Hlăm wưng yan mdei prŏng thŭn anei, mơ̆ng grăp knăm sa truh kơ knăm êma hlăm hruê kăm, 40 čô hđeh mâo klei hdĭp dleh dlan ti ƀuôn Trol Đeng, wăl krah Čư̆ Ty, kdriêk Đức Cơ hơ̆k kdơ̆k nao hlăm adŭ hriăm êjai hlăm ƀuôn. Khădah mrâo 6 thŭn đa đa 10 thŭn, hơ̆k kdơ̆k djă ba hră m’ar, giê čih lehanăn dŭm mmông hriăm, hlăp lêñ. Rơ Mah H’Xiêu, 7 thŭn, ƀuôn Trol Đeng, wăl krah Čư̆ Ty, kdriêk Đức Cơ, brei thâo:

“Kâo hriăm adŭ 2, nao hriăm dưi hlăp lêñ, nai mtô kâo dlăng boh hră, nao hriăm kâo ƀuh jăk êdi.

Bi adei H’Nhi Ê Ban, 10 thŭn ƀuh m’ak êdi hlăk dưi nao hlăm adŭ hriăm.

“Thŭn anei kâo đĭ adŭ 5, kâo ƀuh m’ak êdi, dưi hmư̆ nai mtô, kâo khăp êdi dưi nao hriăm msĕ snei.

Nai mtô Nông Ngọc Huân, (nai mtô Sang hră gưl 3 Lê Hoàn, kdriêk Đức Cơ) jing 1 hlăm dŭm čô nai ba anăp nao mtô kơ phung hđeh ƀuôn Trol Đeng. Tinei, ñu gĭr mtô kơ phung hđeh čih hră, dlăng boh hră lehanăn ngă klei ksiêm tĭng. Nai mtô Nông Ngọc Huân brei thâo, kâo ƀuh m’ak êdi hlăk phung hđeh ti krĭng dleh dlan thâo ƀrư̆ ƀrư̆ mơ̆ng grăp mmông hriăm.

“Phung hđeh mŭt adŭ 1 phung nai srăng ktrâo lač kơ phung hđeh čih lehanăn dlăng hră, mbĭt anăn mprăp kơ phung hđeh dŭm klei thâo hdĭp. Phung hđeh prŏng dlăng boh hră, čih thâo hĭn mơh, ƀiădah čiăng kơ phung hđeh jhŏng hĭn snăn phung nai srăng mâo klei hriăm mdê, hdră ngă mdê čiăng kơ phung hđeh lŏ mâo klei thâo hĭn. Ƀuh phung hđeh thâo hĭn, m’ak hĭn mơh, digơ̆ nao hgŭm jăk êdi hlăm dŭm hdră bruă.

Hluê nai mtô Lê Thị Xuân, Êpul êdam êra wăl krah Čư̆ Ty, kdriêk Đức Cơ, khădah kƀah êwư, adiê hlĭm hjan ăt nao sang hră mơh. Adŭ hriăm hlăm yan mdei prŏng amâo mă prăk ti ƀuôn Trol Đeng amâo djŏ knŏng ba klei thâo săng kơ phung hđeh ƀiădah lŏ đru kơ phung hđeh ba anăp dưi tui ksiêm, ngă bruă kơ êpul êya lehanăn amâo mdei đĭ hriê kơ prŏng.

“Hlăm hdră mtô bi hriăm tinei, kâo ƀuh phung hđeh hur har, jih ai tiê hriê hriăm, khădah adiê hlĭm hjan ăt hriê hriăm ênŭm, đa hriê hriăm atăt adei điêt hriê mbĭt. Phung hđeh kƀah lu mta mnơ̆ng ƀiădah ƀuh ai tiê hriăm hră phung hđeh tinei jăk êdi. Kâo čang hmăng hdră anei srăng dưi krơ̆ng kjăp hlăm dŭm yan mdei prŏng ti anăp.

Amai Lê Thị Thu, Khua bruă êdam êra wăl krah Čư̆ Ty brei thâo, adŭ hriăm hlăm yan mdei prŏng dưi mkŏ mjing ti ƀuôn Trol Đeng jing adŭ mtô bi hriăm mơ̆ng phung hđeh wăl krah hlăm yan mdei prŏng. Êpul srăng gĭr krơ̆ng kjăp hdră anei hlăm dŭm thŭn kơ anăp čiăng đru kơ phung hđeh ti krĭng dleh dlan mâo klei găl dưi hriăm, hlăp lêñ lehanăn đĭ kyar kluôm dhuôm.

“Phung êdam êra mâo lu klei đru mguôp čiăng mtrŭt mjhar, mđĭ ai phung hđeh nao sang hră, mprăp kơ phung hđeh mâo klei thâo săng hlăm klei hriăm lehanăn hlăm klei hdĭp. Êpul êdam êra ăt mtrŭt phung mâo ai tiê đru kơ phung hđeh ti mmông hlăp lêñ mbha kơ phung hđeh 1 tŏ êa ksâo, đru kơ hdruôm hră, čhum ao lehanăn dŭm mta mnơ̆ng yua hriăm hră mjing wăl anôk hriăm lehanăn hlăp lêñ jăk kơ hđeh.

Thŭn hriăm mrâo truh, dŭm alŭ wăl brei kơ hđeh nao hriăm êlâo 2 hruê kăm čiăng kơ phung hđeh mưng hŏng sang hră, hŏng adŭ hriăm. Bi dŭm sang hră mkăn srăng brei hđeh nao hriăm hlăm akŏ hruê kăm ti anăp.

Sa yan mdei prŏng hŏng dŭm boh adŭ hriăm êjai, kƀah lu mta ƀiădah bŏ hŏng klei khăp, phung hđeh krĭng dleh dlan msĕ si dưi mâo klei mđĭ ai čiăng lŏ gĭr ktưn kpưn đĭ hĭn. Hŏng phung hđeh ba anăp, khădah jing mmông hriăm knŏng mâo ƀiă phung hđeh ƀiădah ba lu klei thâo săng, klei đĭ hriê kơ prŏng hlăk diñu dưi thâo săng hĭn kơ klei hdĭp mơ̆ng phung hđeh ti krĭng taih kbưi.