Dŭm mlan knhal jih thŭn 2022, ai êwa mă bruă knuă ti ƀuôn Đăk Sei, să knông lăn Đăk Long, kdriêk Đăk Glei, čar Kontum lŏ dơ̆ng mjhĭt m’uăt, bi tiŏ êran. Mrâo leh pĕ kphê, 130 gŏ sang phung ƀuôn sang lŏ buč hbei ƀlang, pioh čhĭ kớang mkra mjing kpŭng. Ênoh mâo ba wĭt mơ̆ng dua mta mnơ̆ng pla anei đru leh kơ dŭm gŏ êsei mâo prăk blei mprăp mnơ̆ng dhơ̆ng tết lehanăn mnơ̆ng yua mkăn hlăm klei hdĭp. A Sôn, khua bruă Đảng ƀuôn Đăk Sei brei thâo, klei hdĭp mda lehanăn klei duh ƀơ̆ng mơ̆ng phung ƀuôn sang thŭn anei mâo leh klei bi mlih jăk, kyua hlue ngă jăk tui si hdră êlan mkŏ mkra krĭng ƀuôn sang mrâo mơ̆ng bruă sang čư̆ êa, lehanăn phung knuă druh lĭng kahan răng mgang knông lăn mơ̆ng kđông Đăk Long ktrâo atăt: “Bruă sang čư̆ êa, lehanăn dŭm êpul êya hlăm să, mâo leh klei mtrŭt mjhar, ktrâo atăt phung ƀuôn sang hlăm ƀuôn kơ ya mta bruă ngă hlăm klei mkŏ mkra krĭng ƀuôn sang mrâo. Kđông kahan răng mgang knông lăn tiŏ nao leh knuă druh lĭng kahan ktrâo atăt kơ bruă pla mjing, dlăng kriê mnơ̆ng pla mjing hŏng klei tŭ dưn. Thŭn anei phung ƀuôn sang mơak kyua kphê hbei dưi mâo boh mnga jăk. Ti krĭng knông lăn dleh dlan ƀiădah mrâo êgao sa thŭn klei hdĭp mda mâo leh klei bi mlih jing yuôm bhăn snăk”.

Đăk Long jing să knông lăn knông hŏng ala čar Lao dôk hlăm klei dleh dlăn êdi hlăm kdriêk Đak Glei, čar Kontum. Ngă hdră ala čar kñăm mkŏ mkra krĭng ƀuôn sang mrâo, dưi găn leh lu klei dleh dlan, truh jih thŭn 2022 să djăp 14/19 ênoh čuăn. Huỳnh Ngọc Ly, Khua knơ̆ng bruă sang čư̆ êa să Đăk Long brei thâo, dưi mâo hĕ klei tŭ dưn anei kyua mâo bruă sang čư̆ êa să, thâo dưn yua jăk bruă klam mơ̆ng phung ƀuôn sang hlăm klei mkŏ mkra krĭng ƀuôn sang mrâo “Êngao kơ klei kčĕ đru kơ bruă Đảng, kơ bruă sang čư̆ êa alŭ wăl ngă bruă čuăn mđĭ kyar klei duh mkra ala ƀuôn, răng mgang kjăp klei êđăp ênang yang ƀuôn. Kđông lŏ dơ̆ng tiŏ nao phung đảng viên bi mguôp hlăm êpul bruă Đảng nah gŭ kñăm čiăng thâo klă mngač ai tiê klei mĭn phung ƀuôn sang, mâo klei kăp kčĕ kơ êpul bruă Đảng, bruă sang čư̆ êa alŭ wăl kơ klei mđĭ kyar bruă duh mkra. Tal dua lĕ, hŏng klei phung knuă druh, lĭng kahan jing mnuih djuê ƀiă hlăm kđông mâo klei bi mguôp hŏng dŭm gŏ sang phung ƀuôn sang hlăm alŭ wăl đru digơ̆ mđĭ kyar klei hdĭp mda. Phung awăt hĭn hlăm yang ƀuôn mâo kđông mđing uêñ lehanăn tiŏ nao knuă druh đru hlăm klei mă bruă kñăm čiăng mđĭ kyar klei hdĭp mda”.

Thŭn 2022 čar Kon Tum mâo 7 boh să djăp ênoh čuăn krĭng ƀuôn sang mrâo, hlăm anăn mâo să krĭng knông lăn Sa Loong, kdriêk Ngọc Hồi bi knông hŏng ala čar Campuchia. Hlăm bruă mkŏ mkra krĭng ƀuôn sang mrâo, kyua mâo ai tiê thâo bi mguôp, bruă sang čư̆ êa, phung ƀuôn sang lehanăn phung knuă druh, lĭng kahan răng mgang knông lăn jih jang bi mđrăm mbĭt sa ai, mghaih msir djăp mta klei amâo mâo jăk hlăm alŭ wăl. Nguyễn Hữu Bảng, Khua knơ̆ng bruă sang čư̆ êa să Sa Loong lač, čiăng kơ să dưi djăp ênoh čuăn mkŏ mkra krĭng ƀuôn sang mrâo, hlăm anăn mâo klei đru mguôp prŏng mơ̆ng knuă druh, lĭng kahan kđông răng mgang knông lăn Sa Loong:“Čiăng kơ să Sa Loong knhal jih thŭn 2022 djăp ênoh čuăn krĭng ƀuôn sang mrâo, hlăm dŭm thŭn êgao mâo leh klei hgŭm plah wah kđông lehanăn să, hmei kreh pia hdơ̆ng găp jing kđông lehanăn să jing sa hlăm dŭm klei bi hgŭm mbĭt jăk snăk. Čăng hmăng hlăm dŭm thŭn kơ anăp bruă bi hgŭm anei srăng lŏ ling lang prŏng hĭn pioh đru kơ bruă mđĭ kyar klei duh mkra ala ƀuôn, bruă răng mgang klei êdăp ênang hlăm să jing jăk hĭn”.

Mđrăm mbĭt sa ai tiê hŏng bruă sang čư̆ êa, phung ƀuôn sang 13 boh să ti knông lăn hlăm čar Kontum mkŏ mkra krĭng ƀuôn sang mrâo, Knơ̆ng gĭt gai kahan răng mgang knông lăn čar Kontum tiŏ nao leh dŭm pluh čô knuă druh truh kơ 11 boh să, mbha bruă kơ phung đảng viên ti dŭm boh kđông nao bi mguôp hŏng 17 êpul bruă Đảng nah gŭ hlăm ƀuôn sang, ngă klei mjĕ mjing, đru čung ba truh êbeh 1 êbâo gŏ sang hlăm alŭ wăl knông lăn, đru phung ƀuôn sang mđĭ kyar klei hdĭp mda, rŭ mkra bruă nah gŭ hŏng dŭm êbâo hrue ai mă bruă. Mâo lu bruă bi hmô kơ klei bi hrŏ ƀun, mkŏ mkra krĭng ƀuôn sang mrâo hŏng klei tŭ jing, đru bi mlih leh klei hdĭp phung ƀuôn sang, lehanăn ƀŏ mta krĭng ƀuôn sang knông lăn. Thiếu tá Nguyễn Doãn Hải, k'iăng bruă kđi čar kđông răng mgang knông lăn Sa Loong, lač: “Êlâo dih phung ƀuôn sang dôk mưng hlăm klei bhiăn hđăp ngă hma buh mdiê ktơr sa thŭn knŏng sa yan, boh mnga amâo mâo jăk lu ôh. Mâo kđông kahan răng mgang knông lăn hriê đru rŭ mjing ngă lŏ, sa thŭn mâo dua yan, boh mnga đĭ hĭn. Bruă Đảng, Êpul khua kiă kriê kđông, mâo leh klei bi mguôp hŏng bruă sang čư̆ êa, knuă druh lĭng kahan nao đru phung ƀuôn sang lăm lui sang hlang mtih kđuh, mkŏ mkra krĭng ƀuôn sang djăp ênoh čuăn. Hlei gŏ sang amâo mâo ai tiê mă bruă, snăn mâo kahan răng mgang knông lăn, čiăng kơ gŏ sang mdul klei dleh dlan hlăm klei duah ƀơ̆ng”.

Truh jih thŭn 2022, čar Kon Tum mâo 43 boh să djăp ênoh čuăn krĭng ƀuôn sang mrâo. Hlăm anăn hŏng klông knông lăn mâo êbeh 292km bi knông hŏng dua lăn čar jing Lào lehanăn Campuchia mâo 6 hlăm 13 boh să djăp ênoh čuăn krĭng ƀuôn sang mrâo, hlăm anăn mâo kdriêk Ngọc Hồi truh 5 boh să, lehanăn kdriêk Ia H’Drai mâo 1 boh să djăp ênoh čuăn krĭng ƀuôn sang mrâo. Bruă hlue ngă tŭ jing hdră ala čar kñăm mkŏ mkra krĭng ƀuôn sang mrâo, hlăk dôk đru kơ 13 boh să ti knông lăn, hlăm 4 boh kdriêk Đăk Glei, Ngọc Hồi, Sa Thầy lehanăn Ia H’Drai čar   Kon Tum ƀrư̆ hrue mâo klei bi mlih sĭt./.