Dôk kriê dlăng anak dôk mdrao ti Sang êa drao prŏng Krĭng Lăn Dap Kngư, ayŏng Y Vy Ktul, ti ƀuôn Čăm, kdriêk Krông Ana brei thâo, hlăm 1 mlan ñu mâo 2 čô anak nao đih mdrao kyua ƀlĕ sruê. Klei rŭng răng ƀrư̆ lu kyua 2 čô hđeh mkăn ti sang ka mâo tlŏ vaccin ƀlĕ sruê ôh.

"Pô amâo thâo ôh si ngă, nao ksiêm mkă snăn arăng lač êngoh bi kđuč, hriê tinei snăn thâo jing ƀlkĕ sruê. Ƀuh phung hđeh nao đih mdrao snei snăn ară anei thâo kơ vaccin ƀlĕ sruê, snăn nao tlŏ mgang kơ anak. Ară anei nao ti sang êa drao snăn ti sang luč bruă knuă, ĕ ruă snăn pô ăt huĭ, rŭng răng mơh.

 Aê mdrao Trần Thị Thúy Minh, Khua anôk mdrao phung hđeh, Sang êa drao prŏng krĭng Lăn Dap Kngư, brei thâo, ară anei klei ruă ƀlĕ sruê dôk tưp lar pral leh anăn lu hđeh ruă kjham. Hlăm ênoh anăn mâo êbeh 60 čô dôk đih mdrao ti wăl bi ktlah hjăn, lu hđeh truh kjham kơ ksŏ, ruă ală leh anăn ruă tian.

 “Ƀlĕ sruê jing sa hlăm dŭm mta klei ruă huĭ hyưt leh anăn tưp lar pral, ñu tưp lar pral hĭn kơ Covid-19. Khădah snăn, mâo sa mta klei myun jing lu phung Ƀlĕ sruê tlŏ leh vaccin snăn amâo mâo klei ruă ôh. Anei jing klei ruă dưi gang mkhư̆ hŏng vaccin. Tơdah amâo dưi tlŏ mgang hŏng vaccin, tăm bi ƀlĕ snăn kjham leh anăn ênoh phung ruă kjham mâo lu.”

  Hoàng Hải Phúc, Khua Anôk bruă ksiêm dlăng klei ruă čar Dak Lak hâo hưn, ti anăp boh klei ƀlĕ sruê đĭ lu, bruă mdrao mgŭn pŏk ngă lu hdră msir kñăm ktuê dlăng klei ruă tưp. Hlăm anăn mđĭ ktuê dlăng klei ruă tưp, tlŏ mbŏ vaccin kơ hđeh ka tlŏ mgang djăp ênŭm, msir mgaih wăl hdĭp mda ti dŭm krĭng wăl mâo mnuih ruă leh anăn mđĭ ktang bruă hâo hưn čiăng mđĭ klei thâo săng mnuih ƀuôn sang.

 “Hmei kčĕ kơ Knơ̆ng bruă mdrao mgŭn čiăng pŏk ngă bruă gang mkhư̆ klei ruă ƀlĕ sruê ti alŭ wăl, hlăm anăn mâo tlŏ vaccin ƀlĕ sruê, rubela leh anăn gĭt gai dŭm ktuê êlan kdriêk kơ bruă thơ̆ng, leh anăn mđĭ pral bruă tlŏ mgang. Boh nik hmei mđĭ bruă hâo hưn kơ dŭm krĭng taih kbưi, krĭng mnuih djuê ƀiă ba anak čô nao tlŏ mgang.”

Hlue si Knơ̆ng bruă gang mkhư̆ klei ruă (Phŭn bruă mdrao mgŭn), mơ̆ng akŏ thŭn truh ară anei kluôm ala mâo êbeh 52.000 čô ƀlĕ sruê, lu hĭn dŭm čar nah Dhŭng. Leh hră mtrŭn mơ̆ng Khua knŭk kna hlăm mlan 11/2024 kơ klei mđĭ ktang gang mkhư̆ klei ruă ƀlĕ sruê, lu alŭ wăl čih anăn tlŏ vaccin ƀiădah adôk kƀah. Bruă mkŏ mjing tlŏ mgang msĕ si mâo bruă mdrao mgŭn ngă bruă, dŭm bruă mkăn amâo hgŭm lu ôh, amâo dưi iêô ôh mnuih ƀuôn sang nao tlŏ mgang. Hlue si nai prĭn, aê mdrao Hoàng Minh Đức, Knơ̆ng bruă gang mkhư̆ klei ruă, ară anei lŏ mâo đa đa alŭ wăl êmưt hlăm bruă gang mkhư̆ klei ruă tưp:

 “Bruă anei djŏ tuôm lu kơ bruă mkŏ mjing tlŏ mgang vaccin, jing bi mklă hdră kčah, dăp prăk bi liê, blei mnơ̆ng dhơ̆ng ba yua… Ară anei ênoh phung ruă đĭ llu jing kyua hnơ̆ng tlŏ vaccin êmưt mkă hŏng hnơ̆ng klei ruă ƀlĕ sruê tưp lar.”

 Leh tlŏ mgang 2 hruê kăm srăng dưi mâo ai dưi mdrơ̆ng. Hlăm boh klei ruă ƀlĕ sruê ăt dleh ktuê dlăng msĕ si ară anei, phung amĭ ama brei hđeh mơ̆ng 6 mlan truh kơ 10 thŭn ka tlŏ mgang amâodah ka tlŏ djăp ênŭm vaccin ƀlĕ sruê. Phung amĭ ama amâo hdơr ôh tlŏ mgang leh kơ hđeh djăp leh amâodah ka snăn brei tlŏ mbŏ kyua vaccin ƀlĕ sruê amâo ngă amâo jăk kơ klei suaih pral phung hđeh ôh./.