Mơ̆ng akŏ thŭn truh kơ ară anei, bruă ksiêm dlăng dưi hluê ngă hrăm mbĭt, ktang phĭt, mâo klei nao hgŭm mơ̆ng dŭm Phŭn bruă: phŭn bruă mdrao mgŭn, phŭn bruă lŏ hma leh anăn mđĭ kyar krĭng ƀuôn sang, phŭn bruă tuh tia, Phŭn bruă kahan ksiêm, Phŭn bruă kreh knhâo leh anăn mrâo mrang, Dhar bruă mặt trận dŭm čar, ƀuôn prŏng, êpul hgŭm ƀĭng ngă lŏ hma, êpul bruă phung mniê…mbĭt hŏng klei nao hgŭm ksiêm dlăng klei doh êƀăt mnơ̆ng ƀơ̆ng huă mlir dhar bruă, tui duh phŭn agha mnơ̆ng ƀơ̆ng, anăn knăl mnơ̆ng dhơ̆ng amâo mâo djŏ hŏng klei čuăn.

Yap hlăm mlan 6 akŏ thŭn anei, bruă mdrao mgŭn ksiêm dlăng leh êbeh 232 êbâo anôk ngă bruă, hmao ƀuh êbeh 15 êbâo anôk bruă ngă soh hŏng klei doh êƀăt mnơ̆ng ƀơ̆ng huă, ƀuah mkra êbeh 3.300 anôk ngă soh, hlăm anăn đŭ prăk giăm 2.300 anôk hŏng ênoh đŭ giăm 20 êklai prăk, hrŏ mkă hŏng wưng anei thŭn 2023. Êngao kơ klei đŭ prăk lŏ ngă klei ƀuah mkra mbŏ leh anăn mgaih msir boh jhat, brei mdei ngă bruă 16 anôk bruă, 745 anôk bruă ba bi rai mnơ̆ng dhơ̆ng amâo djăp hnơ̆ng tŭ jăk.

Dŭm Phŭn dhar bruă bi mguôp kjăp hŏng dŭm alŭ wăl kriê dlăng, mgaih msir klei arưp aram mnơ̆ng ƀơ̆ng amâo mâo doh, mtô kơ alŭ wăl hluê ngă klei ktuê dlăng dŭm klei arưp aram anăn, rơ̆ng kơ klei doh êƀăt mnơ̆ng ƀơ̆ng, gang mkhư̆ djŏ ƀơ̆ng mta ruă hlăm dŭm knăm mơak prŏng. Klei djŏ ƀơ̆ng mta ruă, hlăm lăn čar čih yap mâo 70 klei, ngă kơ giăm 3 êbâo čô djŏ mta ruă leh anăn 12 čô djiê.

Aduôn Phạm Khánh Phong Lan, Khua kiă kriê knơ̆ng bruă ksiêm dlăng klei doh êƀăt mnơ̆ng ƀơ̆ng huă ƀuôn prŏng Hồ Chí Minh brei thâo: klei djŏ ƀơ̆ng mta ruă hlăm dŭm mmông huă ƀơ̆ng lu mnuih, klei bi kuôl ung mô̆, djiê brŭ, sang huă mnăm. Dleh dlan hĭn jing dŭm sang mnia čŏng bluh mâo, čhĭ mnia soh hŏng hdră bhiăn, boh nik jing čhĭ mnia online:

 “Bruă dleh dlan hĭn, boh nik leh wưng klei ruă tưp jing klei bluh mâo dŭm anôk čhĭ mnia, dŭm anôk čhĭ mnia soh hŏng hdră bhiăn. Klei čhĭ mnia online ăt jing sa hdră amâo mâo dưi kyua hlăm anăn diñu hưn mdah djăp mta hlăm anăn ƀiădah amâo mnơ̆ng rơ̆ng ôh. Ƀuôn prŏng ăt mkŏ mjing êpul ngă bruă mjêcc, boh nik jŭm dar sang čhĭ mnia pô ksiêm dlăng, ksiêm dlăng êlâo leh anăn mă mta kơ tač, diñu mă ba čhĭ mtŭk mtŭl, đa đa mâo wăt mnơ̆ng mơ̆ng sang mnia, ƀuh anôk bruă djŏ tuôm lŏ wĭt dlăng, duah klei ksiêm dlăng ñu dleh êdi”.

Bi ala dŭm phŭn, dhar bruă ăt adôk ka klă kơ bruă ksiêm dlăng amâo djăp êpul ngă bruă, dŭm hdră êlan ksiêm dlăng sang čhĭ mnia hliê điêt, mnơ̆ng ƀơ̆ng ktuê êlan dôk mplĕ kơ anôk bruă alŭ wăl. Boh nik, dŭm mta mnơ̆ng êa ksâo, kpiê ƀiêr dleh ksiêm dlăng, hmăi truh kơ klei tŭ mơ̆ng phung mkra mjing leh anăn phung blei ba yua. Êngao kơnăn, phung bi ala uêñ mĭn kơ klei ba čhĭ mnơ̆ng dhơ̆ng, hưn mdah mnơ̆ng dhơ̆ng yua mnêč mplư. Pô bi ala Phŭn bruă klei mrâo leh anăn hâo hưn lač, čiăng gang mkhư̆ klei hưn mdah hluh knông lăn, bi rai klei mkăp brei, ƀuah mkra grăp čô, mđĭ klei ƀuah mkra. Bi êdah amâo mâo brei čhĭ mnia livestream hŏng dŭm mta mnơ̆ng ƀơ̆ng…

Hluê si Thiếu tướng Nhữ Thị Minh Nguyệt, k’iăng khua anôk bruă kahan ksiêm gang mkhư̆ phung ngă soh wăl hdĭp mda, Phŭn bruă kahan ksiêm, klei čhĭ mnia mnơ̆ng ƀơ̆ng amâo mâo bĭt phŭn agha, mnơ̆ng ƀơ̆ng amâo mâo doh êƀăt mâo lu êdi. Klei mjhua hŏng wăl mạng, anôk mnia mblei điện tử mâo klei đĭ lu. Phung anăn yua dŭm mta mnơ̆ng amâo mâo klă phŭn agha, lăm hĕ mmông yua mnơ̆ng…hdră čhĭ mnia online ngă truh lu klei dleh dlan hlăm bruă ksiêm dlăng, ƀuah mkra. Hluê si Thiếu tướng Nhữ Thị Minh Nguyệt lač:

 “Hmei ăt mñă kơ knŭk kna hnưm bi kluôm klei bi hmô kriê dlăng mơ̆ng knŭk kna kơ klei doh êƀăt mnơ̆ng ƀơ̆ng hluê êlan hluh mơ̆ng gưl dlông truh kơ nah gŭ, čiăng rơ̆ng bi klă bruă klam mơ̆ng grăp dhar bruă, gưl bruă, boh nik jing klei čuă bruă klam klă hlăm bruă kriê dlăng đa đa bruă mkra mjing mnia mblei mnơ̆ng ƀơ̆ng dôk mâo lu klei ngă soh leh anăn amâo mâo doh êƀăt msĕ ară anei. Anăn jing čhĭ mnia hliê điêt, čhĭ mnia ktuê êlan leh anăn tŭk knă kpiê, mrâo anei mâo lu klei djiê mnuih kyua mñăm kpiê knă”.

Hlăm klei kƀĭn, k’iăng Khua knŭk kna Lê Thành Long bi klă, bruă ksiêm dlăng klei doh êƀăt mnơ̆ng ƀơ̆ng huă mâo leh lu klei gĭr leh anăn dưi mâo lu boh tŭ dưn. Dŭm hdră êlan dôk nao djŏ êlan leh anăn bi lar boh tŭ dưn. Ƀiădah ăt dôk mâo lu klei dleh kpăk, klei êdu kƀah jing klei arưp aram luč klei doh êƀăt mnơ̆ng ƀơ̆ng huă, ƀơ̆ng djŏ mta ruă, ênoh mnuih ngă soh đĭ lu, hdră ƀuah mkra ka ktang phĭt. K’iăng Khua knŭk kna Lê Thành Long mñă:

 “Kâo ƀuh jing srăng rơ̆ng klei doh êƀăt mnơ̆ng ƀơ̆ng, klei thâo săng mnuih ƀuôn sang, mkŏ mjing klei mưn leh anăn hnơ̆ng čuăn dưi pia jing dhar kreh klei blei ba yua, anăn yơh jing klei kjăp, amâo djŏ ôh diih mđĭ ênoh phung nao ksiêm dlăng êbeh 10 blư̆ nao ksiêm dlăng grăp anôk, ka sĭt tŭ dưn ôh. Si srăng ngă čiăng mkŏ mjing klei mưng leh anăn tar hdră blei yua thâo mĭn jing yuôm bhăn êdi, mâo boh tŭ dưn sui. Klă sĭt jing dŭm phŭn, dhar bruă hlăm bruă klam pô leh anăn ai dưi pô čiăng mđĭ hĭn bruă ksiêm dlăng mjêč, êjai hmao ƀuh klei soh srăng ƀuah mkra ktang phĭt, mbĭt anăn hâo hưn kơ klei anăn čiăng mâo klei bi râo”./.