Hŏng klei mdê jing čar čư̆ čhiăng mâo lu mnuih djuê ƀiă hdĭp mda, leh anăn mâo ênoh phung mniê kkiêng anak ti sang lu mkă hŏng ênoh hnơ̆ng kah knar kuôm  ala. Pŏk ngă Hdră bruă mrô 8 kơ klei mtăp mđơr êkei mniê leh anăn msir mgaih bruă mjêč hŏng phung mniê leh anăn hđeh điêt, wưng I (2021-2025), Gia Lai jing 1 hlăm 10 čar mâo mđing pŏk ngă 4 hdră đru kơ phung mniê mnuih djuê ƀiă kkiêng anak êđăp ênang leh anăn kriê dlăng klei suaih pral phung hđeh, mâo: kriê dlăng êlâo kơ kkiêng; đru kriê dlăng hlăk êjai kkiêng; đru kriê dlăng êdei kkiêng; kriê dlăng klei suaih pral phung hđeh.

 Hlăm wưng êgao, dŭm gưl êpul hgŭm bi hgŭm hŏng bruă mdrao mgŭn mkŏ mjing giăm 100 mmông mtô mblang mtô bi hriăm klei thâo săng leh anăn mtrŭt mjhar phung mniê kkiêng anak ti anôk bruă mdrao mŭn, iêo jak êbeh 7000 čô amai adei hlăm gưl bbă kkiêng anak nao hgŭm. Êngao anăn, bi liê đru leh kơ 361 čô mniê kkiêng anak ti anôk bruă mdrao mgŭn hŏng ênoh prăk giăm 365 êklăk prăk. Mơ̆ng bruă đru anei, amâo djŏ knŏng mđĭ klei thâo săng, klei thâo kriê dlăng klei suaih pral kơ phung mniê, hđeh điêt ôh, mnuih djuê ƀiă ôh ƀiădah lŏ đru mjing boh kdrŭt kơ amai adei mnia nao ti anôk mdrao mgŭn kkiêng anak leh anăn gĭr ngă djŏ hdră êlan kơ ênoh mnuih.

 Amai Rơ Châm Alênh, ƀuôn  Amơng, să Ia Mơ Nông, kdriêk Čư̆ Păh, čar Gia Lai brei thâo:

Arăng đru kâo blei hnun kơ anak. Mơ̆ng anăn snăn kâo ƀuh mơak snăk kyua  arăng đru êjai, hmư̆ klei ktrâo lač kriê dlăng anak djăp ênŭm. Kkiêng ti amôk mdrao mgŭn să anak pô mâo tlŏ ênŭm, ksiêm mkă.

Mơ̆ng bruă pŏk ngă lu hdră hlăm hdră êlan đru kơ phung mniê mnuih djuê ƀiă kkiêng anak êđăp ênang leh anăn kriê dlăng klei suaih pral phung hđeh đru mđĭ klei thâo săng phung mniê kơ klei kkiêng anak êđăp ênang; kơ klei kriê dlăng klei suaih pral phung amĭ, phung hđeh, phung amai adei mniê, yua hdră mdrao mgŭn, thâo săng leh anăn kriê dlăng anak điêt djŏ hdră. Amai Đinh Ly Ơn, ƀuôn Hek, să Čư̆ A Thai, kdriêk Phú Thiện, čar Gia Lai brei thâo: Ñu kkiêng anak khua leh, êdei anăp lŏ kkiêng anak tal dua. Tơdah giăm truh hruê kkiêng srăng nao ti anôk mdrao mgŭn čiăng jăk kơ amĭ hŏng anak. Ñu ăt srăng gĭr kriê dlăng kơ anak pô suaih pral.

 Leh 3 thŭn pŏk ngă hdră bruă mrô 8 ti čar Gia Lai mâo leh klei tŭ dưn jăk hlăm bruă lăm lui klei gun kpăk, klei bi kah mbha mniê êkei, hlue ngă tŭ dưn hdră kñăm mtăp mđơr êkei mniê leh anăn mđĭ klei hdĭp mda mnơ̆ng dhơ̆ng, ai tiê kơ phung mniê leha năn hđeh điêt krĭng mnuih djuê ƀiă. Brei thâo mbĭt kơ boh tŭ pŏk ngă Hdră bruă 8 ti čar, Rơ Chăm H’Hồng, Khua Êpul hgŭm phung mniê čar Gia Lai brei thâo:

Dŭm gru hmô, bruă ngă tơdah mkŏ mjing pŏk ngă truh ti čar ară anei snăn mâo mnuih ƀuôn sang leh anăn Êpul hgŭm phung mniê tŭ mă, nao ai, klei sa ai mơ̆ng gưl bruă đảng, bruă sang čư̆ êa alŭ wăl bi mni. Hlăm wưng kơ anăp snăn dŭm gưl Êpul hgŭm lŏ dơ̆ng mđĭ lar bruă klam pô čiăng kčĕ, mkŏ mjing, pŏk ngaw tŭ dưn 166 bruă ngă hlăm 4 êpul phŭn mơ̆ng Hdră bruă 8, gĭr ktưn mâo leh anăn êbeh hnơ̆ng kčah mơ̆ng wưng 1 kčah leh. Boh phŭn jing mkŏ mjing bruă ngă bi mlih klei mĭn, hdră ngă, đru lăm lui klei mĭn kah mbha êkei mniê, jar êkei mniê hlăm gŏ sang leh anăn êpul êya; klei bhiăn dhar kreh ba klei amâo jăk leh anăn dŭm mta ala ƀuôn mjêč hŏng phung mniê leh anăn êpul êya.

Ăt hlue si Khua gĭt gai Êpul hgŭm phung mniê čar Gia Lai, Êpul hgŭm srăng lŏ dơ̆ng mđĭ lar gru hmô jăk, kñăm bi mlih klei mĭn, hdră ngă, mđĭ klei dưi hlăm bruă duh mkra kơ phung mniê, mđĭ klei mtăp mđơr êkei mniê, msir mgaih klei mjêč hŏng phung mniê leh anăn hđeh điêt, rơ̆ng klei blŭ leh anăn klei hgŭm sĭt mơ̆ng phung mniê leh anăn hđeh điêt, rơ̆ng klei blŭ leh anăn klei hgŭm klă sĭt mơ̆ng phung mniê leh anăn hđeh điêt hlăm bruă mđĭ kyar bruă duh mkra, ala ƀuôn hlăm êpul êya. Ksiêm dlăng leh anăn bi tăng mgăl, đru mđĭ klei thâo kơ phung mniê tơdah hgŭm gĭt gai hlăm bruă kđi čar. Mkŏ mjing dŭm bruă mprăp kơ klei thâo mtăp mđơr êkei mniê, klei thâo bi mguôp êkei mniê kơ phung knuă druh hlăm bruă kđi čar, phung khua mduôn, khua ƀuôn, phung mâo kơhưm hlăm êpul êya. Mơ̆ng anăn  srăng mjing klei bi mlih klă hlăm klei hlue ngă mtăp mđơr êkei mniê leh anăn msir mgaih bruă mjêč hŏng phung mniê leh anăn hđeh điêt, đru mđĭ klei hdĭp mda mnơ̆ng dhơ̆ng, ai tiê kơ phung mniê, hđeh mniê mnuih djuê ƀiă ti čar Gia Lai.

Hŏng lu bruă ngă klă sĭt leh anăn yuôm bhăn ngă leh, leh anăn dôk mâo dŭm Êpul hgŭm phung mniê hlăm čar Gia Lai pŏk hlue ngă, Hdră bruă mrô 8 dưi čang hmăng srăng mjing tur knơ̆ng kơ dŭm bruă ngă, gru hmô mdê dưi pŏk ngă hŏng klei tŭ dưn leh anăn kjăp ti krĭng mnuih djuê ƀiă Gia Lai.