Hlăm sang mrâo rŭ mdơ̆ng, amai Nguyễn Thị Lệ Thu ti alŭ mrô 4, ƀuôn hgŭm Tân Hòa, buôn prŏng Ƀuôn Ama Thuôt, čar Dak Lak, ñu jing sa čô amĭ rông 3 čô anak điêt hjăn, lu thŭn hdĭp ti sang aduôn. Boh sang mrâo prŏng giăm 40 m2 đru leh kơ 4 čô amĭ anak dưi mâo sa boh sang hơuh mđao.

 “Êlâo adih dôk mbĭt sang mdhă hŏng aduôn, adiê hjan ƀrôč, bi adiê mđiă hlơr ƀhŭl mtŭk mtŭl, dleh dlan êdi. Phŭn bruă kahan ksiêm jao kơ hmei sa boh sang, mâo sang gang angĭn, gang mđiă hmei mơak êdi, amâo lŏ huĭ kơ adiê hjan ƀrôč amâodah mđiă hlơr ôh. Kâo amâo mâo êlan duah prăk ôh, dơ̆ng mơ̆ng êlâo kâo amâo jhŏng mĭn pô srăng mâo sang dôk.

Gŏ sang amai H’Nuân Knul jing sa hlăm dŭm gŏ sang ƀun êdi ti ƀuôn Tiêu, să Êa Tiêu, kdriêk Čư̆ Kuiñ, čar Dak Lak. Amai brei thâo, gŏ sang mâo 6 čô mnuih ƀiădah amâo mâo lăn pla mjing, klei hdĭp knŏng jưh knang hlăm hruê hiu mă bruă mưn dua ung mô̆. Kyua dleh dlan, snăn gŏ sang amai dôk hdĭp hlăm sa boh sang tĭ brôč. H’Nuân bi mĭn snei, gŏ sang pô amâo dưi mâo ôh sa boh sang kjăp dưi gang mđiă hjan, ƀiădah ară anei amai dưi mâo leh sa boh sang kjăp.

 “Êlâo adih, ung mô̆ kâo blei sang kyâo arăng wĭt mdơ̆ng hŏng ênoh 3 êklăk prăk, ƀiădah ară anei gơ̆ muôr ƀơ̆ng leh. Ti anôk bruă kahan ksiêm mdơ̆ng brei sa boh sang mrâo, hmei hơ̆k mơak êdi. Ară anei ung mô̆ kâo gĭr mă bruă knuă čiăng rông anak aneh nao hriăm hră.

Hluê si Hồ Viết Hùng – Kơiăng khua Anôk bruă sang čư̆ êa să Êa Tiêu, kdriêk Čư̆ Kuiñ, Hdră mơ̆ng Phŭn bruă kahan ksiêm ti să mâo 22 gŏ sang dleh dlan kơ sang dôk dưi ba jao sang bi đru. Ênoh duh 1 êklai 760 êklăk prăk. Ară anei, dŭm gŏ sang mâo jao nao dôk leh hlăm sang mrâo. Bruă đru sang dôk amâo djŏ knŏng đru kơ dŭm gŏ sang “Bi hơĭt anôk dôk gĭr duh ƀơ̆ng” ƀiădah lŏ đru kơ alŭ wăl bi leh hnơ̆ng čuăn klei kơ sang dôk hlăm bruă mkŏ mkra krĭng ƀuôn sang mrâo. Hồ Viết Hùng brei thâo:

 “Ară anei hdră lăm lui sang tĭ ƀrôč ti alŭ wăl să dưi rơ̆ng kjăp mkă hŏng hnơ̆ng čuăn, đru hlăm bruă mkŏ mkra krĭng ƀuôn sang mrâo ti să. Dưi đru sang dôk, mnuih ƀuôn sang hơ̆k mơak, bi hơĭt ai tiê hdĭp mda, mđĭ kyar bruă duh mkra gŏ sang, đru mkŏ mkra să đĭ kyar kjăp ktang.

Wưng thŭn 2022 – 2025 čar Dak Lak gĭr mkra êbeh 5.000 boh sang đru kơ dŭm gŏ sang ƀun, giăm ƀun, gŏ sang knŭk kna dlăng ba, gŏ sang dleh dlan kơ sang dôk. Hdră rŭ mdơ̆ng 1.200 boh sang bi đru mơ̆ng Phŭn bruă kahan ksiêm jing hdră đru prŏng êdi, đru kơ čar dưi bi leh mta kñăm mâo kčah mtrŭn. Lê Bá Cảnh – Kơiăng khua Anôk bruă mặt trận čar Dak Lak brei thâo, leh mâo hdră anei, anôk bruă mặt trận čar dŭm gưl ti čar bi hgŭm hŏng anôk bruă kahan ksiêm, bruă sang čư̆ êa alŭ wăl, ksiêm dlăng bi mklă mnuih dưi dưn hdră anei lehanăn rŭ mkra ba jao kơ mnuih ƀuôn sang. Jih 1.200 boh sang dưi ba jao kơ mnuih ƀuôn sang mŭt dôk. Hlăm wưng ti anăp, Anôk bruă mặt trận čar Dak Lak srăng iêu mtrŭt klei đru mơ̆ng yang ƀuôn hluê ngă hdră rŭ mdơ̆ng dŭm boh sang adôk kơ mnuih ƀuôn sang.

 “Hmei ăt dôk pŏk hdră đru kơ mnuih dleh dlan kơ sang dôk lehanăn čang hmăng dŭm gưl, dhar bruă, êpul, phung mâo ai tiê kmah hlăm lehanăn êngao čar lŏ dơ̆ng bi hgŭm hŏng čar Dak Lak đru kơ mnuih ƀuôn sang ti alŭ wăl amâo mâo sang dôk. Si srăng ngă hlăm wưng thŭn 2022 – 2025, rơ̆ng bi leh hnơ̆ng čuăn mkŏ mkra êbeh 5 êbâo boh sang, đru kơ phung dleh dlan kơ sang dôk hlăm alŭ wăl čar.

Hdră mă bruă mơ̆ng Phŭn bruă kahan ksiêm, mdơ̆ng 1.200 boh sang kơ dŭm gŏ sang dleh dlan, gŏ sang knŭk kna dlăng ba, gŏ sang mnuih djuê ƀiă ti Dak Lak, dưi pŏk ngă mơ̆ng mlan 3/2024 lehanăn dưi ngă bi leh hlăm mlan 7/2024. Ênoh prăk ngă bruă anei truh 96 êklai prăk, hlăm anăn prăk Phŭn bruă kahan ksiêm đru truh 60 êklai prăk, ênoh adôk mơ̆ng alŭ wăl. Grăp boh sang, prŏng 36m2, mtih klia simang, pơ̆ng tôl, hŏng ênoh 80 êklăk prăk. Ară anei, 1.200 gŏ sang mâo sang dôk leh, mơ̆ng anăn đru kơ čar Dak Lak pral msir klei ư̆ êpa, bi hrŏ klei ƀun knap, đru klam klei dleh dlan hŏng mnuih djuê ƀiă, đru kơ mnuih ƀuôn sang hơĭt ai tiê mă bruă knuă, bi hgŭm hlăm hdră duh mkra, krĭng ƀuôn sang mrâo lehanăn răng mgang klei êđăp ênang ala čar. Sa hdră mă bruă prŏng ƀiădah dưi ngă leh hlăm êbeh 4 mlan brei ƀuh leh hdră duh bi liê, ngă bruă hŏng klei kjăp, bi hgŭm ba wĭt boh tŭ dưn mơ̆ng dŭm anôk bruă./.