Să Vụ Bổn, čar Dak Lak mâo 8 sang hră hŏng dŭm gưl hriăm mơ̆ng gưl hđeh truh gưl dua. Hlue si hdră mkŏ dăp, să knŏng dôk 3 boh sang hră, mâo 2 sang hră mlir gưl sa – gưl 2 leh anăn 1 sang hră gưl hđeh. Nguyễn Huy Hoàng,  Khua Knơ̆ng bruă sang čư̆ êa să Vụ Bổn brei thâo, hdră msir dưi mkŏ mjing mơ̆ng tur knơ̆ng ksiêm dlăng boh klei grăp sang hră, mă klei blŭ mguôp bruă Đảng, Khua gĭt gai dŭm sang hră leh anăn tĭng yap klei găl boh sĭt mơ̆ng alŭ wăl.

“Hlăm hdră mkŏ mjing hdră msir,hmei akâo klei blŭ bruă Đảng, êpul gĭt gai dŭm sang hră, mơ̆ng tur knơ̆ng klei mĭn mă mnuih hriăm jing phŭn. Hŏng sa alŭ wăl kring taih kbưi, krĭng dleh dlan hmei ăt rơ̆ng djŏ hdră êlan mơ̆ng Đảng, Knŭk kna leh anăn djŏ guôp hŏng boh sĭt”.

Mbĭt hŏng bruă bi leh hdră msir, dŭm sang hră mđĭ hâo hưn mtô mblang, păn kjăp ai tiê klei mĭn phung knuă druh, phung nai leh anăn amĭ ama. Dŭm bruă djŏ tuôm kơ klei mkŏ mjing sang hră, êpul leh anăn klei găl hriăm hră dưi bi trông, mblang čiăng mjing klei sa anăn êlâo kơ pŏk ngă. Võ Thị Cẩm Hoa,  Khua sang hră hđeh điêt Hoa Ban Trắng, să Dliê Ya, čar Dak Lak brei thâo:

 “Hmei hâo hưn mtô mblang  hŏng jih phung knuă druh, nai mtô, phung mă bruă: hơĭt ai tiê  mprăp čiăng hlue ngă hdră êlan bi mŭt mơ̆ng Knŭk kna. Tal dua, hâo hưn hlăm dŭm êpul Zalo hŏng amĭ ama čiăng kơ phung amĭ amma hơĭt ai tiê; wăt tơdah bi mŭt snăn anak čô pô ăt hriăm ti dŭm anôk hriăm giăm hĭn, găl jăk hĭn”.

 Bi ti sang hră gưl sa Nguyễn Trãi, să Vụ Bổn, dŭm klei rŭng răng tal êlâo kơ gru hmô mkŏ mjing sang hră ăt mâo sang hră bi trông, mblang. Păn kjăp boh klei, đa đa phung knuă druh, nai mtô leh anăn amĭ ama sa ai hŏng hdră  msir. Trần Hải Đường,  Khua sang hră brei thâo:

  "Anei jing hdră êlan djŏ klă čiăng bi hrŏ anôk bruă mtô bi hriăm leh anăn mđĭ ênoh nai mtô. Kyua ară anei, ênoh phung nai mtô mâo anôk êbeh, anôk kƀah. Kơ klei mĭn, ai tiê, mơ̆ng păn kjăp boh klei snăn êpul knuă druh, nai mtô leh anăn phung amĭ ama sa ai sơăi. Grăp knhuang čiăng mkŏ mjing sang hră djăp hnơ̆ng čuăn ala čar, ăt msĕ mơh ba hnơ̆ng bi knar klei thâo  hră hlăm mnuih ƀuôn sang ƀrư̆ hruê đĭ hĭn.”

Kluôm čar Dak Lak ară anei mâo 1.267 anôk bruă mtô bi hriăm knŭk kna. Leh lu klei ksiêm dlăng, hdră msir mrâo hĭn mĭn tĭng hrŏ 646 anôk, bi knar êbeh 50% ênoh anôk phŭn. Hlăm mmông mă bruă hŏng dŭm knơ̆ng, dhar bruă, Lương Nguyễn Minh Triết, Khua hlăm bruă Đảng gưl dlông, Khua bruă Đảng čar Dak Lak mtă bruă mkŏ dăp brei păn kjăp hdră êlan Gưl dlông, bi khuăt anôk phŭn kriê dlăng mguôp hŏng klei lŏ bi mlih êpul mă bruă hlue si hdră bi hrŏ phung kriê dlăng bruă sang hră, mđĭ phung  mtô bi hriăm…

 “Phung nai ngă bruă kriê dlăng sang hră snăn dưi nao mtô bi hriăm, amâodah nao ti să ƀuôn hgŭm mđĭ thiăm kơ knuă druh kriê dlăng anôk bruă sang hră ti să, ƀuôn hgŭm. Krơ̆ng kjăp hnơ̆ng gru hmô hđeh sang hră ti dŭm sang hră, anôk mtô bi hriăm, dăp gĭt gai tŭ dưn êpul phung nai čiăng mđĭ klei thâo kriê dlăng, tŭ dưn bi liê leh anăn mđĭ hnơ̆ng jăk mtô leh anăn hriăm. Amâo hmăi ôh kơ bruă hriăm, klei dưi hriăm hră mơ̆ng phung hđeh sang hră.”

 Dăp anôk bruă sang hră ti Dak Lak dôk dưi hlue ngă hlue si hdră khuăt anôk phŭn, yua tŭ dưn kdrăp mnơ̆ng nah gŭ leh anăn êpul knuă druh, ƀiădah ăt krơ̆ng kjăp bruă hriăm hră. Klei pral mơ̆ng bruă sang čư̆ êa, bruă sang hră leh anăn mtô bi hriăm hŏng dŭm  boh sang hră, dôk mjing klei sa ai mơ̆ng phung knuă druh, nai mtô leh anăn amĭ ama, mkŏ mjing tur knơ̆ng čiăng kơ hdră lŏ mkŏ mjing sang hră hơĭt kjăp, amâo hmăi ôh kơ phung hđeh sang hră, boh nik ti krĭng taih kbưi leh anăn krĭng knông lăn.