Nao ksiêm mkă ti Anôk bruă mdrao mgŭn Phú Hòa, amai Lê Thị Bích Loan, ti alŭ Phú Thạnh, să Phú Hòa 2, čar Dak Lak čih hlăm maĭ pô ngă bruă, lŏ pia jing kiosk mdrao mgŭn thâo mĭn, dưm ti anôk tŭ drông. Knŏng ba mrô QR hlăm hră ênua mdrao mgŭn amâo dah hră gŏ êsei nao hlăm anôk mă rup, maĭ čŏng dlăng klei hâo hưn pô, đru kơ amai bi hrŏ bruă hưn mthâo leh anăn mă mrô tal ti kdrăp maĭ. Amai Loan ƀuh, bruă ngă hlăm maĭ jing ênưih, mơ̆ng phung mda asei truh kơ phung khua thŭn ăt dưi yua.

“Kâo ƀuh maĭ anei jing ênưih kơ mnuih ruă, klei hâo hưn klă mngač. Asei kâo pô jing mda asei, ƀiădah phung amai adei mduôn ăt dưi yua mơh. Mâo maĭ anei kâo dăp mrô mrô pral hĭn, amâo mâo guôn dôk guôn sui, luič mmông amâodah mnuih hriê êlâo mkă dlăng êdei, mnuih êdei hriê mkă dlăng êlâo”.

Măi čih anăn ksiêm mkă mă pô dưi ba yua ti Anôk bruă mdrao mgŭn Phú Hòa mơ̆ng mlan 9 thŭn anei, grăp blư̆ čih anăn knŏng luč ka bŏ 1 mnĭt. Kdrăp mnơ̆ng đru bi hrŏ ênoh mnuih mă bruă brei dăp nanao ti anôk tŭ drông, pioh mnuih mă bruă kơ dŭm bruă mkăn.

Aê mdrao Lương Văn Phước, Khua anôk bruă mdrao mgŭn Phú Hòa brei thâo, boh tŭ dưn jing klă mngač tơdah mơ̆ng knhal jih mlan 7 truh kơ ară anei, anôk bruă hrăm mbĭt pŏk ngă klei ksiêm mkă dlăng klei suaih pral kluôm yang ƀuôn, hŏng êbeh 3.500 gưl čô mnuih dưi ksiêm mkă dlăng.

“Mơ̆ng leh pŏk ngă maĭ anei snăn bruă kiă kriê mnuih mă bruă dưi êđăp ênang hĭn, êlâo dih snăn brei dăp lu mnuih, ară anei knŏng 1 truh kơ 2 čô mnuih jing dưi leh bruă anăn. Mâo klei găl čiăng kơ pô tiŏ nao dŭm čô knuă druh čiăng đru kơ dŭm anôk bruă mkăn mkă dlăng, boh nik jing anôk mkă dlăng klei suaih pral jih jang mnuih ƀuôn sang hlăk mbĭt anăn pŏk ngă. Knŏng tŭ jum ti anei arăng dưi mđĭ nao mtam ti anôk mkă dlăng, lui hĕ gưl mkă dlăng kdrăp maĭ mŏk mơ̆ng dŭm anôk bruă mdrao mgŭn”.

Bruă čŏng pô dlăng klei hâo hưn mnuih ruă hlăm hdră tŭ jum đru kơ Anôk bruă mdrao mgŭn Phú Hòa bi hrŏ bruă čih pioh leh anăn dăp wĭt mnuih mă bruă. Anei ăt jing klei čiăng klă sĭt hlăm klei bi mlih mrô ti nah gŭ: kdrăp djŏ guôp, ênưih ba yua, mkiêt mkriêm hruê mmông kơ wăt mnuih ƀuôn sang leh anăn knuă druh hluê ngă.

Huỳnh Thị Son, Khua bruă Đảng să Phú Hòa 1, čar Dak Lak yăl dliê, mbĭt hŏng ai dưi ngăn prăk, hlăm wưng êgao alŭ wăl mâo tŭ mă leh lu klei đru mơ̆ng ênoh yang ƀuôn đru mguôp. Maĭ čih anăn mkă dlăng ti Anôk bruă mdrao mgŭn Phú Hòa mâo Agribank Anôk bruă Phú Yên đru brei jing sa hlăm dŭm anăn.

"Hlăm wưng leh êgao, să Phú Hòa 1 mâo lu klei bi mguôp, klei kah mbha, klei đru mơ̆ng dŭm knơ̆ng bruă, dŭm anôk bruă duh mkra hlăm alŭ wăl, boh nik jing bruă bi mlih mrô. Anei ăt jing klei đru čiăng êdi, đru lŏ thiăm ai dưi kơ să Phú Hòa 1 hlăm bruă bi mlih mrô hlăm jih jang bruă".

Hluê si Knơ̆ng bruă mdrao mgŭn Dak Lak, klei bi mlih mrô hlăk dưi pŏk ngă mơ̆ng hră ênua mdrao mgŭn, hră mar klei suaih pral điện tử truh kơ tla prăk amâo yua prăk leh anăn dŭm klei găl đru kơ bruă ksiêm mkă dlăng mdrao mgŭn. Wưng thŭn 2026-2030, Dak Lak bi mklă leh hdră êlan dăp giăm 484 êklai prăk kơ 7 hdră bruă mdrao mgŭn mrô. Mbĭt hŏng ênoh duh mơ̆ng Knŭk kna, čar ăt mtrŭt mđĭ ai iêo mkrum ai dưi yang ƀuôn čiăng thiăm mbŏ, mđĭ hnơ̆ng tŭ jăk bruă ti dŭm anôk djŏ guôp.

Leh bi mŭt mbĭt, čar Dak Lak mâo 36 anôk bruă mdrao mgŭn mâo jhưng đih dôk, mâo 14 boh sang êa drao leh anăn 22 anôk bruă mdrao mgŭn. Kiosk mdrao mgŭn thâo mĭn ară anei dưi pŏk ngă ti 15 anôk bruă. Hlăm anăn, Agribank Anôk bruă Phú Yên đru kơ kdrăp mnơ̆ng ti Anôk bruă mdrao mgŭn Phú Hòa leh anăn Anôk bruă mdrao mgŭn Sơn Hòa. Phan Thông Thái, Khua Anôk bruă Agribank Phú Yên brei thâo, anôk bruă dôk mâo hdră kčah lŏ dơ̆ng đru kơ kdrăp mnơ̆ng ngă bruă hlăm bruă mdrao mgŭn leh anăn msir mgaih hră mơar ti dŭm să, ƀuôn hgŭm hlăm alŭ wăl.

"Hmei dôk mâo hdră lŏ dơ̆ng đru kơ Kiosk mdrao mgŭn thâo mĭn lehanăn dŭm Kiosk kơ dŭm knơ̆ng bruă sang čư̆ êa alŭ wăl mơh, đru kơ dŭm kdrăp yua čiăng si srăng ngă čiăng đru kơ mnuih ƀuôn sang dưi dưn dŭm klei tŭ dưn mơ̆ng bruă bi mlih mrô."

Klei găl mơ̆ng yang ƀuôn amâo mâo bi hrô ôh hŏng klei duh bi liê mơ̆ng knŭk kna, ƀiădah dưi thiăm mbŏ hlăm dŭm klei čiăng klă klơ̆ng ti nah gŭ. Hŏng dŭm kdrăp mnơ̆ng leh anăn klei găl djŏ guôp hŏng klei čiăng yua sĭt ti nah gŭ, klei tŭ dưn mlih mrô dưi ƀuh mtam hlăm dŭm klei bi mlih klă klơ̆ng. Msĕ si ti dŭm anôk bruă mdrao mgŭn mơ̆ng čar Dak Lak, klei tŭ dưn bi êdah hlăm bruă kdrăp mnơ̆ng dưi ba yua đru leh kơ mnuih ƀuôn sang hrŏ klei ngă hră mơar leh anăn bi hrŏ mmông dôk guôn.