Gưl êdeh phiơr akŏ mlan 3 trŭn ti tač êdeh phiơr Ƀuôn Ama Thuôt mdiăng hriê lu phung tue mơ̆ng ƀuôn prŏng Hồ Chí Minh. Hlăm ênoh anăn mâo wăt mnuih Việt nam pô hdĭp kơ ala tač êngao lŏ hriê cuă ƀuôn Ama Thuôt, anôk siă suôr hŏng pô mơ̆ng hlăk ñu dôk hđeh msĕ hŏng aduôn Thu Mai. Ñu yăl dliê, mrâo kbiă mơ̆ng tač êngao phiơr tuôm hŏng êlan dơ̆ng prŏng Dam San-Nguyễn Lương Bằng-Võ Nguyên giáp, hlăm să Hòa Thắng, ñu msĕ si wơr êlan, amâo lŏ djŏ msĕ si mphŭn dô ôh, ară anei bi mlih leh êdi:

 Knŏng dŭm thŭn hŏng anei đuič, dŭm thŭn êlâo kâo nao, ƀuh jing amâo mâo djŏ msĕ si ară anei ôh. Ară anei lŏ hriê bi mlih leh snăk sơưn, klei bi mlih pral êdi.

Hlăm lu mta klei bi mlih ti Ƀuôn Ama Thuôt, êdah hĭn êdi jing alŭ wăl tač êdeh phiơr Ƀuôn Ama Thuôt. 50 thŭn êlâo, anôk anei mâo anăn pia tač êdeh phiơr Hòa Bình, bŏ hŏng đang hlang, klei kuăt, kdrăn min, mbĭt hŏng lu boh pôih, lehanăn kƀŭt phao, jing sa hlăm dua anôk găn klei bi blah ktang phĭt hlăm hrue 10/3/1975. Ƀiădah ară anei alŭ wăl anei, jing leh anôk mkŏ yuôm bhăn hlam klei êrô êbat êlan dơ̆ng lehanăn êlan êdeh phiơr, mâo êlan dơ̆ng pral mkŏ Khánh Hòa- Buôn Ma Thuột, êlan dơ̆ng prŏng mrô 27 mkŏ Daklak-Lâm Đồng lehanăn êlan dơ̆ng prŏng Võ Nguyên Giáp kpă b’blăng nao mŭt hlăm ƀuôn prŏng. Amĭ kkiêng ti Ƀuôn Ama Thuôt, ƀiădah kbưi leh hŏng ƀuôn prŏng lu thŭn, aduôn Hoàng Thị Kim Anh ăt bi kngăr lehanăn mơak ƀuh ti anăp klei bi mlih prŏng anei:

 Mơak lehanăn mâo klei jăk jĭn, kyuadah anei jing Ƀuôn Ama Thuôt mâo klei đĭ kyar pral. Kâo amâo lŏ thâo kral ôh, dŭm klei jing mphŭn dô, amâo lŏ ƀuh ôh.

50 thŭn leh êgao, amâo mâo djŏ knŏng jing gru êka mơ̆ng klei bi blah dưi mdrao hlao leh, Ƀuôn ama thuôt, mơ̆ng sa wăl krah ênguôt êưn, knŏng hŏng dŭm êbâo čô mnuih đuič, ară anei jing leh sa boh ƀuôn prŏng gưl sa, anôk phŭn kơ kphê Việt Nam. Să Hòa Thắng lehanăn jŭm tač êdeh phiơr Hòa Bình hlăk anăn, knŏng mâo mă dŭm pluh gŏ sang mơ̆ng mnuih ƀuôn sang djuê ana Mường mơ̆ng čar Hòa Bình hriê mkŏ mkra klei hdip mda, snăn ară anei jing leh sa hlăm dŭm anôk ksiêm duah klei kreh knhâo kơ bruă lŏ hma pla mjing prŏng hĭn hlăm kluôm ala, mkăp lu mta mjeh mnơ̆ng pla, lehanăn dŭm hdră êlan pla mjing, kdrăp mă bruă hlăm lŏ hma ti lăn dap kngư. Nguyễn Quang Ngọc, jing mnuih kbiă hriê mơ̆ng krĭng lăn mường čar Hòa Bình amĭ kkiêng hlăk thŭn 1960 ti să Hòa Thắng brei thâo, klei bi mlih hlăm krĭng lăn anei, jing mơ̆ng sang hlang mtih kđuh, ară anei jing leh ƀuôn prŏng mnuih êngŭm:

 “Mphŭn dô aê aduôn pô amâo mâo ôh msĕ si ară anei. Êdei anei mâo knŭk kna bi mlih đru kơ mnuih ƀuôn sang pla kphê, mbha lăn kơ mnuih ƀuôn sang. Msĕ si hlăm Hòa Thắng anei, ară anei mâo lu boh sang siam dưi mdơ̆ng kbiă hriê mơ̆ng bruă pla mjing, boh nik rah mjing êđai mjeh mnơ̆ng pla. Ngă bruă anei mâo lu hnơ̆ng dưi ba wĭt. Dlăng arăng mă bruă hlăm sa thŭn mâo ba wĭt truh kơ êklai prăk mơh”.

Să Hòa Thắng mâo leh êbeh 1.200 gŏ sang.Êjai Lăn Dap kngư mâo ba wĭt lu klei tŭ jing, snăn Hòa Thắng mơak mbĭt hŏng klei mơak, kyuadah kphê, boh durian, tiu mâo ênoh yuôm, mnuih ƀuôn sang Hòa Thắng knư̆ hĭn mơh đĭ mdrŏng pral. Dŭm boh sang siam mâo mdơ̆ng hlăm wăl êngao ƀuôn prŏng Ƀuôn Ama thuôt. Bruă mkŏ êlan dơ̆ng prŏng Võ Nguyên Giáp knư̆ hĭn mơh ngă kơ krĭng pla mjing anei lŏ jing krĭng ênuk mrâo.

Mơ̆ng sa boh wăl krah dôk hlăm klei bi blah, leh 50 thŭn êgao Ƀuôn Ama Thuôt kpưn đĭ jing leh sa boh ƀuôn prŏng jing anôk phŭn kơ bruă pla mjing kphê  Việt Nam, anôk phŭn kơ klei duh mkra, anôk ksiêm duah klei kreh knhâo kơ bruă lŏ hma pla mjing ti lăn dap kngư. 50 thŭn êlâo, klei bi blah sua mă klei êngiê kơ Ƀuôn Ama thuôt, jing kčưm kơ kdrăm mblah yan mnga mâo klei tŭ dưi, snăn Ƀuôn ama Thuôt, jăk siam ară anei, jing boh mơ̆ng 50 thŭn êgao mâo klei êđăp ênang hnŭk êngiê, lehanăn hluh lir. mơ̆ng anei, ƀuôn prŏng kčưm kơ sa êwang êlan mrâo, êlan đuĕ nao kơ klei mđĭ kyar, lehanăn ñŭ kma, jing sa anôk truh mơ̆ng kphê tar rŏng lăn./.