Amâo mă prăk tăk mŭt dlăng, knŏng mâo wăl anôk mơ̆ng boh tâo lehanăn boh tâo, hlei pô truh ti wăl lăn mnga êa mơak Gành Đá Đĩa srăng nao găn ƀuôn boh tâo mâo anăn Phú Hạnh. Giăm anei, ƀuôn anei hing ang hlăm êlan hla pŏk ala ƀuôn lehanăn jak iêu lu phung tuê hiu čhưn ênguê jĕ giăm taih kbưi hriê ti ƀuôn čiăng tui ksiêm kơ wăl anôk boh tâo. Tinei amâo djŏ knŏng mâo lăn mnga êa mơak jăk siam, ƀiădah lŏ djă pioh lu gru kruăk đưm êlâo. Klei mdê êdi ti ƀuôn sang anei jing dôk kriê pioh kjăp dŭm kdrăn boh tâo đưm. Pô mă bruă ksiêm dlăng kơ hƀuê ênuk dhar kreh Nguyễn Danh Hạnh hlăk nao ksiêm dlăng knhuah gru boh tâo ti ƀuôn Phú Hạnh mâo leh klei tĭng bi mklă kơ dŭm ƀăng boh tâo đưm tinei snei:

"Mơ̆ng hdră ksiêm dlăng kâo ƀuh dŭm ƀăng boh tâo anei mâo hlăm brô 200 thŭn. Kâo bi mĭn brei mâo hdră kriê pioh kjăp čiăng êdei anei amâo djŏ knŏng mkăp kơ bruă ksiêm dlăng kơ sa ênuk gưl aê ama êlâo ƀiădah lŏ mkăp kơ hdră mdĭ kyar bruă hiu čhưn ênguê.

 Mbĭt hŏng ƀăng boh tâo, ƀuôn Phú Hạnh lŏ jak iêu lu kyua mâo dŭm ktuê êlan boh tâo đưm djiêu gah mâo wăt dŭm pruê̆ ana duối đưm mâo leh dŭm êtuh thŭn mjing dŭm ktuê êlan siam êdi hluê thŭn mlan knŏng tinei mâo. Mbĭt hŏng anăn jing dŭm tal mnư̆ mnang dưi mkra hŏng boh tâo dưi bi msiam hŏng lu êa mil, rup mnga djăp mta… dŭm mta ana dưi hdĭp hŏng yan adiê krĭng lăn anei. Wĭt ti Phú Hạnh, lu mnuih bi kngăr hlăk dưi ƀuh dŭm boh sang dưi mkra siam hŏng boh tâo, war rông mnơ̆ng ăt dưi mkra mơ̆ng boh tâo lehanăn dŭm boh sang hŏng boh tâo. Jih jang hrăm mbĭt mjing sa wăl anôk ƀuôn knhuah gru mơ̆ng boh tâo.

Ti ƀuôn Phú Hạnh mâo sa ktuê êlan boh tâo đưm ti djiêu gah mâo pruê̆ ana duối đưm nao truh phă cư̆ Cổ Thạch. Mơ̆ng čư̆ anei dlăng phă êa ksĭ drei dưi ƀuh Plao Yến, Kplang Xuân Đài lehanăn hang ksĭ Cổ Thạch ti anăp ală mta mtam.Phung tuê truh tinei mâo leh klei tui ksiêm dleh snăk wơr. Ăt msĕ hŏng lu tuê hiu čhưn gưl tal êlâo truh ti ƀuôn boh tâo Phú Hạnh lehanăn đĭ ti dlông čư̆ Cổ Thạch, Nguyễn Chí Tường, tuê hiu čhưn mơ̆ng Đồng Nai brei thâo:

"Čư̆ Cổ thạch siam, dlăng gơ̆ đưm đă lă êlâo msĕ si krĭng Ơrôp adih, kâo bi kngăr êdi anăp pruê̆ boh tâo mâo arăng dăp hlăm grăp tal, kâo ƀuh jăk êdi.

Găn dŭm thŭn mlan, dŭm kdrăn boh tâo ti ƀuôn Phú Hạnh ăt dôk nanao hŏng hruê mlan, mjing klei mdê kơ ƀuôn sang anei. Nguyễn Lâu, alŭ Phú Hạnh, să Tuy An Đông, čar Dak Lak ktưn hưn kơ knhuah gru boh tâo ăt dôk krơ̆ng kjăp ti ƀuôn pô lehanăn ară anei dôk mkăp kơ phung tuê hiu čhưn ênguê.

"Tuê truh tinei kreh iêu kâo atăt nao ti čư̆ Cổ Thạch, diñu si maoa hĕ boh tâo anei, kâo knŏng thâo anei jing kdrăn boh tâo dưm, đưm adih arăng dăp snei kyua ka mâo simăng ƀiădah ăt kjăp mơh. Mơ̆ng anăn gơ̆ dôk mâo snei truh kơ ară anei.

 Lu mnuih hlăm ƀuôn Phú Hạnh ară anei ăt dôk djă pioh lu hdră bruă boh tâo siă suôr hŏng klei hdĭp mnuih ƀuôn sang. Anei amâo djŏ jing hjiê kriê pioh boh tâo čŏng mâo mơ̆ng lăn adiê hŏng dŭm knhuah gru dŭm êtuh thŭn ƀiădah lŏ jing pŏk rup siam mơ̆ng lăn adiê, đru kơ phung tuê hiu čhưn bi mguôp hŏng hƀuê ênuk lehanăn klei jăk siam hrông msĕ hđăp mơ̆ng krĭng lăn knhuah gru./.