Ti krah mmông aguah, sang dhar kreh alŭ Cao Thắng, ƀuôn hgŭm Ea Kao mâo lu mnuih nao ngă hră mơar lăn, hră gŏ êsei, hră jưh dôk. Amâo lŏ mâo ôh klei mnuih ƀuôn sang nao hlăm lu anôk, guôn lu hruê msĕ hŏng êlâo dih, knuă druh ba wăt anôk bruă sa ƀăng bhă truh ti alŭ čiăng ngă hră mơar kơ mnuih ƀuôn sang.

Lương Đình Trường, sa čô ti alŭ Cao Thắng brei thâo, lu thŭn anei ñu alah nao ti anôk bruă Knŭk kna kyua kbưi, amâo thâo hlei êmuh. Ară anei knuă druh wĭt mtô kyuanăn grăp čô bi hơ̆k mơak sơăi.

 “Mnuih ƀuôn sang hơ̆k mơak leh anăn hriê tinei čiăng ngă hră mơar, knuă druh giăm hŏng mnuih ƀuôn sang, hlăk mblang klă nik, klei anei djŏ hŏng hdră bhiăn mơ̆ng Đảng leh anăn Knŭk kna.”

Hluê si Đỗ Thị Nguyệt, k’iăng khua anôk bruă ngă hră mơar Knŭk kna ƀuôn hgŭm Ea Kao, knŏng hlăm mmông aguah tal êlao ti alŭ âo leh 170 čô hriê ngă hră mơar, lu hĭng êgao hŏng klei mĭn tĭng êlâo anăn.

 “Bi hŏng hruê kăm nao ngă hră mơar mta kñăm mơ̆ng Bruă sang čư̆ êa ƀuôn hgŭm jing gĭr msir hlăm wang 7 hruê leh anăn hŏng hră mơar ênưih srăng ngă leh hlăm hruê mtam.”

            Leh sa thŭn ngă gru hmô bruă Knŭk kna 2 gưl, ti Ea Kao, klei mnuih ƀuôn sang ƀuh klă hĭn amâo djŏ knŏng ngă hră mơar pral hĭn ƀiădah bruă Knŭk kna jĕ hŏng mnuih ƀuôn sang, čŏng pô hĭn.

Êbat ti êlan bêtôn mâo boh taih 600m mrâo leh ti alŭ 5, Dương Lê Sơn amâodưi mdăp ôh klei hơ̆k mơak. Êbeh 50 thŭn, êlan anei ăt jing êlan lăn. Lu blư̆ bi kƀĭn mnuih ƀuôn sang pŏk êlan amâo mâo tŭ dưn ôh. Ƀiădah leh ƀiă mlan ngă bruă Knŭk kna dua gưl, mnuih ƀuôn sang bi sa ai myơr giăm 200m2 lăn leh anăn đru mguôp giăm 200 êklăk prăk čiăng mkra êlan.

 “Bruă sang čư̆ êa alŭ wăl dua gưl mbruă hĭn, đru kơ mnuih ƀuôn sang hlăm klei mđĭ kyar bruă knuă msĕ si êlan klông êrô êbat. Jih jang mnuih ƀuôn sang bi mguôp, jih jang thâo săng pô dưi mkra êlan jăk kyuanăn mnuih ƀuôn sang sa ai.”

Mơ̆ng dŭm gru hmô msĕ sơnăn, ƀuôn hgŭm Ea Kao mtrŭt mjhar hdră bruă lăn čar, bruă ƀuôn, lăn yuôm ăt myơr čiăng pŏk phai êlan klông, bi msiam wăl krah leh anăn mđĭ kyar bruă hiu čhưn ênguê. Sa ai hŏng hdră êlan anei, lu gŏ sang mbĭt hŏng sang yơng Phổ Hiền čŏng pô myơr lăn pŏk êlan ktuê ênao Ea Kao, mkŏ mjing êlan êbat jơ̆ng đru kơ êpul êya. Thượng tọa Thích Phước Huyền, khua sang yơng Phổ Hiền lač, bruă myơr lăn amâo djŏ knŏng pŏk êlan ƀiădah lŏ pŏk wăl anôk mrâo kơ mnuih ƀuôn sang.

 “Čiăng dưi mkra êlan êbat jơ̆ng msĕ sơnăn jing jăk êdi kơ bruă mjuăt asei mlei kơ phung mduôn, phung đăo. Kâo dôk ti sang yơng Phổ Hiền ăt hơ̆k mơak čiăng kơ hdră bruă anei dưi bi leh êlâo kơ thŭn 2030.

Amâo djŏ knŏng bruă mkŏ mkra bi mlih, klei êđăp ênang ti nah gŭ ăt mâo klei mlih sĭt. Ayŏng Hồ Hậu, pô homestay ti ƀuôn hgŭm Ea Kao brei thâo, lu bruă mâo êpul kahan ksiêm msir prak kyua dôk mbĭt hŏng alŭ wăl.

 “Klei êđăp ênang yang ƀuôn jăk hĭn sitôhmô kâo mâo sa homestay ti êlan Nguyễn Trường Tộ, hlăm mmông tlam mâo arăng tlĕ pô dlăng camera mơĭt kơ kahan ksiêm, Aguah hruê êdei kâo nao ti anôk bruă kahan ksiêm mă bruă, khua bruă kahan ksiêm lač mâo mă leh pô tlĕ.”

Leh bi mŭt mbĭt, ƀuôn hgŭm Ea Kao msir leh êbeh 2000 hră mơar hŏng hnơ̆ng djŏ leh anăn êlâo kơ hdră kčah mâo 100%, hră mơar online mâo giăm 99% klei ư ai mơ̆ng mnuih ƀuôn sang leh anăn knơ̆ng bruă. Lu ênoh čuăn bruă duh mkra ala ƀuôn dưi bi leh êgao hdră kčah, hlăm anăn hnư hrui wĭt mâo êbeh 107% hdră kčah čar jao.

Đặng Gia Duẩn, Khua dlăng bruă Đảng ƀuôn hgŭm Ea Kao lač, ƀuôn hgŭm tŭ dưn leh sa thŭn ngă gru hmô mrâo jing dưi mkŏ mjing klei sa ai hlăm mnuih ƀuôn sang leh anăn klei sa ai hlăm êpul knuă druh.

 “Boh klei prŏng hĭng jing hmei dưi ngă klei sa ai mơ̆ng mnuih ƀuôn sang, mơ̆ng knuă druh dăl hlăm wưng păn bruă 2025 - 2030. Hmei ăt ba mdah hdră êlan kdlưn hĭn kơ mlih mrâo hră mơar Knŭk kna leh anăn bi mlih mrô, kơ bruă hiu čhưn ênguê nao mbĭt hŏng klei mnia mblei leh anăn čuăl mkă. Hlăm wưng kơ anăp êngao kơ hluê ngă dŭm hdră mtrŭn hmei srăng knăm jih hnơ̆ng kơ klei đĭ kyar 2 ênoh mrô.”

Sa thŭn jing ka sui ôh, ƀiădah mơ̆ng dŭm bĭt êlan dưi pŏk mlar, dŭm hră mơar dưi msir ti alŭ truh kơ klei čŏng pô mơ̆ng bruă Knŭk kna nah gŭ… gru hmô bruă Knŭk kna alŭ wăl 2 gưl ti Ea kao dôk brei ƀuh klei mlih klă mơ̆ng bruă Knŭk kna giăm hŏng mnuih ƀuôn sang leh anăn đru kơ mnuih ƀuôn sang klă klơ̆ng hĭn.