Êlan kbưi, mdêč mdar ƀiădah kăn dưi gang lei phung tuê hiu čhưn êngiê nao ti Vi Rơ Ngheo hlăm dŭm hruê akŏ thŭn mrâo. Pô mkŏ mjing klei iêo jăk anăn jing A Hiền. Mnuih ƀuôn sang pia kơ ñu jing pô bi mrâo krĭng ƀuôn sang hđăp leh anăn wăt kơ Phạm Văn Thắng, k’iăng khua bruă sang čư̆ êa kdriêk Kon Plông ăt mâo klei pah mni kơ mnuih mâo klei đru mguôp prŏng mkŏ mjing gru mngač hlăm hră kak mkŏ mkra krĭng ƀuôn sang mrâo leh anăn mđĭ kyar bruă hiu čhưn ênguê yang ƀuôn mơ̆ng kdriêk:

 “A Hiền mâo bruă sang čư̆ êa alŭ wăl bi myuôm kyua klei thâo. Ñu bi kƀĭn mnuih ƀuôn sang leh anăn blŭ mnuih ƀuôn sang hmư̆. Dŭm hdră êlan, hdră tă mơ̆ng kdriêk, mơ̆ng să ăt ñu thâo klă. A Hiền jing pô kmeh gơ̆ng, nao êlâo čiăng ngă dŭm mta bruă mơ̆ng bruă ru mjing bi msiam hlăm ƀuôn truh kơ mkŏ mjing dŭm mta bruă, klei kdŏ mmuñ, rŭ mjing homestay, A Hiền jing pô ba anăp nanao”.

Čiăng mkŏ mkra krĭng ƀuôn sang mrâo mơ̆ng dŭm klei hđăp, mâo hŏng anei 5 thŭn A Hiền iêo jak mnuih ƀuôn sang ƀuôn Vi Rơ Ngheo hŏng bruă mkra mđĭ sang pô dôk. Čŏng mdưm mta kñăm tal êlâo jing Doh – siam, A Hiền lŏ mă yua boh tâo ti hnoh êa, mă dŭm kna kyâo êbuh, bi lar mjeh mnga pôk.. mkŏ mjing wăl siam jiă kma knhuab gru djuê ana mơ̆ng mnuih Sêdang. Ngă êjai, iêo jăk êjai, mtrŭt mjhar truh knhal tuč A Hiền mâo mnuih ƀuôn sang hlăm ƀuôn sa ai, hrăm mbĭt bi đru hdơr pô bi mrâo ƀuôn hđăp:

 “Tal êlâo mnuih ƀuôn sang mkra bi jăk sang dôk mơ̆ng diñu leh anăn wăl sang tlô. Djŏ tuôm hŏng prăk kăk hlăm anei mnuih ƀuôn sang adôk dleh dlan ƀiădah kyua mâo prăk mơ̆ng bruă răng mgang dliê. Msĕ hŏng gŏ sang kâo kriê dlăng wăl dliê 4810 jing 30ha hlăm sa thŭn hrui wĭt mâo 30 – 35 êklăk prăk srăng mă prăk anăn mkra pưk sang pô”.

Hŏng klei mĭn sang dôk doh siăm ƀiădah tơdah amâo mâo hnư hrui wĭt klei hdĭp mnuih ƀuôn sang ăt lĕ hlăm klei ƀun ƀin, mơ̆ng klei kčĕ, hdră tă mơ̆ng bruă sang čư̆ êa să Đăk tăng, kdriêk Kon Plông, A Hiền bi tŭ ư hŏng mnuih ƀuôn sang mđĭ kyar bruă hiu čhưn ênguê yang ƀuôn.

Čiăng kơ phung tuê mâo klei hơ̆k mơak êjai mơ̆ng wăl krah Măng Đen, kdriêk Kon Plông găn 40km êlan čư̆ čhiăng mdêč mdar nao ti Vi Rơ Ngheo, A Hiền lŏ ba anăp hlăm bruă bi râo klei găl dhar kreh knhuah gru mơ̆ng mnuih Sêdang čiăng mkŏ mjing ai iêo jak phung tuê leh anăn mđing truh klei thơ̆ng kơ bruă hlăm bruă mnia mblei, bruă hiu čhưn ênguê.

Mơ̆ng hdră tă klă mngač, mnuih ƀuôn sang ƀuôn Vi Rơ Ngheo lŏ rŭ mdơ̆ng sang roong dhar kreh, rŭ mdơ̆ng sang krum, mkŏ mjing êpul tông čing, kdŏ čhuang, rơ̆ng kơ dŭm knăm mơak knhuah gru, mđĭ mjeh dŭm mnga pôk hlăm alŭ wăl, kriê pioh 5 čŏng čư̆ mnga pôk đỗ quyên, sim, mua hlăm jhŭm dar ƀuôn…Wưng tal êlâo dŭm gŏ sang mâo klei găl dưi mkŏ mjing 5 homestay čiăng kơ phung tuê đăm mlam. Êjai mâo hnư hrui wĭt mơ̆ng bruă hiu čhưn ênguê, A Hiền yua mtam ênoh prăk anei ba mnuih ƀuôn sang ƀuôn sang ƀuôn Vi Rơ Ngheo nao čuă dlăng ti dŭm čar kwar Dưr čiăng hriăm kơ bruă hiu čhưn ênguê yang ƀuôn. Ayŏng A Nhoa, sa čô mnuih ƀuôn sang hlăm ƀuôn brei thâo, bruă hiu čhưn ênguê đru leh kơ klei hdĭp mnuih ƀuôn sang mâo klei mlih hŏng lu klei hơ̆k mơak:

 “Ngă bruă hiu čhưn ênguê brei kơ ƀuôn sang mlih lu sơnăk. Ƀuôn siam hĭn, mnuih ƀuôn sang hơ̆k mơak êjai lŏ mâo hnư hrui wĭt. Phung tuê hiu čhưn ênguê ăt hơ̆k mơak, khăp ƀơ̆ng khăp huă msĕ hŏng pô, khăp nao mă kan ti hnoh êa, khăp nao hlăm dliê leh anăn khăp nao wiă mdiê. Čiăng dưi ngă bruă hiu čhưn ênguê pô leh anăn mnuih ƀuôn sang ăt gĭr bi mlih, tŭk knă srăng êbăt jăk, tông čĭng – kdŏ čhuang srăng siam, srăng hơ̆k mơak, thâo kơ bruă čiăng iêo jak phung tuê hiu čhưn ênguê.”

Hlăm dŭm hruê akŏ thŭn 2025, ƀuôn hiu čhưn ênguê Vi Rơ Ngheo, să Đăk Tăng, kdriêk Kon Plông, čar Kon Tum drông leh lu phung tuê hiu čhưn ênguê. Ayŏng A Hiền yua mạng yang ƀuôn čiăng ngă bruă nao drông, hiu atăt, dăp anôk huă ƀơ̆ng mdei msăn kơ phung tuê, hơ̆k mơak hưn mđah klei mĭn tĭng pô leh anăn mnuih ƀuôn sang hlăm bruă mkŏ mkra krĭng ƀuôn sang mrâo ăt msĕ mơh mtrŭt mđĭ klei đĭ kyar bruă hiu čhưn ênguê yang ƀuôn:

Wưng tết phung tuê hriê lu sơnăk. Thŭn anei srăng ngă lu hĭn kơ thŭn dih. Mnuih ƀuôn sang bi mguôp hdơ̆ng pô, êdei anăp amâo djŏ knŏng răng mgang dliê, mnga, čư̆ kơ anôk diñu nao čuă dlăng. Bruă hiu čhưn ênguê ăt djŏ hŏng knhuah gru pô, djŏ mnuih Sêdang phŭn kơh phung tuê mơ̆ng kbưi amâo mâo êdu ai brei kơ mnuih ƀuôn sang mâo klei hdĭp mda”.

Mơ̆ng pô ba anăp A Hiền, ƀuôn Vi Rơ Ngheo, să Đăk tăng, sa krĭng ƀuôn sang ƀun kpăk hŏng čư̆ dliê ară anei jing gru hmô êdah êdi hlăm bruă mkŏ mkra mnuih ƀuôn sang mơ̆ng kdriêk Kon Plông, čar Kon Tum. Ăt mơ̆ng klei sa ai mơ̆ng mnuih ƀuôn sang hlăm ƀuôn leh anăn klei gĭr mơ̆ng ayŏng A Hiền hlăm bruă kriê pioh, bi lar knhuah gru, bi râo dŭm klei găl mơ̆ng dŭm mta hđăp, ară anei Vi Rơ Ngheo lŏ jing anôk jăk êdi hlăm hră kak bruă hiu čhưn ênguê. Klei yăl dliê mơ̆ng A Hiền leh anăn ƀuôn Vi Rơ Ngheo ăt brei ƀuh, knhuah gru dhar kreh amâo djŏ knŏng jing mnơ̆ng kriê pioh yuôm bhăn, ƀiădah tơdah thâo bi lar srăng lŏ ba truh ai ktang hlăm klei mđĭ kyar bruă duh mkra ala ƀuôn.