Jing sa hlăm dŭm să truăn hŏng bruă lŏ hma hlăm kdriêk Krông Ana, čar Daklak, să Bình Hoà tuôm hŏng lu klei dleh dlan hlăm bruă mkŏ mkra krĭng ƀuôn sang mrâo, boh nik ênoh čuăn kơ bruă mkra êlan klông. Hŏng klei gĭr mơ̆ng bruă Đảng, bruă sang čư̆ êa, lehanăn klei sa ai mơ̆ng mnuih ƀuôn sang, să Bình Hoà dưi tŭ yap leh jing să djăp ênoh čuăn krĭng ƀuôn sang mrâo hlăm thŭn 2017. Truh kơ ară anei, să lŏ dơ̆ng bi leh, mđĭ hĭn ênoh čuăn tinăp kơ bruă mkŏ mkra krĭng ƀuôn sang mrâo hŏng hnơ̆ng prŏng hĭn.  Nguyễn Thị Hiền Trinh, Khua bruă mặt trận să Bình Hòa brei thâo:

 “ Leh mkŏ mjing hdră êlan mkŏ mkra krĭng ƀuôn sang mrâo, snăn grăp thŭn mtrŭt mjhar, bruă mặt trận bi mkŏ mjing hlăm grăp boh alŭ, hŏng mta kñăm čiăng kơ mnuih ƀuôn sang ƀuh si klei yuôm bhăn mơ̆ng bruă anei, leh klei anăn lu mnuih ƀuôn sang dơ̆ng mâo klei bi sa ai, bi đru hŏng jih ai tiê... Truh ară anei mâo leh 99% êlan klông hlăm alŭ mâo mkra hŏng betong sơăi.”

Hŏng să Ea Sol, kdriêk Ea Hleo, čar Daklak, čhuang hlăm bruă mkŏ mkra krĭng ƀuôn sang mrâo mơ̆ng thŭn 2011, hŏng lăn ala jing prŏng, mnuih dôk raih rưng, ênoh mâo ba wĭt mơ̆ng mnuih ƀuôn sang jing ƀiă, êlan klông pưk sang ka mâo klei đĭ kyar, lehanăn ngăn prăk mơ̆ng alŭ wăl dôk hlăm klei kƀah. Bruă Đảng, bruă sang čư̆ êa să Ea Sol čoh čuăn tal êlâo jing mđĭ klei hdĭp mnuih ƀuôn sang, mơ̆ng anăn dưn yua jih ai ktang pô pioh mkŏ mkra krĭng ƀuôn sang mrâo. Dŭm gưl bruă Đảng, bruă sang čư̆ êa, dŭm êpul êya bi hâo hưn, mtrŭt mnuih ƀuôn sang ba yua klei kreh knhâo hlăm bruă pla mjing lehanăn rông mnơ̆ng, čiăng dưi ba wĭt boh tŭ dưn prŏng hĭn. Hoàng Trở, Khua êpul hgŭm phung ngă lŏ hma să Ea Sol brei thâo, truh knhal jih thŭn 2023, să mâo tŭ yap leh jing să krĭng ƀuôn sang mrâo:

 “Bi mlih mnơ̆ng pla mnơ̆ng rông, jing dŏ mâo ênoh hĭn, mtrŭt mnuih ƀuiôn sang pla mjing boh durian, anak măkka, boh êrang hương chi ... Čiăng dưi mâo boh tŭ dưn prŏng hĭn.

Hŏng lu hdră mă bruă hŏng klei knhêč, mbruă, thâo ba yua djŏ guôp hŏng klei jing hlăm alŭ wăl, mâo nanao klei bi hmô djŏ hlăm klei kiă kriê mơ̆ng êpul bruă Đảng, mơ̆ng phung đảng viên, truh kơ ară anei, kluôm čar Daklak mâo leh 78/151 boh sang krĭng ƀuôn sang mrâo ti hnơ̆ng prŏng hĭn, 1 jing đĭ ti hnơ̆ng kdriêk, Ƀuôn prŏng ƀuôn Ama Thuột bi leh jăk bruă mkŏ mkra krĭng ƀuôn sang mrâo. Mta kñăm truh thŭn 2025, Daklak mâo 100 să, lehanăn 4 boh kdriêk djăp ênoh čuăn krĭng ƀuôn sang mrâo.

Čiăng bi leh jăk mta kñăm anei, Nguyễn Đình Trung, Khua bruă Đảng čar Daklak brei thâo, čar lŏ dơ̆ng mđĭ hĭn klei thâo săng, bruă klam mơ̆ng dŭm gưl bruă Đảng, lehanăn jih bruă kđi čar hlăm bruă mkŏ mkra krĭng ƀuôn sang mrâo.

 “čar mâo leh hdră klă mngač hŏng grăp boh să, čiăng mơ̆ng anăn bi mâo sa hdră mă bruă djŏ hŏng dŭmmta kñăm mdê mdê mâo čoh čuăn. Mt akñăm knhal tuič hlăm bruă mđĭ kyar klei hdĭp mda ala ƀuôn jing rơ̆ng kơ krĭng ƀuôn sang mrâo jăk hĭn, klei hdĭp mnuih ƀuôn sang krĭng ƀuôn sang mâo mđĭ hĭn, bruă kđĭ čar kjăp ktang hĭn”.

Dưn yua jih bruă klam mơ̆ng dŭm gưl bruă, hŏng klei mbruă sang čư̆ êa kiă kriê lehanăn mđrăm mbĭt hŏng klei ƀuôn sang bi sa ai, snăn bruă bi ktưn “Daklak sa ai tiê mkŏ mkra krĭng ƀuôn sang mrâo, êdah leh klă hlăm dŭm alŭ wăl krĭng ƀuôn sang mrâo čar Daklak dôk bi mlih, ba wĭt leh klei trei mđao kơ mnuih ƀuôn sang./.