Ti krah đang kphê mtah, boh sang krum Nông Văn Minh, ti ƀuôn Quảng Hòa, alŭ Tam Điền, să Ea Tam, kdriêk Krông H’Nang êdah êdi kyua êa hrah ƀrĭk mrâo. Ñu hơ̆k mơak brei thâo: sang anei mrâo dưi lŏ mkra jih dŭm êtuh êklăk prăk. Djăp klei mkra mjing leh anăn bi msiam hlăm sang hlue si klei bhiăn djuê ana Nùng. Gŏ sang ñu mơ̆ng Cao Bằng hriê ti Dak Lak hdĭp mda mơ̆ng thŭn 1987. Hlăm krĭng ƀuôn sang mrâo, yan adiê jăk siam djŏ guôp hŏng lu mta ana êa drao, kriăng mă bruă anăn bruă duh mkra ƀrư̆ đĭ kyar hĭn.

Hriê truh tinei mă bruă duh mkra ăt đĭ kyar hĭn kơ ƀuôn sang, pô dưi pla ana sui thŭn. Ƀuh gŏ sang leh anăn jih buôn sang ăt đĭ kyar hĭn lu. Kâo pô ăt kriê pioh klei bhiăn mnuih Nùng An, brei anak čô đua đuôn amâodah kdrăp djue ana. Sang krum anei snăn êđăp hĭn, klei bhiăn djuê ana pô amâo dưi lui ôh. Ăt čang hmăng dŭm ênuk êdei dưi kriê pioh klei anăn.

Kbưi hŏng sang Minh dŭm đang kphê jing boh sang dua tal mprăp jăk siam mơ̆ng ayŏng Hoàng Đìng Tân, Khua dlăng bruă Đảng alŭ Tam Điền. Ñu brei thâo: gŏ sang mâo sa boh sang krum djuê ana mrâo lŏ mkra mjing brei kơ amĭ ama pô dôk, bi ñu lŏ rŭ mdơ̆ng thiăm boh sang giăm 2 êklai prăk čiăng dôk hjăn.

Hlue si Tân, ƀuôn Quảng Hòa ară anei mâo giăm 60 gŏ êsei snăn mâo êbeh 50 boh sang djuê ana. Djăp gŏ sang mâo dŭm ha lăn, pla kphê leh anăn lu mta ana mâo ênoh yuôm msĕ si durian, măkka, ƀơr. Bruă duh mkra đĭ kyar, klei hdĭp trei mđao, mnuih ƀuôn sang gĭr đru mguôp mkŏ mkra krĭng ƀuôn sang mrâo. Boh nik, wăt tơdah kbưi ƀiădah mnuih ƀuôn sang ăt kriê pioh knhuah dhar kreh djuê ana Nùng.

Ăt dưi kriê pioh dhar kreh, djuê ana hlăm bruă bi dôk ung mô̆, djiê ƀrŭ. Mjĕ êrô klei dhar kreh kdŏ mmuiñ snăn ăt dưi kriê pioh dhar kteh, msĕ si ƀêñ điŏ, ƀêñ gai. Ară anei dŭm adŭ mda asei leh anăn anak čô grăp čô thâo blŭ klei blŭ djuê ana pô. Hlăm ƀuôn snăn ăt kriê pioh jăk sang krum, jih alŭ ară anei rŭ mdơ̆ng 2 boh sang ximăng, adôk jing jih jang sang dlông soăi.

 Aduôn La Bế Thủy Trang, K’iăng Khua Knơ̆ng bruă sang čư̆ êa să Ea Tam brei thâo, kluôm să ară anei mâo 19 djuê ana hdĭp mda, hlăm anăn mnuih Tày - Nùng mâo giăm 90%. Hlăm wưng êgao, să mđing mđĭ kyar bruă duh mkra- ala ƀuôn mbĭt hŏng bruă kriê dlăng, mđĭ lar dhar kreh dŭm djuê ana, Boh nik, ƀuôn Quảng Hoà ăt dôk kriê pioh sang krum, bruă mñam mnal chàm mnuih Nùng leh anăn dôk krŭ wĭt dhar kreh djuê ana mmuiñ hèo phườn, lŏ pia jing mmuiñ lượn, bi kmlah. Anei jing wăl dhar kreh djuê ana jăk siam, mjing klei kñăm čiăng kơ alŭ wăl mđĭng mđĭ kyar hiu čhưn ênguê êpul êya.

Êngao kơ bruă răng kriê leh anăn mđĭ lar knhuah dhar kreh djuê ana snăn mnuih ƀuôn sang hlăm ƀuôn Quảng Hòa hrăm mbĭt mđĭ kyar bruă duh mkra, msir klei ư̆ êpa, bi hrŏ klei ƀun ƀin. Msĕ si klă klơ̆ng hlăm ƀuôn Quảng HòA snăn grăp boh sang prŏng siam, kjăp, mâo lu gŏ êsei mâo klei găl mđĭ kyar bruă duh mkra, gŏ êsei ƀun snăn mâo ênoh ƀiă đuč.

 Dŭm boh sang dlông ti krah đang kphê mtah ti ƀuôn Quảng Hòa, să Ea Tam, kdriêk Krông H Nang, čar Dak Lak. Leh êbeh 35 thŭn găn hgao, dŭm boh sang anăn ăt dôk nanao snăn, mâo mnuih Nùng dlăng jing mnơ̆ng yuôm bhăn lŏ dơ̆ng răng kriê leh anăn mđĭ kyar hlăm krĭng ƀuôn sang mrâo./.