Êbeh leh 70 thŭn, grăp aguah ưm, Nguyễn Thị Hoàng Minh, ti alŭ 12, ƀuôn hgŭm Ƀuôn Ama Thuô̆t, čar Dak Lak ăt grăp hruê nao ti adŭ hriăm gym giăm sang čiăng mjuăt ktang asei mlei. Ñu brei thâo, êlâo dih ñu tuôm mĭn bruă hriăm gym jing luč liê leh anăn amâo mâo găl guôp hŏng phung khua thŭn. Ƀiădah leh klei suaih pral tih hroh, kreh ruă aruăt ariêng, ñu gĭr hriăm hŏng dŭm klei hriăm djŏ guôp. Mơ̆ng anăn, adŭ hriăm gym jing anôk đru kơ ñu mjuăt ktang asei mlei, bi kna hlăm ai tiê, bi mguôp thiăm hŏng anak čô leh anăn mah jiăng.

 “Kâo hriê hriăm ti adŭ gym anei mâo leh êbeh 1 thŭn. Mphŭn mâo phung adei mtô dŭm klei hriăm hdjul. Leh wĭt hriăm kâo ƀuh asei pral, suiah pral, jăk hlăm ai tiê leh anăn khăp kơ klei hdĭp”.

Bi hŏng Vũ Ngọc Dững, ti ƀuôn hgŭm Tuy Hòa, čar Dak Lak, pah mlâo mnŭ jing klei hơ̆k mơak, leh anăn ăt jing klei mjuăt asei mlei kơ ñu leh wĭt mdei bruă. Êbeh 10 thŭn djă giê pah, ñu mâo mă đa đa klei pah mni hlăm dŭm gưl, klei ñu hơ̆k mơak hĭn jing mâo nanao mô̆ ñu hrăm mbĭt ti tač hriăm pah.

 “Êlâo dih kâo hriê pah pengpong, pah boh leh anăn čưng boh. Ƀiădah mơ̆ng mâo klei pah mlâo mnŭ, êbeh 10 thŭn hŏng anei kâo hriăm pah mlâo mnŭ. Mơ̆ng anăn truh kơ ară anei kâo ăt nao hgŭm lu klei bi lông. Hlăm sang mô̆ kâo ăt khăp kơ bruă anei, lu hĭn jing čiăng mjuăt ktang asei mlei pô.”

Tơdah gym amâodah pah mlâo mnŭ čiăng mâo tač, adŭ hriăm leh anăn kdrăp yua, bi mjuăt asei mlei dưỡng sinh mâo lu phung khua thŭn ruah jing kyua klei ênưih. Amâo mâo guôn kdrăp yua, klei hriăm hdjul, knŏng jơ̆ng hŏng kngan leh anăn ksiêm dlăng êwa pô hrip đru kơ phung hriăm dưi pĭt jăk, hrŏ klei ruă tŭt klang, mđĭ klei suiah kơ kboh, êlan bi êwa leh anăn, prôč tian.

Ară anei, lu êpul hgŭm mjuăt asei mlei dưỡng sinh dưi mkŏ mjing leh anăn ngă bruă jêñ jêñ, mkŏ mjing anôk hlăp lêñ jăk kơ phung khua thŭn. Amâo djŏ knŏng mđĭ klei suaih pral, hŏng klei bi kƀĭn, phung hgŭm lŏ mâo klei găl bi tuôm, kah mbha klei hriăm kriê dlăng klei suaih pral ênuk khua thŭn, mkŏ mjing kleoi hơ̆k mơak leh anăn mâo ai tiê jăk. Anei ăt jing klei jăk mơ̆ng klei hriăm anei dưi bi lar mơ̆ng ƀuôn prŏng truh kơ krĭng ƀuôn sang. Huỳnh Thị Ba Lan, êpul hgŭm bruă dưỡng sinh ƀuôn hgŭm Ƀuôn Hồ brei thâo:

Êpul hmei mâo 37 čô, êlâo dih hriăm čiăng mơak đuč, mđĭ klei suiah pral. Leh anăn ƀuôn hgŭm mkŏ mjing êpul hgŭm bruă leh anăn iêo mthưr jih jang phung amai adei nao hgŭm, ba wĭt klei hơ̆k mơak hlăm ai tiê leh anăn klei suaih pral. Êjai ti ƀuôn hgŭm ăt mâo dŭm hdră phung amai adei nao hgŭm leh anăn kreh mjĕ mjuk hŏng dŭm êpul hgŭm bruă mjuăt ktang asei mlei mơ̆ng čar Dak Lak.

 Hŏng hdră “hdĭp mơak - suaih pral - tŭ dưn”, dŭm êpul hgŭm bruă phung khua thŭn hlăm čar mkŏ mjing leh hdră êlan bi kƀĭn, mkŏ mjing klei hriăm găl guôp hŏng klei suaih pral, klei čiăng leh anăn klei găl mơ̆ng grăp čô. Hluê anăn, hdră mjuăt ktang asei mlei mơ̆ng phung khua thŭn ƀrư̆ hruê ƀrư̆ đĭ kyar, đru mđĭ klei suaih pral leh anăn bi mguôp êpul êya. Hluê si Triệu Thị Ngoan,  khua êpul hgŭm phung khua thŭn čar Dak Lak, leh bi mŭt mbĭt, khădah ka mâo klei hơĭt kơ klei mkŏ mjing ƀiădah ti dŭm êpul nah gŭ êlâo dih, dŭm hdră bruă mơ̆ng phung khua thŭn ăt dưi rơ̆ng jêñ jêñ.

 “Khădah ară anei Êpul phung khua thŭn ka dưi mkŏ mjing djăp ti 102 ƀuôn hgŭm ƀiădah lu êpul bruă hđăp ăt dưi rơ̆ng klei ngă bruă leh anăn ngă lu bruă tŭ dưn msĕ si mjĕ mjuk dhar kreh, kdŏ mmuñ, mjuăt ktang asei mlei, pah boh…čiăng iêo jak phung khua thŭn nao hgŭm. Hluê anăn diñu dưi mjuăt ktang asei mlei, hdĭp suaih pral, hdĭp yâo mơak”.

Ară anei, čar Dak Lak mâo giăm 290 êbâo čô khua thŭn. Mbĭt hŏng klei đĭ kyar ktang mơ̆ng dŭm hdră mjuăt ktang asei mlei leh anăn dŭm boh tŭ dưn klă klơ̆ng, ƀrư̆ hruê ƀrư̆ mâo lu phung khua thŭn nao hgŭm. Anôk anăn amâo djŏ knŏng đru kơ diñu suaih pral, khăp kơ klei hdĭp, ƀiădah lŏ bi lar ai tiê hdĭp jăk - hdĭp mơak, suaih pral - tŭ dưn.