏ mjing dŭm êpul ksiêm dlăng bruă pŏk ngă rơ̆ng doh êƀăt mnơ̆ng ƀơ̆ng kơ jih gưl Tết ti dŭm să, ƀuôn hgŭm, wăl krah. Đoàn Thanh Phong, Khua Anôk bruă ksiêm dlăng doh êƀăt mnơ̆ng ƀơ̆ng ƀuôn prŏng Hà Nội brei thâo:

 Hŏng akŏ jing lŏ dơ̆ng rơ̆ng doh êƀăt mnơ̆ng ƀơ̆ng hlăm boh klei mrâo, boh nik hlăm gưl Têt leh anăn knăm mơak snăn Êpul ksiêm dlăng mlir dhar bruă srăng nao ksiêm dlăng ti dŭm anôk mkra mjing mnơ̆ng ƀơ̆ng leh anăn mmơ̆ng hdră ksiêm dlăng tơdah ƀuh klei ngă soh kơ klei doh êƀăt mnơ̆ng ƀơ̆ng snăn hmei srăng msir mgaih leh anăn brei dŭm anôk bruă duh mkra hlue ngă bi jăk. Bi hŏng dŭm anôk mkra mjing mnia blei mnơ̆ng ƀơ̆ng dôk ngă jăk snăn hmei ăt lŏ dơ̆ng mtă kơ dŭm anôk bruă srăng lŏ dơ̆ng ngă jăk klei anñ.

 Hyuă kjăp kriê dlăng anôk ba čhĭ mnơ̆ng dhơ̆ng kơ klei čiăng ba yua hlăm gưl Tết leh anăn hlăm yan knăm mơak, Êpul kriê dlăng anôk ba čhĭ hlăm ala čar pŏk ngă mơ̆ng hnưm Hdră kčah gang mkhư̆ klei mplư mplêč mnia blei leh anăn mnơ̆ng mgưt hlăm gưl

Tết Nguyên đán Ất Tỵ 2025; mđĭ ksiêm dlăng anôk ba čhĭ leh anăn đŭ bi kmhal klei ngă soh msĕ si mkăm mnơ̆ng, kpĭ ênoh, mnia blei điện tử, dŭ mdiăng, pioh mnơ̆ng kăm, blei mnơ̆ng soh hŏng hdră bhiăn, amâo klă phŭn agha, mnơ̆ng mgưt, mnơ̆ng ngă soh hŏng klei dưi kriê dlăng klei thâo, mnơ̆ng amâo jăk, mđing kơ mnơ̆ng dhơ̆ng jăk, mnơ̆ng mâo klei čiăng yua lu hlăm gưl knhal jih thŭn leh anăn Tết Nguyên đán. Mđĭ klei ksiêm dlăng klei doh êƀăt mnơ̆ng ƀơ̆ng mơ̆ng bruă mkra mjing truh kơ ba yua, gĭr bi kdơ̆ng, gang mkhư̆ leh anăn msir mgaih bi jăk phung, êpul bruă, anôk mkra mjing, mnia blei ngă soh kơ klei doh êƀăt mnơ̆ng ƀơ̆ng.

Nguyễn Quang Huy, K’iăng Khua anôk bruă bi klin, hdră kčah ngăn prăk, Khua Kriê dlăng anôk ba čhĭ, Phŭn bruă tuh tia mnia blei brei thâo: Êpul kriê dlăng anôk ba čhĭ srăng bi hgŭm kjăp hŏng dŭm anôk bruă djŏ tuôm leh anăn bruă sang čư̆ êa alŭ wăl hyuă kjăp ksiêm dlăng mnơ̆ng dhơ̆ng mơ̆ng ƀăng jang knông lăn hlăm anôk ba čhĭ hlăm ala čar.

Hŏng mnơ̆ng dhơ̆ng krĭng wăl bi knông hŏng knông lăn snăn êpul kriê dlăng anôk ba čhĭ bi hgŭm kjăp hŏng dŭm êpul bruă djŏ tuôm ti ƀăng jang knông lăn ksiêm dlăng bi hgŭm gang mkhư̆ mnơ̆ng dhơ̆ng hlô mnơ̆ng mnŭ sa blei mơ̆ng krĭng knông lăn hlăm êlan jơ̆ng, kdrŭn ksĭ, êlan phiơr dŭ mdiăng hlăm anôk ba čhĭ. Hlăm anôk ba čhĭ hlăm ala čar, êpul ksiêm dlăng anôk ba čhĭ ktuê dlăng mnơ̆ng dhơ̆ng hlăm dŭm anôk mnia blei, anôk phŭn, sang mnia… mđing kơ bruă hơĭt ênoh, čhĭ hŏng ênoh hơĭt… Lŏ dơ̆ng mđĭ bruă ksiêm dlăng bi kdơ̆ng hŏng mnơ̆ng mgưt, mplư hlăm mnia blei hlăm internet, boh nik hlăm hla pŏk web ala ƀuôn.

 Hyuă kjăp kriê dlăng mnơ̆ng dhơ̆ng hlăm gưl Tết Nguyên đán Ất Tỵ 2025 leh anăn yan knăm mơak 2025, bruă klam dŭm alŭ wăl yuôm bhăn snăk. Boh nik, dŭm anôk mkra mjing, mnia blei mnơ̆ng dhơ̆ng lŏ hma huĭ srăng mâo lu, ngă luč klei doh êƀăt mnơ̆ng ƀơ̆ng, klei čiăng yua lu hlăm gưl têt mơ̆ng mnuih ƀuôn sang. Klei ngă soh kơ klei doh êƀăt mnơ̆ng ƀơ̆ng tơdah ƀuh brei msir mgaih bi kjăp, rơ̆ng klei bi huĭ leh anăn hưn hlăm kdrăp hâo hưn hlue si hdră bhiăn. Grăp čô mnuih ƀuôn sang ăt brei jing phung blei yua thâo mĭn čiăng rơ̆ng klei suaih pral kơ pô leh anăn kơ gŏ sang, hŏng lăn čar mâo yan mnga kluôm ênŭm.