Y Du, djuê ana Ba Na, jing nai êa drao ƀuôn Đê Kốp - Đuol, ƀuôn hgŭm Mang Yang, čar Gia Lai. Hlăm grăp hrue kăm ñu truh hŏng dŭm gŏ sang hlăm ƀuôn, čiăng mtă mtăn, hâo hưn kơ hdră răng mgang klei ruă, hdră bi mdoh wăl hdĭp mda, bi răng kriê klei suah pral mnuih khua thŭn, phung mniê ba tian, lehanăn tlŏ mgang kơ phung hđeh. Tui si  Y Du, klei tŭ dưn mơ̆ng bruă mdrao mgŭn hlăm ƀuôn sang mâo leh klei tŭ dưn klă mngač. Êlâo dih mnuih ƀuôn sang čŏng blei êa drao ba wĭt mnăm tơdah mâo klei ruă duam, tơdah ruă kjham kơh nao băng kơ sang êa drao. Ară anei mdê leh, mnuih ƀuôn sang nao băng kơ sang êa drao ƀuôn, tơdah ƀuh asei mlei pô amâo mâo klei suaih ôh, nao tlŏ mgang kơ phung hđeh, kơ phung mniê ba tian mkă dlăng jêñ jêñ:

 “Sang êa drao ară anei dưi duh bi liê jăk hĭn leh. Mnuih ƀuôn sang hlăm ƀuôn mâo leh klei thâo săng hĭn, grăp blư̆ ruă duam, bi nao băng kơ sang êa drao, mâo klei mkă dlăng lehanăn kčĕ đru hlăm klei mdrao mgŭn.”

Phung nai êa drao ƀuôn msĕ si Y Du yơh jing kdrông hlăm klei bi mdrao mgŭn hŏng ƀuôn sang, jing mnuih kăp hâo hưn lehanăn mâo klei mtă mtăn kơ bruă răng mgang klei suaih pral hŏng klei blŭ djuê ana pô mtam, mblang kơ mnuih ƀuôn sang ênưih thâo săng.

Ti sang êa drao mrô 3 ƀuôn hgŭm Gào, Định Thị Cất, K’iăng khua sang êa drao brei thâo, hlăm dŭm thŭn giăm anei, bruă mdrao mgŭn mâo leh lu klei bi mlih. bruă hâo hưn kčĕ đru kơ bruă răng kriê klei suaih pral mâo ngă leh hŏng klei jăk, jêñ jêñ, bi mguôp hlăm klei bi kƀĭn ƀuôn, mơ̆ng anăn mđĭ hĭn klei mnuih ƀuôn sang thâo săng. Hlăm alŭ wăl mâo leh êbeh 65% ênoh mnuih djuê ƀiă, hnơ̆ng ênoh mnuih mâo blei hră ênua mdrao mgŭn đĭ nanao hlăm grăp thŭn, lehanăn ară ani djăp leh giăm 90%. Anei jing sa klei bi knăl năng mơak, kyuadah leh mâo hră ênua mdrao mgŭn, snăn mnuih ƀuôn sang hơĭt hĭn hlăm klei nao mkă dlăng mdrao mgŭn, lehanăn nao mbăng kơ sang êa drao yơh, amâo lŏ duah blei mă êa drao hjăn pô ôh. Tui si Đinh Thị Cất, sang êa drao nah gŭ mâo đru leh jăk klei mdrao mgŭn kơ mnuih ƀuôn sang, amâo lŏ guôn truh kơ sang êa drao kbưi ôh, đru bi hrŏ ênoh bi liê prăk kăk lehanăn hrue mmông kơ mnuih ƀuôn sang krĭng taih kbưi.

 “Bruă dlăng kriê klei suaih pral tal êlâo kơ mnuih ƀuôn sang mâo leh klei tŭ dưn, tal êlâo jing đru bi tlŏ mgang, ară anei mnuih ƀuôn sang thâo săng leh, snăn mâo klei tŭ dưn hĭn. Bruă răng mgang, lehanăn klei hâo hưn kơ bruă mkhư̆ gang klei ƀă kkiêng anak mâo ngă leh hŏng klei jăk. Tal 3 jing bruă mdrơ̆ng hŏng klei ruă tưp, mâo knuă druh truh hlăm ƀuôn sang, truh hŏng grăp boh sang, snăn mâo lu mnuih ƀuôn sang ư ai snăk, diñu mâo leh klei thâo săng hĭn.”

Nguyễn Đăng Quang, Khua knơ̆ng bruă sang čư̆ êa ƀuôn hgŭm Gào, čar Gia Lai brei thâo, leh mkŏ mjing bruă sang čư̆ êa dua gưl, lui gưl kdriêk, bi mŭt mbĭt dŭm boh ƀuôn hgŭm, alŭ wăl jing prŏng, ênoh mnuih jing lu hĭn êbeh mơ̆ng 3-4 blư̆. Bruă mđĭ hĭn klei duh bi liê, lŏ mjuăt bi hriăm êpul phung aê mdrao thâo bruă hĭn, jing klei yuôm bhăn êdi pioh kơ bruă mdrao mgŭn ti sang êa drao ƀuôn, pioh dlăng kriê klei suaih pral mnuih ƀuôn sang ară anei. Boh nik, mâo dŭm hdră êlan đru kơ phung nai êa drao ƀuôn. Nguyễn Đăng Quang lač:

 “Čang hmăng Đảng, knŭk kna mđing hĭn kơ bruă sang êa drao ƀuôn, mâo hdră êlan đru kơ phung nai aê mdrao hơĭt ai tiê mă bruă. Rơ̆ng kjăp kơ bruă mdrao mgŭn phŭn tal êlâo. Kyuanăn, hŏng bruă sang čư̆ êa ƀuôn hgŭm jing prŏng, găn êrô dleh dlan.”

Dưi ƀuh, sang êa drao nah gŭ hlăm ƀuôn sang ti Gia Lai hlăk bi êdah bruă klam jăk kơ bruă dlăng kriê klei suaih pral mnuih ƀuôn sang phŭn tal êlâo, gang mkhư̆ klei ruă tưp, hâo hưn mtô mblang kơ mnuih ƀuôn sang mâo klei thâo săng, bi hrŏ klei ktrŏ kơ mnuih ruă hlăm dŭm sang êa drao prŏng, lehanăn mâo hdră êlan mdrao mgŭn kơ mnuih ƀuôn sang jăk mtam hlăm nah gŭ. Hŏng bruă sang čư̆ êa dôk mâo klei bi mlih prŏng, anôk ala jing prŏng mơh, ênoh mnuih jing lu, snăn čiăng kơ dŭm boh sang êa drao nah gŭ lŏ dơ̆ng bi êdah bruă klam pô hŏng klei kjăp, snăn čiăng snăk mâo knŭk kna lŏ dơ̆ng mđing lehanăn duh bi liê lu hĭn kơ mnuih mă bruă, kơ kdrăp mdrao mgŭn, kơ sang êa drao lehanăn lŏ mjuăt bi hriăm klei thâo kơ mnuih mă bruă./.