Aduôn Ngô Thị Kim Xuyến, alŭ 1, wăl krah Quảng Phú, kdriêk Čư̆ Mgar brei thâo:

 “Kâo hơ̆k mơak êdu, dŭm hruê anei amâo mâo pĭt ôh. Kâo lač jăk kơ Đảng, knŭk kna leh anăn kahan ksiêm rŭ mdơ̆ng leh kơ gŏ sang kâo mâo sang dôk, hơ̆k mơak êdi”.

Bi amai H’En Niê ti ƀuôn Kmiên, să Ea Drông, wăl krah Ƀuôn Hồ mgei ai tiê hlăm hruê mphŭn rŭ mdơ̆ng sang mrâo msĕ sơnei:

 “Kâo mgei ai tiê êdi, amâo thâo lŏ blŭ ôh, yuôm bhăn êdi, mâo sa boh sang mđao kơ gŏ sang. Êdei anăp dua čô ung mô̆ srăng mă bruă kreh kriăng, gĭr mđĭ kyar klei hdĭp gŏ sang”.

Dŭm boh sang anei hlăm hdră rŭ mdơ̆ng mrâo 4.285 boh sang kơ gŏ sang ƀun, giăm ƀun ti čar Dak Lak (pia klah čŭn jing hdră êlan 214) mơ̆ng kahan ksiêm čar gĭt gai, ngă mơ̆ng akŏ mlan 3 anei. Hluê anăn, hŏng ênoh giăm 343 êklai prăk, grăp boh sang rŭ mdơ̆ng mrâo dưi đru 80 êklăk prăk, hlăm anăn 60 êklăk prăk mơ̆ng ênoh đru gưl dlông leh anăn 20 êklăk prăk mơ̆ng ngăn prăk čar. Mbĭt hŏng anăn, hdră ăt đru mkra mđĭ 1.120 boh sang hŏng ênoh đru 30 êklăk prăk sa boh sang.

Leh mkrah mlan ngă bruă, mâo leh 1.026 boh sang hlăm hdră 214 dưi rŭ mjing, mĭn tĭng bi leh hlăm mlan 4 kơ anăp. Thiếu tướng Lê Vinh Quy, khua kiă kriê kahan ksiêm čar Dak Lak brei thâo, leh mjưh ruê̆ bruă kahan ksiêm kdriêk, čar jao kơ kahan ksiêm să, ƀuôn hgŭm, wăl krah hluê ngă hŏng mta kñăm gĭr rŭ mdơ̆ng 4.285 boh sang hlăm 5 mlan mkrah.

 “Gĭr bi leh hlăm hruê 15/8/2025. Hmei bi truh leh hŏng phung khua kahan ksiêm să, ƀuôn hgŭm, wăl krah čiăng kơ diñu lŏ dơ̆ng kčĕ hŏng gưl bruă Đảng nah gŭ, bruă sang čư̆ êa alŭ wăl leh anăn klă anăp mkŏ mjing êpul bruă mbĭt hŏng dŭm êpul êya mơ̆ng bruă Đảng nah gŭ, bruă sang čư̆ êa alŭ wăl, hur har đru kơ mnuih ƀuôn sang ngă dŭm hdră bruă anei djŏ hdră kčah, hruê mmông leh anăn hnơ̆ng tŭ jăk”.

Mbĭt hŏng hdră 214 mơ̆ng kahan ksiêm čar gĭt gai, ti čar Dak Lak mâo 3 hdră mkăn dôk ngă hŏng mta kñăm rŭ mdơ̆ng 3.027 boh sang đru kơ gŏ sang knŭk kna dlăng ba, phung mâo bruă tŭ dưn, gŏ sang ƀun, giăm ƀun. Dŭm hdră anei dưi mkăp brei ai dưi kơ alŭ wăl čiăng ngă bruă. Nguyễn Hải Đông, khua dlăng bruă Đảng kdriê Krông Ƀŭk brei thâo, kdriêk srăng bi leh bruă rŭ mdơ̆ng leh anăn mkra mđĭ 141 boh sang hlăm akŏ yan hjan:

 “Hmei mâo mta kñăm bi leh bruă rŭ mdơ̆ng leh anăn mkra mđĭ dŭm boh sang êlâo kơ hruê 15/7 kơ anăp. Hmei gĭt gai ktang phŭn dŭm anôk bruă, êpul bruă, knơ̆ng bruă ăt msĕ mơh dŭm alŭ wăl čiăng kơ hmei dưi bi leh bruă djŏ hdră kčah leh anăn đa đa alŭ wăl mđing truh bi hdơr hruê Cách mạng mlan 8 tŭ jing”.

Hŏng klei gĭr, klei hrăm mbĭt mơ̆ng bruă kđi čar ti Dak Lak, dŭm boh sang kjăp dôk pral dưi hrô kơ sang dôk êjai, sang tĭ rưč. Dŭm boh sang mrâo mkŏ mjing bôh kdrŭt čiăng kơ dŭm gŏ sang găn klei dleh dlan, lŏ thiăm klei đăo knang kơ dŭm hdră êlan, mơ̆ng Đảng leh anăn knŭk kna, hur har gĭr ktưn hlăm klei hdĭp./.