Ênai hgơr bi ruê̆ mmông hriăm mrâo kwang, adei Siu Nhi, hđeh hriăm adŭ 8A, Sang hră knŭk kna čiêm rông hđeh mnuih djuê ana ƀiă gưl sa leh anăn gưl dua Ia Puč, mbĭt hŏng ƀĭng găp mprăp hdruôm hră, bi yăl dliê leh hruê hriăm aguah. Phung hđeh dôk giăm sang hră wĭt kơ sang huă yang hruê dơ̆ng; bi Siu Nhi leh anăn ƀĭng găp dôk kbưi mă dŭm huôm êsei mâo amĭ ama mprăp mơ̆ng aguah, hrăm mbĭt huă ƀơ̆ng leh anăn mdei ti adŭ čiăng lŏ hriăm tlam. Anei jing hdră êlan êjai đru krơ̆ng kjăp klei hriăm dua gưl grăp hruê, hlăm wưng dôk guôn sang huă ƀơ̆ng, sang pui leh anăn anôk dôk jưh bi leh. Hŏng Siu Nhi, sang hră mrâo ba lu klei hriăm leh anăn thiăm klei mđĭ ai čiăng kơ adei gĭr ktưn:

“Yăng đar, kâo knŏng ƀuh wăl anôk msĕ snei hlăm tivi amâo dah ti dŭm sang hră mkăn đuč. Ară anei kâo dưi hriăm hlăm sang hră prŏng, prŏng leh anăn siam msĕ snei, kâo ƀuh mơak êdi. Kâo srăng gĭr hriăm jăk, hriăm thâo.”

Dŭm pruê̆ ana kyâo mrâo pla hlăm wăl sang hră Ia Pŭc mphŭn c̆ăt mta mda phŭn tal êlâo. Krĭng knông lăn dŭm thŭn êlâo ênguôt hnĭng, ară anei kwang ênai dlăng hră. Mbĭt hŏng dŭm boh adŭ hriăm, grăp êpul mnuih mă bruă mkŏ mdơ̆ng ƀăng bhă, bi msiam dŭm kdrêc̆ mtih knhal tuic, bi leh anôk mkra mjing mnơ̆ng ƀơ̆ng, anôk boh mnơ̆ng, ƀhu c̆hum ao ti wăl sang dôk jưh. Phan Thành Tiến- Khua sang hră knŭk kna čiêm rông mlir gưl sa leh anăn gưl dua Ia Puč brei thâo, kdrêc̆ bruă adôk amâo lu ôh ƀiădah mguôp hŏng grăp blư̆ huă ƀơ̆ng, pĭt đih leh anăn hdĭp mda grăp hruê mơ̆ng phung hđeh snăn brei ksiêm dlăng, bi mklă êlâo kơ ba yua.

Sang hră mâo ênhă êbeh 5ha, hŏng 23 adŭ hriăm leh anăn dŭm anôk bruă, mkăp djŏ hŏng klei čiăng hriăm, dôk jưh leh anăn dôk jưh mơ̆ng êbeh 700 čô hđeh sang hră. Êngao kơ mnuih mă bruă hluê si ênoh čuăn, čar Gia Lai brei dŭm sang hră lŏ thiăm mnuih răng mgang, mnuih mă bruă leh anăn mnuih mă bruă kriê dlăng hđeh sang hră êngao mmông; mbĭt anăn dăp prăk bi liê mkŏ dăp camera ti dŭm anôk čiăng êdi hlăm wăl sang hră. Phan Thành Tiến brei thâo, sang hră ksiêm dlăng, dăp êpul nai mtô, mnuih mă bruă mkăp mnơ̆ng ƀơ̆ng huă, răng mgang leh anăn êpul kriê dlăng hđeh sang hră êngao mmông hriăm. Mta kñăm jing tơdah sang huă ƀơ̆ng leh anăn anôk dôk djăp klei găl ngă bruă, dŭm hdră êlan kriê dlăng, rông ba leh anăn kriê dlăng phung hđeh ăt mprăp:

"Hlăm thŭn hriăm mrâo, ai tiê leh anăn klei mĭn mơ̆ng phung hđeh leh anăn phung amĭ ama hơ̆k mơak kyua mâo sang hră prŏng siam. Sang hră mkŏ mjing hdră êlan djŏ guôp hŏng klei bi hmô sang hră knŭk kna rông ba leh anăn mtô bi hriăm lehanăn klei hđeh sang hră ti alŭ wăl. Boh nik jing kơ klei mjuăt bi hriăm klei thâo săng hlăm klei hriăm hră mơar".

Ti krĭng knông lăn, sang hră knŭk kna rông ba ăt dưi mâo klei uêñ mĭn mơ̆ng lĭng kahan knông lăn alŭ wăl. Đại tá Đoàn Ngọc Báu, K’iăng khua bruă kđi čar knơ̆ng gĭt gai lĭng kahan čar Gia Lai, brei thâo: sang hră knŭk kna rông ba krĭng knông lăn amâo djŏ knŏng prŏng siam kơ anôk bruă nah gŭ ƀiădah lŏ jing klei bi hmô kơ hdră bhiăn hdĭp mda-mjuăt bi hriăm čiăng kơ phung hđeh đĭ kyar kluôm dhuôm. Kyua anăn, anôk bruă srăng đru kơ sang hră mkŏ mjing hdră ngă bruă, klei bhiăn, djŏ guôp hŏng grăp gưl thŭn.

“Anei jing bruă klam yuôm bhăn êdi. Hmei gĭt gai dŭm kđông kahan răng mgang knông lăn bi mguôp hŏng dŭm sang hră mlir gưl knŭk kna rông ba ti knông lăn; mkŏ mjing klei hâo hưn truh hŏng phung hđeh, phung nai mtô kơ klei bhiăn. Dŭm êpul bruă bi hgŭm hŏng dŭm êpul êya hlăm alŭ wăl mbĭt hŏng phung nai mtô krơ̆ng kjăp klei bhiăn rông ba hlăm hruê leh anăn klei bhiăn hlăm sang hră, rơ̆ng kơ phung hđeh mŭt ngă bruă mâo klei bhiăn mơ̆ng hruê tal êlâo mtam.”

Mơ̆ng dŭm hruê hriăm tal êlâo, sa hdră mrâo dôk pŏk hŏng nai leh anăn phung hđeh Sang hră Ia Puč. Ti krah krĭng knông lăn, ênai phung hđeh hriăm hră kwang grăp hruê, lŏ dơ̆ng ba klei đăo knang leh anăn ksul mbŭ dŭm klei čang hmăng kơ sa êdei anăp pŏk mlar mơ̆ng sang hră anei./.