Hlăm sang mrâo mdơ̆ng kjăp siam, amai Hiao, ti ƀuôn Bông Phul, să Chư Á, ƀuôn prŏng Pleiku amâo lŏ mđăp ôh klei kčŭt ai tiê. Amai yăl dliê, êlâo dih, gŏ sang ñu hdĭp hlăm sa boh sang tĭ rưč, yan hjan hluh ƀrôč, dôk amâo mâo hơĭt pĭt amâo mâo mđao ôh. Kyua mâo klei knŭk kna mđing uêñ, lehanăn mâo prăk mơ̆ng bruă bi hrŏ ƀun hŏng klei kjăp, ñu mâo mdơ̆ng sa boh sang kjăp čiăng bi hơĭt klei hdĭp mda, čŏng kpưn đĭ tlaih kơ ƀun:

 "Sang hmei knap mñai dleh dlan snăk. Dôk hlăm sang tĭ rưč hjan hlĭm hluh ƀrôč, amâo mâo thao pĭt đih ôh. Ară anei mâo đru mdơ̆ng brei sang mrâo, pô hơit ai tiê duah ƀơ̆ng yơh”.

Mbĭt hŏng gŏ sang amai Hiao, mơ̆ng thŭn 2021 truh ară anei, bruă Đảng să Chư Á kiă kriê leh bruă sang čư̆ êa lehanăn bruă mặt trận, êpul êya pai mă jih klei găl mơ̆ng dŭm mta bruă. Mâo prăk đru mơ̆ng bruă bi hrŏ ƀun, keh “Kyua mnuih ƀun”, đru mdơ̆ng brei leh sang kơ 33 gŏ sang, lehanăn mđup brei truh 64 êmô ana mđai kơ dŭm gŏ sang ƀun rông ba. Truh ară anei, să Chư Á mâo leh 16 gŏ sang tlaih leh mơ̆ng ƀun, lehanăn 12 gŏ sang tlaih leh mơ̆ng klei giăm ƀun, bi hrŏ ênoh hgŏ sang ƀun hlăm să adôk 39 gŏ sang (truh 1,58%). Trương Văn Minh, K’iăng khua bruă Đảng, khua knơ̆ng bruă sang čư̆ êa să Chư Á, lač:

"Wưng ti anăp, bruă Đảng lehanăn bruă sang čư̆ êa alŭ wăl kiă kriê leh mnuih ƀuôn sang dưn yua jih ai dưi čiăng bi leh bruă bi hrŏ ƀun dơ̆ng mơ̆ng ară anei truh thŭn 2025. Boh nik, klei mjuăt bi hriăm bruă knuă, hlăm krĭng mnuih ƀuôn sang djuê ƀiă, đru kơ mnuih ƀuôn sang mâo bruă knuă mă hơĭt, tlaih mơ̆ng ƀun hŏng klei kjăp. Ktưn truh thŭn 2025, hlăm să amâo lŏ mâo ôh gŏ sang ƀun ƀin”.

Mơ̆ng thŭn 2021 truh ară anei ƀuôn prŏng Pleiku đru mdơ̆ng lehanăn mkra mrâo truh 64 boh sang kơ dŭm gŏ sang ƀun, hŏng ênoh prăk bi liê jih jang êbeh 3 êklai prăk. Giăm 100 gŏ sang ƀun, lehanăn giăm ƀun mâo čan prăk hŏng mnga hdjul, pioh duh ƀơ̆ng, hŏng ênoh prăk êbeh 4,6 êklai prăk. Ară anei kluôm ƀuôn prŏng adôk truh 149 gŏ sang ƀun, knar hŏng 0,24%. Hnơ̆ng ênoh gŏ sang ƀun hlăm mnuih djuê ƀiă ăt hrŏ mơ̆ng 2,94% thŭn 2021 thŭn adôk 1,29%. Dưn yua jih boh tŭ dưn leh mâo, bruă Đảng ƀuôn prŏng Pleiku srăng lŏ gĭt gai djăp alŭ wăl mguôp hŏng dŭm bruă mkăn, ruah hdră mă bruă bi djŏ, lehanăn guôp hŏng grăp čô mnuih. Nguyễn Thị Thúy Diễm, K’iăng khua bruă Đảng khua knơ̆ng bruă sang čư̆ êa să Diên Phú, ƀuôn prŏng Pleiku, brei thâo:

"Hmei lŏ dơ̆ng mkŏ mjing hdră đru kơ dŭm gŏ sang ƀun, wưng mrâo thŭn 2025; mđĭ ênoh mâo ba wĭt kơ mnuih ƀuôn sang, dưn yua boh tŭ dưn mơ̆ng bruă msir klei ư̆ êpa, bi hrŏ klei ƀun knap wưng leh êgao, lehanăn ngă jăk hĭn hlăm wưng ti anăp.”

Nguyễn Thanh Bình, k’iăng khua dhar bruă Mặt trận ɃP. Pleiku brei thâo, wưng kơ anăp, bruă mặt trận mđrăm mbĭt hŏng bruă Đảng, bruă sang čư̆ êa ƀuôn prŏng Pleiku hlăm klei hlue ngă dŭm hdră êlan djuê ana lehanăn bi hrŏ ƀun hŏng klei kjăp:

"Wưng tinăp, dhar bruă  mặt trận ƀuôn prŏng, lehanăn dŭl êya, dhar bruă srăng lŏ dơ̆ng bi hgŭm mâo klei hâo hưn lu hĭn, mtrŭt mjhar mnuih ƀuôn sang, ngă jăk djăp klei mtrŭt mjhar, lehanăn klei bi ktưn thâo khăp kơ lăn čar, mbĭt hŏng bruă bi hrŏ ƀun hŏng klei kjăp, mđĭ klei hdĭp mda mnuih ƀuôn sang ti dŭmboh ƀuôn mnuih djuê ƀiă”.

   Dŭm boh tŭ dưn êdah êdi hlăm bruă bi hrŏ ƀun hŏng klei kjăp ti Pleiku, čar Gia Lai brei ƀuh, bruă klam klei kiă kriê kluôm dhuôm, siă suôr mơ̆ng êpul bruă Đảng mjing leh klei ktang đru mnuih ƀuôn sang kpưn đĭ tlaih mơ̆ng ƀun, anăp truh kơ klei bi hơĭt klei hdĭp mda, lehanăn mđĭ kyar hŏng klei kjăp./.